Read Angami Naga Seyiedze Kerieu 27 Bible Online

Seyiedze Kerieu 27 - Angami Naga bible

Seyiedze Kerieu 27

¹Hauha Israelmiako, ukrü kiko nu thekrüko, mia thenyie mu thekrie mhokezhako, mu kediu lietho nu thekhrü metsei, teicie peteu nu mhachü vor mu viketako la mhakesekecü kezakeshü, mia kropuo nu mia nyie mepfüediadia ba.

²Zabdiel nuou Jashobim thekhrü kerietho-u nu themia kro kenie meho; puokro-u nu mia nyie mepfüedia.

³Puo Perez yiemia, mu puo bu thekhrü kenieu nu chüpahi nu kezhako mhokezhau chü.

⁴Thekhrü kenieu nu Ahohitmia Dodai bu kro kenieu meho, puokro-u nu mia nyie mepfüedia.

⁵Kezha seu, thekhrü seu la Benaia, zievo-u Jehoiada nuoue krütau chü; puokro-u nu mia nyie mepfüedia.

⁶Benaia hauha kekuomia Serko donu ketuomia Serko mhokezha kechüu. Puo nuou Ammizabad puokro-u mhokezhau chü.

⁷Diau, Joab siezeu Asahel, thekhrü diau la meho mu puo nuo Zebadia puo sie; puokro-u nu mia nyie mepfüedia.

⁸Kezha pengouu la Izrahit-u Shamhuth, puokro-u nu mia nyie mepfüedia.

⁹Sorouu khrü sorouu la Ira, Tekoit Ikesh nuou, puokro-u nu mia nyie mepfüedia.

¹⁰thenieu, khrü thenieu la Efraimko Pelonmia Helez, puokro-u nu mia nyie mepfüedia.

¹¹thethau, khrü thethau, Zera yiemia Hushatmia Sibekai, puokro-u nu mia nyie mepfüedia.

¹²Thepfüu, khrü thepfüu la Anathothmia Abiezer, Benjaminmia, puokro-u nu mia nyie mepfüedia,

¹³ker, thekhrü ker-u la. Netofamia Maharai, Zeramia, puokro-u nu mia nyie mepfüedia.

¹⁴Kerepuou, khrü kerepuou la Pirathonmia Benaia, Efraimmia; puokro-u nu mia nyie mepfüedia.

¹⁵kerekenieu, khrü kerekenieu la, Netofatmia Heldai, Othnielmia, puokro-u nu mia nyie mepfüedia.

¹⁶Israel seyieko mho, Reubenko la, Zikri nuou Eliezer bu kezhako mho-u chü. Simeonko la, Shefatia, Maka nuou;

¹⁷Leviko la Hashabia, Kemuel nuou; Aron la Zadok.

¹⁸Juda la Elihu, David siezeko mia puo, Isakar la Mikael nuou Omri,

¹⁹Zebulun la, Obadia nuou Ishmaia, Naftali la Azriel nuou Jeremoth;

²⁰Efraim la, Azazia nuou Hoshea, Manasseh tietsa puo la, Pedaia nuou Joel,

²¹Gilid nu ketuo Manasseh tietsapuo la, Zekaria nuou Iddo; Benjamin la, Abner nuou Jasiel,

²²Dan la Jehoram nuou Azarel. Hako Israel seyieko krütako.

²³David-e u kelhouzha cie mepfü khroko phrü mo, Jihovae Israel chüpie teigei themiako tuoi shütuoü di phrakeshü la.

²⁴Zeruria nuou Joab mia phrütuoü sie di tseilie mota; derei mhahau la noupfhü Israel gei vor, mu phrükeshüko kidepuo shi cü kediu David dze kethu nu shülie mote.

²⁵Kediu kinyikeseu Asmaveth Adiel nuou, siro kijü nu, nadiko nu, rüna kecükezhako nu ki kezhako kinyiko pete mho kebau Uzia nuou Jonathan;

²⁶Liecie mhathoko kemeho-u Kelub nuou Ezri.

²⁷Siro khubelieko kemeho-u Ramatmia Shimei, siro khubelie nunu biepie khubezu chülie di khapiekebau kiko mho-u Shifmia Zabdi.

²⁸Oliv mu khabvü boko Shefela nu kebako la Gedermia Baal-hanan; tier khapie keba kiko mho kebau Joash.

²⁹Sharon nu nha liecütuoyakezha kiriko la Sharonmia Shitrai. Razhanu kiriko la Adlai nuou Shafat.

³⁰Utko kemeho-u Ishmaelmia Obil, mu gada krüko kemeho-u Meronothmia Jehdeia, tekuokroko kemeho-u Hagritmia Jaziz.

³¹Hako pete kediu David vieko keseyakezhamia.

³²Jonathan, David nieu, mhasi kenyimia puo mu kethumia puo di mia tarhokecü chü; mu Hakmoni nuou Jehiel unie kediu nuonuoko mehoya.

³³Ahithofel-e kediu tahitarhoyakezhau, mu Arkmia Hushai-e kediu khrietho-u.

³⁴Ahithofel sieu ro Benaia nuou, Jehoiada mu Abiathar Joab-e kediu rüpfhünuo mhokezhau chü.