Read Angami Naga Seyiedze Kerieu 28 Bible Online

Seyiedze Kerieu 28 - Angami Naga bible

Seyiedze Kerieu 28

¹David-e Israelmia kezhako pete, seyieko donu mhakezha keseko, kediu liechükezha themiako donu kezhako, nyie mhokezhako, krie mhokezhako, kediu mu puo nuonuoko vie pete mu kiriko mehoyakezhako, terhümiavi kekuoko mu terhümia pete kiepie Jerusalem nu kengulie.

²Süsie kediu siethalie di sie, “A siezedzürieko mu a themia pete a pfhe rünyüliecie, ae Jihova dietseidiekhou-u bu rülei balieketuo la; Ukepenuopfü phipra puo chütuoü rhüliete; a kiu chütuoü di mha keselie.

³Derei Kepenuopfü sie a ki, ‘N bu a za la ki puo chülie lhowe, noe terhümiavimia puo mu thezie pekruwaketa la’ site.

⁴Siürei Jihova Israel Kepenuopfü a puo ki nunu a bu Israel mho kedi chü seituoü di a kedalie, puoe Juda bu krüta chüketuo la kedaliecü la, mu Juda kinu, a puo kiu nunu, a puo nuonuoko donunu a bu Israel pete mho di tuoücü puo neita.

⁵Jihovae thepfumia kekra se a tsü mu a nuo thepfuko pete donu puo thuo a nuo Solomon bu Israel mho Jihova kedi rüvie nu kedibau gei baketuo kedalie.

⁶Puo a ki, ‘N nuou Solomon bu a ki mu a kitieko chüpie a tsütuo we, a puo bu a nuo chütuoü di puo kedalieketa la, mu a puo puou chütuo.

⁷Puo tsiedo mhie di a diekhakeshüko mu a zhoko ze zo tuokelie sie a puo kedi bu ba seikelie chüshütuo’ siya.

⁸Süla tsie Israelmia pete kesi ki nu, Jihova nie Kepenuopfü diekhakeshü pete ze mu pfhüliecie, nie kijü kevi hau pevielie di nie kayieu pie nie sieketuo nie nuonuo tsü zo volieketuo la.

⁹“Siro no, a nuo Solomon, n puou Kepenuopfü silie, siro n nou pete mu chünyüsiei di puo lie chülie; Jihova mia nou pete keseya, mu mha rhükelie mu noudo pete silieyacü la. Mhanuü no puo pfhü ro, no puo ngulietuo; derei mhanuü no puo khakewa sie, puo kechachie la n khawatuo.

¹⁰No tsie rünyülie, Jihova n bu kemesa chüu la ki puo chütuoü di n kedalieketa la; meteilie di chülie” sishü.

¹¹Süsie David-e kerüsuokiu kifükhro rhiu, süu kiko, puo kinyibouko, puo kibou pesoko, puo ki kinutsa keba bouko mu ngukemezhiebau keba bou mharhüu khapie puo nuo Solomon tsüshü.

¹²Mu puo nou mharhü keba pete khashü Jihova kiu kitietsa kehoubou chüketuo pete, Kepenuopfü kiu kinyiko, mu chü kemesapie khakeshü vie kinyiko la;

¹³Zievoko mu Leviko kezapie kebako, mu Jihova kiu mhatho chalie peteko; Jihova kiu mhatho la lietho peteko, Jihova kiu mhatho la tehiemekhouko pete la.

¹⁴Kehou metsei kese la suna hiekhouko, suna mesi, kehou metsei kese la rakachü hiekhouko, rakachü merenyi,

¹⁵mitubou bako mu mitubouko mesi, suna mitubou bako, mu puo mitubouko puo puo mesi rakachü mituboubako mu puo mitubou mesi, kehoupuo la mitubou ba puo se yakecüko.

¹⁶Kepekie niekhrüda la suna pie kechü mizhü puo puo mesi, rakachü mizhü rakachü mesi,

¹⁷ratako, mhakhouko mu tehieko la suna kevi; suna khouko mu süko puo puo mesi,

¹⁸suna kevi se chükecü mharekevi the kecü ruosuobau, mu puo mesi, siro cherubnie u shü kelhapie Jihova dietseidiekhoubouu yapie bayakezha suna gari chütuoü rhü sekebau.

¹⁹“Hako pete, puo a ki pukemeciekeshü, mhatho rhükelie pete, Jihova thuo pukeshü medzi di thushüte.”

²⁰Süsie David nuo Solomon ki pu sakecü, “Meteilie mu thepfulie di chülie: Michie morei kechazieta hie, Jihova Kepenuopfü, a Kepenuopfü n ze tuo zo cü la. Puo n gei mhachüshü motalie lho mu n khawalie lho zo, no Jihova kiu la mhathoko chü tseilie kemochie.

²¹Siro Zievoko puorüla kekreikreikecüko mu Leviko Kepenuopfü kiu mu mhatho la kebako; siro mhatho kehoupuo la rei mhapuo chüsi phrekebako u nei di mhachüshükenyümia; mhakezha keseko mu themia peteko no pukeshüko ze zotuo ho” sishü.