Read Angami Naga Seyiedze Kerieu 29 Bible Online

Seyiedze Kerieu 29 - Angami Naga bible

Seyiedze Kerieu 29

¹Siro kediu David-e kehou pete ki pukeshü, “A nuou Solomon, Kepenuopfü rübei puo kedakeshüu, medzü mu mha tei si moluo, mu mhatho-u zha; rüsuokiu sü themia la mo derei Kepenuopfü Jihova la zo.

²Süla a chülie kevide a Kepenuopfü kiu la mha keseshüte, suna vieko la sunako, rakachü vieko la rakachü, merenyi vieko la merenyi, thegi vieko la thegi, mu sei vieko la sei, süsie rei sü mhogei shüketuo la Onix mu ketsieko, ketsie kemevako puo rhi kekreikreicüko, ketsie puomakere neiüko, mu marbeltsie rei kekra.

³Süsie rei a a Kepenuopfü kiu la a noumvü tuotakecü la a thuo a vie, suna, rakachü, a kemesa kiu la mha kesekeshüko tsügei nu a thuo khapie a Kepenuopfü ketsüko:

⁴Ofir suna talent nyie se, rakachü kevipfü talent nyie thenie, se kiko sozhako daketuo la,

⁵mu suna vieko la suna, rakachü vieko la rakachü, mhachükesiko dzie se chüshüketuo mhatho neiüko la, siro thie suomianie n mhatho-u khapie Jihova tsüshütieya ga?” sishü.

⁶Sitse u puonuo kiko nu krütako, süsie rei seyieko krütako, nyie mho mu krie mho kezhako, mu kediu lietho nu kezhako u neisiei di mhakhashü.

⁷Ukoe Ukepenuopfü kiu mhatho la suna talent nyie pengou mu darik suna talent nyie ker, rakachü talent nyie ker, merenyi talent nyie kerethetha mu thegi talent nyie krie puo khashü.

⁸Siro kehoupuorei ketsie puomakere keba mia khapie Jihova kiu kinyi nu Gershonmia Jehiel dzie nu shüshü.

⁹Sidi hako khashü nyü di, u nou puo zo di Jihova kiu la mha methuo khakeshüko la themia u nei phita; kediu David rei puo nei phi.

¹⁰Süsie David-e mechü kehouu mhodzünu nu Jihova tsheshü. David-e sie, “He-i Jihova, hie puo Israel Kepenuopfü, kechachie thejakepfüu chülie.

¹¹He-i Jihova, kezha, kekuo, zapuzayie, kuokelie mu kedi pete n vie zo; teiko gei mu kijü ketuo pete n vie zocü la; kedikechü n vie zo, he-i Jihova, mu n chüpie mha peteko mho shüwate.

¹²Kinyi mu therhu n kinu vor phre mu noe peteko mho di baya. N dzie nu kekuo mu kezha ba zo; mu pete bu zhakelie mu kekuo khakeshü n dzie nu ba.

¹³Süla hie Kepenuopfü, hie tsie n thezieya mu n za kezhau tsheya.

¹⁴“Derei a sü supuo mu, mu themiako mha methuo khakeshü sü kedipuo mu? Mha peteko n kinu vor, mu hie we n vie se n tsü la keba zocü la.

¹⁵Hie n mhodzünu chazoumia mu hie puonuoko tuoi rüvemia zolie, kijü nu hie teisozhako mha khrü puo mhie zo, mha bame puo rei jü ze.

¹⁶He-i Jihova hie Kepenuopfü, hieko n za kemesau la ki puo chü n tsütuoü di mha keseketuo la kha phikeshü hako n dzie nunu vor mu pete n vie zo.

¹⁷A Kepenuopfü, no thenouu pfhüya, mu kemezhüu n neiyakecü a siba, a a nou mezhü di mha hako pete khashüzhie, mu a tsie n themiako, hakiha tha di u nei phi mu khrie mo zo di khakeshü ngute.

¹⁸He-i Jihova, hie puonuoko, Abraham, Isak mu Jakob Kepenuopfü, n themiako melou nu mhachülie ketuo mu mhakele bu ba seilie thienyü mu uko melou rüguopie n kitsa tuokelie chücie.

¹⁹A nuou Solomon bu puo nou pete pie no diekhakeshüko n zhapuko, chünukeshüko pete chü mu zelieketuo khashücie, sidi a rüsuoki chüketuo la mhakese sebaketau chülie thienyü” sishü.

²⁰Süsie David-e sie mechükehou ki, “Jihova nie Kepenuopfü tsheliecie” si. Sitse mechükehou pete Jihova uko puonuoko Kepenuopfü tsheshü mu nuketsu di u khapie Jihova mu kediu mhodzü shü.

²¹Uko ruosuoko chüpie Jihova tsü mu süsie nhie kethe ruosuoko chüpie Jihova tsükeshü thudo nyie puo, tekuochü nyie puo, tekuonuo nyie puo, mu kekrie ruosuoko mu Israel pete la ruosuo chü phi.

²²Sidi uko sünhie u nei phi di Jihova mhodzü mhacümhakrielie. Sidi uko vakenieu David nuou Solomon bu kedichü; siro uko puo kenhepie puo bu Jihova kedinuo chü, mu Zadok bu zievo chü.

²³Süsie Solomon we Jihova kediba gei balie, puo puo David kediu sou nu; puo kruolie mu Israel pete puo die ze.

²⁴Siro krütako mu terhümiavi kekuoko, mu kediu David nuonuo pete kediu Solomon gei dietho tuolietuoü phrashü.

²⁵Siro Jihovae Israel pete mhodzünu Solomon chü pezha phishü, sidi Israel nu puo mhodzü kedi puorei nguliekemo kedi therhu mu kekuo se puo tsü.

²⁶Jese nuou David hakemhie di Israel pete mho kedi chülie.

²⁷Puo Israel mho teicie hiedia kedi chü; puo Hebron nu cie thenie di, mu Jerusalem nu cie serese.

²⁸Süsie puo phichü di teisozha kekra lhoulie, tsiu kinyi mu therhu thuo puo tshupfü di siata; tsiu puo nuou Solomon puo sou nu kedi chüta.

²⁹Siro kediu David mhathoko therie nunu thela ketso siedzekesiu Samuel mu mhadzekethuu mu siedzekesiu Nathan mhadze kethu dau nu mu siedzekesiu Gad kethu dau nu thupie tuo.

³⁰Puo kedi kechü dze pete, puo kekuo mu puo geinu Israel gei mu kijü kekreira kediko gei mha chüketako tuo phre.