Read Angami Naga Seyiedze Kerieu 5 Bible Online

Seyiedze Kerieu 5 - Angami Naga bible

Seyiedze Kerieu 5

¹Israel nuorieu Reuben nuonuoko: (Puoe nuorieu zo, derei puoe puo puo zhü perhuwaketa la puo ngukelie merenyiko pie Israel nuou Josef nuonuoko tsüwate; sidi puo kepenuo geinu uko seyieko phrü kevo chü mote.)

²Judae puo puo siezedzürieko ki kuokuo mu puo geinu kedi puo rei sier, derei kayieu we Josef vie chüte.

³Israel nuorieu Reuben nuonuoko: Hanok, Palu, Hezron mu Karmi.

⁴Joel nuonuoko: Puo nuou Shemaia, puo nuou Gog, puo nuou Shimei,

⁵Puo nuou Bira, puo nuou Reaia, puo nuou Baal,

⁶Puo nuou Bira, Asiria kediu Tilgath-pilneser bu tezeketau; puo Reubenmiako donu krütau,

⁷puo krünuoko nuosenuoyieko phrükeshü hamhie: krütau, Jeiel mu Zakaria.

⁸Mu Azaz nuou Bela, Shema nuou, Joel nuou Aroer nuou mu Nebo mu Bal-meon ketso.

⁹Süsie rei puo niathutsa rayhako Eufrat khie hatsa lhou, kekreilamonyü uko thukrokoe Gilid nunu kruolie.

¹⁰Siro Saul teiki uko Hagritmia ze terhü chü di süko penyüwa sidi uko Gilid niathutsa peteko nu u pfhekiko chü di lhou bata.

¹¹Gad nuonuokoe uko khietsa Bashan kijü nu vo Saleka ketsoko nu lhou.

¹²Joel krütau, süsieso-u Shafan, Janai mu Shafat-e Bashan nu.

¹³Mu u chienuo medzi di u nuosenuoyieko hamhie: Mikeal, Meshulam, Sheba, Jorai, Jakan, Zia mu Eber, mia thenie.

¹⁴Hako Huri nuou Abihail nuonuoko Jaroah nuou, Gilid nuou, Mikeal nuou Jeshishai nuou, Jahdo nuou, Buz nuou;

¹⁵Abdiel nuou Ahi; Guni nuou, uko kinuko donu kezhau.

¹⁶Mu ukoe Bashan nu Gilid nu mu süko nu rünako nu, mu Sharon khie keba rünako mu sükhieko nu lhoutuota.

¹⁷Hako pete puokrü puonuo lhoukevor khe Juda kediu Jotham mu Israel kediu Jeroboam teiki phrüliete.

¹⁸Reubenmiako, Gadmiako mu Manasseh yiemia tietsa puo, hako kethepfu kropuo di pezhü mu zhiechako pfülieya, siro theü rei cielieya, terhü chü si, mia nyie hiediaedia di krie thenie mu hiesorou terhü nu kevo dojüpfü baya zo.

¹⁹Ukoe Hagritko, Jetur, Nafish mu Nodab ze terhü chü.

²⁰Uko mia ser uko khruohishü di ukoe Hagritko mu süko zekethako pete lielieta, kekreilamonyü uko rüyachü nu Kepenuopfü ki chalie. Ukoe puo pelekecü la puoe uko kecha chüshü uko tsü.

²¹Uko süko kiriko telie: ut nyie hiepengou, tekuo nyie krie kenie di hiepengou, gada nyie kenie, themia nyie krie puo.

²²Terhüu Kepenuopfü viecü la mia kekra tetsuta, sidi uko mia uko tezeketa ketso hako kijüko nu lhoutuo.

²³Manasseh yiemia nuonuoko tietsa puo kijüu nu lhou; uko kramiemie se Bashan nunu Baal-hermon, Senir mu si zo vo Hermon ketsoko nu tuota.

²⁴Hakoe uko chienuoko krüko: Efer, Ishi, Eli-el. Azriel, Jeremia; Hodavia mu Jahdiel, kekuo kethepfu kro puo, zayie chü di uko kinuko donu thekrümia chü.

²⁵Derei ukoe uko krünuoko Ukepenuopfü gei kejo chüwa. Ukepenuopfü uko mhodzünu nu penyükeshü kijüko mu themiako rhuoko ze mha kesuo chütuota.

²⁶Süla Israelmia Kepenuopfü Asiriamia kediu Pul ruopfü hüshü. Asiria kediu Tilgath-pilneser ruopfü hüshü di puo bu Reuben yiemiako mu Gad yiemiako, Manasseh yieko tietsa puo teze Hala, Habor, mu Hara mia Gozan rüu ketso vota mu thie ketso rei tuo zotuo.