Read Angami Naga Seyiedze Kenieu 1 Bible Online

Seyiedze Kenieu 1 - Angami Naga bible

Seyiedze Kenieu 1

¹David nuou Solomon puo thuo puo kedirüvie nunu puo kedi chü kemeteilie; Jihova puo Kepenuopfüe puo zetuo di puo chüpezha phishü.

²Solomon-e Israel peteko, nyie mu krie mhokezhako, capiko mu Israel pete donu krütako pete, mu chienuo krüta pete kiekengulie.

³Süsie Solomon mu mechükehou puo ze ketuo pete Gibeon nu thechü kerükrieu gei kho, Jihova kituou Mosa nha nunu chükelie Kepenuopfü kehou rüsuopfhekiu sünu bakecü la.

⁴(Derei Kepenuopfü dietseidiekho-ue Kiriat-jearim nunu se David thuo kesepie keba thechüu nu vota, puo Jerusalem nu pfheki puo pethoupie bawaketa la.)

⁵Sizomonyü puoe Hur nuou Uri nuou Bezalel bu kechü merenyi ruosuobau khapie Jihova rüsuopfhekiu nu bawata. Siro Solomon mu puo zeketuo pete sünu nu mha ketsotuo.

⁶Siro Solomon sünu Jihova mhodzünukeba merenyi ruosuobau, kehou rüsuopfhekiu nu kebau gei kho, di sü geinu kethe ruosuo nyie puo chüshü.

⁷Süzhü Ukepenuopfü Solomon pengushü di puo ki, “A bu kedipuo se n tsü ta, chaliecie” si.

⁸Sitse Solomon-e Kepenuopfü ki, “No a puo David ngumezhie phi shüe, mu a bu puo sounu dikelie chüshüte.

⁹He-i Kepenuopfü Jihova, no thie a puo David ki n diekhashükewau chüshücie; no a chüpie a bu themia krodi kijünu nyopheko de zokecü kro puo mho kedi chütuoüte.

¹⁰Süla tsie mhasi mu kesikele kha a tsüshü di a bu themia hako mhodzünu pra mu lekelie chüyi: simoro supuonie n themia kezha haikecü puo mho dilie vituo mu?” si.

¹¹Sitse Ukepenuopfüe Solomon pfhekhoshü di sie, “Kekreilamonyü mha hau n melou nunu parkecü la, mu noe kishükinyi morei therhu, n ngumvü phou, morei rheikecha cha mo, derei n thuo n la we mhasi mu kesikele cha di n bu uko mho di tuoükelie themiako kekhalie kevi chate.

¹²Mhasi mu kesikele kha n tsü shüte, mu a kishükinyi mu therhu, n mhodzü kedi chü kevorko morei n sie kevor miapuorei nguliekemo se n tsü sashütuo ho” si.

¹³Süsie Solomon-e Gibeon nu thechü kerükrieu nunu, kehou rüsopfhekiu nunu la Jerusalem nu vorlie, sidi puo Israel mho kedi chülie.

¹⁴Süsie Solomon-e guragariko mu gurako kengulie, puoe guragari nyie puo di krie dia, mu gura nyie kerekenie nyi mu puoe süko pie guragari keba nadiko nu mu Jerusalem nu kediu ze ba wa.

¹⁵Siro kediue rakachü mu suna chü pekrapie Jerusalem nu ketsieko mhie zoshü, mu Shefela nu khrabvüboko kidepuo lhouya shi sedarbo rei pelhoupie sükemhieshü.

¹⁶Siro Solomon-e Ijipt nu mu Kue nunu gurako se vorlie, kediu lhithokoe Kue nunu süko pfhülie.

¹⁷Ukoe Ijipt nunu kelie se vor di ketse lapie chazoushüwa, guragari puo rakachü shekel krie sorou, mu gura puo shekel krie puo di hiepengouya, haidi uko dzie nunu ze keyie lapie Hitmia kedi peteko mu Siria kediko pete tsüya.