Read Angami Naga Seyiedze Kenieu 10 Bible Online

Seyiedze Kenieu 10 - Angami Naga bible

Seyiedze Kenieu 10

¹Rehoboam-e Shekem nu volie, Israel pete puo bu kedi chütuoü di Shekem nu vor baketa la.

²Nebat nuou Jeroboam-e süu sikeshü ki (puoe kediu Solomon kinu ta vo Ijipt nu tuoketa la), Jeroboam Ijipt nunu la vorlie.

³Mia ketseshü di vo puo kie, siru Jeroboam mu Israel pete vor Rehoboam ki,

⁴“N puoe hie vocie chükemesi shüwa, no we süla tsie n puo lietho kere mu puo vocie kemesi üse hie gei shükewau bie kemedzashü liro, hie n lie chütuowe” sita.

⁵Sitse puo sie uko ki, “Zha se nhie nu a ki la vorliecie” sishü. Süla themiako tuota.

⁶Süsie kediu Rehoboam-e phichümia, puo puo Solomon kerheiki puo mhodzü thayakezhako ze kerüchü di sie, “Nieko a bu kedipuo se themia hako die kelatuo shi a ki pushücie” sishü.

⁷Sitse uko puo ki, “No themia hako gei n zho vi mu uko nei chüshü mu uko gei die kevi pushü ro, uko n kituomia chü sei tuolietuo” sishü.

⁸Derei puoe phichüko puo ki pukeshüu lie mvü di khriesamia puo tshüko puo ze kesierko ketso tuota.

⁹Sidi puo sie uko ki, “Nieko a bu themia hako a ki, ‘N puoe vociepie hie geikeshüu bie kemedzashülie’ iketako ki kiü lashü ro vituoü ta?”

¹⁰Sitse khriesamia puo tshümiako puo ki, “Themia n ki, ‘N puoe hie vocie chükemesi shüte, derei no süu bie kemedzashü hie tsücie’ ikethako ki hikecü pushütuo mu, ‘A dziekinuo kecüyo rei a puo chieca ki shükuo ba.

¹¹Siro a puoe vocie kemesi puo khapie nie gei shü, a nie vocieu kehie sashütuo. A puo seiro se nie kekha, derei a seba se nie kekhatuo’ ilie” sishü.

¹²Jeroboam mu themia peteko zha se nhie Rehoboam ki vor, kediu uko ki, “Zha se nhie a ki la vorcie” ikeshü la.

¹³Sitse kediu phichüko die lie mvü di uko gei die kere puta.

¹⁴Puoe khriesako die tuoi di uko ki, “A puo nieko vocie bie kemesishü, a süu ba sashütuo; a puo seiro se nieko kekha, a we seba se nieko pechütuo” ita.

¹⁵Sidi kediue themiako die rünyü mota, süusü Kepenuopfü thuo mha chü lakeshü puo, Jihova die Shilonmia Ahija bu Nebat nuou Jeroboam ki pukeshüu chü tseituoüketa puo zo.

¹⁶Israel pete kediu uko die rünyü moketa ngu tse, themiako kediu ki pu lakecü, “David gei u ya kedipuo ba ga? Jese nuomia kinu u kayie puorei jü. He-i Israel, u thuo u pfheki nu vophretalie! He-i David, tsiewe n thuo n ki meholiecie” sita. Süla Israel pete u pfhekiko nu la vo phreta.

¹⁷Derei Rehoboam-e we Israelmia Juda rünako nu lhou ketuoko mho di.

¹⁸Siro kediu Rehoboam-e Hadoram ketsepie mhathokere chükebako kemeho-u chüshü ru, Israelko ketsie pie puo vakhriwa. Sitse kediu Rehoboam rükri puo gura gei sielie di ta Jerusalem nu vota.

¹⁹Hamhie di thie ketso rei Israel-e David kiu perhiepetsoutuoya zo.