Read Angami Naga Seyiedze Kenieu 11 Bible Online

Seyiedze Kenieu 11 - Angami Naga bible

Seyiedze Kenieu 11

¹Rehoboam-e Jerusalem nu vorkelie ki puoe Juda mu Benjamin kikruko nunu chüpahimia nyie krie puo di hiethetha kie kengulie, Israel ze kegei tsiu Rehoboam kedi se la vorketuo la.

²Derei Jihova dieu Kepenuopfü themia Shemaia ki vor.

³Juda kediu Solomon nuou Rehoboam mu Juda mu Benjamin nu Israelmia ketuoko ki pukecü,

⁴“Jihova haikecü puya: Nieko kho nie seüyiemia ze kegeilie lho zo. Kehoupuorei puo thuo puo kinu votalie, mha hau a kinu zokecü la” sita. Süla uko Jihova die rünyülie di lata, sidi Jeroboam petsou vo mota.

⁵Rehoboam-e Jerusalem nu lhou, mu puo Juda rüguolieketuo la nadiko chüshü.

⁶Puo Bethlehem, Etam, Tekoa chüshü,

⁷Beth-zur, Soko, Adulam,

⁸Gath, Maresha, Zif,

⁹Adoraim, Lakish, Azeka,

¹⁰Zora, Aijalon, mu Hebron, Juda mu Benjamin nu dahou chüpie hou se keba nadiko.

¹¹Puo dahouko chükemeteiwa mu mhakekhayakezhako khapie bawa, sidi kecüca tier mu khubezuko pie süko nu khapie balie.

¹²Süsie rei puo nadiko nu pezhü mu rüngou khapie bawa mu süko chükemetei selie. Süla puo Juda mu Benjamin se balie.

¹³Israel pete nu zievoko mu Leviko u thuo u kelhouchüko nunu puo pfhü vor.

¹⁴Levikoe uko kijü mechü vie mu uko vieko khawa di Juda mu Jerusalem nu vorta, Jeroboam mu puo nuonuokoe uko bu Jihova zievoko lietho chü lhoü di uko khakewa la.

¹⁵Sidi puo thechü kerükrieko la puo thuo chükelie terhuo mu mithunuoko la puo thuo puo zievoko kedalieta.

¹⁶Siro Israel Kepenuopfü Jihova pfhütuoü di u nou khashükewako Israel seyie pete donu nu Jihova uko puonuoko Kepenuopfü ki ruosuo chütuoüketuoko uko sietsa vorlie.

¹⁷Uko Juda kedi chükemeteishü, mu uko cie se Solomon nuou Rehoboam bu khrukhre balie, uko cie se David mu Solomon chanu tuokelie la.

¹⁸Rehoboam-e Jerimoth nuopfü Mahalat pie puo kimia chülie, Jerimoth liro David mu puo kimia Abihail unie nuo. Abihail liro Jese nuou Eliab nuopfü.

¹⁹Hapfüe puo nuo thepfumia penuokeshüko: Jeush, Shemaria mu Zaham.

²⁰Süpfü sie puo Absalom nuopfü Maka lielie, süpfü penuoshü puo ketsüko: Abija, Atai, Ziza mu Shelomith.

²¹Rehoboam-e puo kimiako mu puo pelipfüko pete donu Absalom nuopfü Maka puo neitho (puo nupfünuo mia kerethetha mu puo pelipfüko mia hiesorou, mu puo nuo thepfumia mepfüethetha, thenumia hiesorou).

²²Siro Rehoboam Maka nuou Abija kedapie puo bu siezedzürieko donu kedinuo kezhau chü, puo bu kedi chüketuo kele la.

²³Siro puo mhasi di mhachüshü mu puo nuonuoko huo kezapie uko bu Juda mu Benjamin kijü pete nu kuda keba nadiko nu shüwa, tsiu uko cava keseshü mu uko nupfünuo rei pfhüpie uko tsüshü.