Read Angami Naga Seyiedze Kenieu 12 Bible Online

Seyiedze Kenieu 12 - Angami Naga bible

Seyiedze Kenieu 12

¹Rehoboam di sedelie di puo metei sierlie tse, puo Jihova zho-u rükra mota, puo mu puo zeketuo Israel pete.

²Rehoboam kedi chükelie cie pengou cie, uko Jihova gei dietho moketa la; Ijipt kediu Shishak bu,

³guragari krie kerekenie mu gura kese mia nyie hiesorou ze di Jerusalem petsou vorta; siro themia phrü hulie kelho Ijipt, Libia, Sukkim mu Ethiopia[7] nunu vorta.

⁴Puoe Juda nadiko kuda chüpie kebako lie se Jerusalem ketso vota.

⁵Sitse siedzekesiu Shemaia Rehoboam mu Juda mu kezhako, Shishak la vo Jerusalem nu kengukebako, ki pukecü, “Jihova hakemhie puya, Nieko a khawate, süla a nieko khapie Shishak dzienu shüwate ho” sita.

⁶Sitse Israel kezhako mu kediu u chü kerünuolie di sie, “Jihova sü kemezhü nu thaya” sita.

⁷Jihovae ukoe u chü kerünuokelie ngu tse Jihova die Shemaia ki vor di sie, “Uko u chü kerünuoliete; a uko pekawalie lho, derei a kelakelie huo khashü uko tsütuo mu Shishak dzie se di a nouyieu lapie Jerusalem gei shülie lhote.

⁸Siürei uko bu puo thekemia chütatuo, uko bu a lietho mu kijü kekrei kediko lietho kechü kekreikecü silieketuo la” sita.

⁹Süla Ijipt kediu Shishak-e Jerusalem petsou khor, sidi puo Jihova kiu kinyiko mu kedikiu kinyiko chüseta, puo mha pete keta seta. Puo Solomon chükeshü suna pezhüko chüseta;

¹⁰derei kediu Rehoboam-e süko sounu rakachü pie pezhü chülie, sidi süko khapie kediu kinu kikha kepfheko mhokezhako dzienu shüwata.

¹¹Kehoukipuorei kediu Jihova kinu kevo ki, kepfhekoe süko pie vorya, mu süsie se la vo kepfheko bounu shüpie bawaya.

¹²Puoe puo thuo puo chü kerünuokelie la. Jihova nouyieu puo kinu rüdita, di peka tseikewa se vorshü mota; sizomoü, Juda nu puotei vi bata.

¹³Siro kediu Rehoboam-e Jerusalem nu puo thuo puo kedi pesielie di kedi chü bata. Rehoboam-e puo kelhou zha cie hiediaepuo ki kedi chülie, mu puo cie kerethenie Jerusalem nu kedi chü, Jihovae seyie pete donu nu kedapie puo za bu batuoükelie nadiu nu. Puo zuo za Naama, Ammonmiapfü.

¹⁴Puoe mha kesuo chüwa, puoe puo nou khapie Jihova pfhütuoükecü nu shülie moketa la.

¹⁵Rehoboam mhathoko, therie nunu thela ketso siedzekesiu Shemaia mu mha ngulieyakezhau Iddo thedze thupie ketuoko nu thupie ba moü me? Rehoboam mu Jeroboam unie donu terhü chü sei tuo zo.

¹⁶Rehoboam puo pfutsanuoko ze di zeta, mu David nadiu nunu puo khruwa; süsie puo nuou Abija puo sou nu kedi chüta.