Read Angami Naga Seyiedze Kenieu 13 Bible Online

Seyiedze Kenieu 13 - Angami Naga bible

Seyiedze Kenieu 13

¹Kediu Jeroboam dikelie cie kerethetha cie, Abija-e Juda mho kedi chüta.

²Puo cie se Jerusalem nu dilie. Puo zuo za Mikaia, Gibiamia Uriel nuopfü. Siro Abija mu Jeroboam unie donu terhü chü.

³Abija-e terhü nu kethepfumia mia nyie krie dia ze di kegeituoü vota, mu Jeroboam rei terhümiavi kedakelie mia nyie krie thetha ze di puo ze keperhietuoü dojüpfü thalie.

⁴Sitse Abija-e Efraim kijü Zemaraim kijüthou gei thalie di pukecü, “A pfhe rünyüshücie, Jeroboam mu Israel pete.

⁵Jihova Israel Kepenuopfü metsie se dietseidiekhokelie nunu kechachie kedikechü pie David mu puonuonuoko tsükecü nieko si mo me?

⁶Sirei Nebat nuou Jeroboam, David nuou Solomon kituomia puo zo di sie puo niepuu perhiete.

⁷Sidi Rehoboam medzü mu puo melou puopie tsei toulie mo di uko puo petsoulie kelho kinu mhathokemo zekesuomia kro puo zelie di Rehoboam, Solomon nuou petsouta.

⁸“Niekoe krodi puo mu Jeroboam nieko la chükeshü suna mithunuo rhuoko ze ketuo la David nuonuoko dzienu keba Jihova kedi ze keperhiecü tsie le ba.

⁹Niekoe Jihova zievoko, Aron nuonuoko mu Leviko whuowa di kijü kekreira tuoi nie la zievo kro puo chülieta moü me? Kehoupuorei thudonuo puo morei tekuochü thenie se puo ruochü di terhuo kemo zievo chüliete.

¹⁰Derei hieko la we, Jihova sü hie Kepenuopfü, mu hie we puo khawa mo. Hie we Aron nuonuoko bu zievo chü di Jihova chalie chüya mu uko liethonu Leviko ba.

¹¹Uko teisoduü teizei metsei kethe ruosuo mhare keviko chüpie Jihova rüsuoya, se Kepekie Niekhrüdau khapie suna kethe mizhü gei pie baya, mu suna mitubako kesepie süko mituko bu teizei metsei tu baya; Jihova hie Kepenuopfü khakeshüko zetuoya, derei nieko we puo khawate.

¹²Harie, Kepenuopfü u tsü geinu u zetuo, mu puo zievoko terhü ketsüko se di nieko ze kegeiketuo la khoushü tuoü thawe. Harie Israelmiako, Jihova nie puonuoko Kepenuopfü ze kegei hie zocie, nie kuolie lhokecü la” sishü.

¹³Siro Jeroboam-e mia kro puo bu uko sietsanu rüshü ler uko yapielieketuo la ketseshü, sükemhie puo chüpahiko Juda mhodzü tha, mu rüshüketuo kro-u uko sietsa tha.

¹⁴Sitse Judae rüreikeshü ki, terhü sü uko dzütsa mu uko sietsa bate, ukoe Jihova ki melieshü, mu zievoko ketsüko khoushü.

¹⁵Süsie Juda themiakoe terhü pfhe shieshü, mu Juda themiako shieshü tse, Kepenuopfüe Abija Juda mhodzünu nu Jeroboam Israel pete penyüwa.

¹⁶Israelko Juda mhodzünu nu tata, mu Kepenuopfü süko khapie uko dzienu shüwa.

¹⁷Abija-e mu puo themiako uko gei sewa; süla kedakelie Israelmia nyie krie pengou sükisü tetsuta.

¹⁸Sidi süuva Israel themiako pekawa, Juda themiakoe Jihova uko puonuoko Kepenuopfü gei thakelie la kuolie.

¹⁹Abija Jeroboam whuowa di puo kinu nadi liekelieko: Bethel mu süu rünako, Jeshana mu puo rünako, Efron[8] mu puo rünako.

²⁰Jeroboam-e Abija teiki puo kekuo ngu salie mota; tsiu Jihova puo vüwa di puo siata.

²¹Derei Abija kuo miemielie, siro puo thenu keredia lie di puo nuo thepfu mepfüekenie mu thenu keresorou penuolie.

²²Abija mhatho dze kekreiko, puo zho puo rüli mu puo diepuko siedzekesiu Iddo dzenu thupietuo.