Read Angami Naga Seyiedze Kenieu 15 Bible Online

Seyiedze Kenieu 15 - Angami Naga bible

Seyiedze Kenieu 15

¹Kepenuopfü ruopfüu Oded nuou Azaria gei vorlie.

²Sidi puo Asa ze kesetuoü vo di sie puo ki, “Asa mu Juda pete, mu Benjamin a pfhe rünyüshücie: Jihovae nie puo zeketuo chie nie zetuoya. Nieko puo pfhülie ro nie bu puo ngulie zotuo, derei nieko puo khawa ro puo nie khawatuo.

³kekreilamonyü puotei kecha Israel-e Kepenuopfü ketho-u sa mo, mu zievoko kepetha sa mo, mu thezho sa mo vorte;

⁴derei uko kemezhiekelie ki, ukoe rürei Jihova, Israel Kepenuopfü ki la vorlie, di puo pfhülie tse uko bu puo ngulie.

⁵Süteiki themia kehoupuorei ketsu kevo khrukhre mo, kijü pete nu kebvükeboukecü la kemezhiekecü themiako gei vorta.

⁶Uko pro phaphata, seyie-e seyie puo perhie, nadi-e nadi puo perhie, süusü Kepenuopfüe kemezhiekecü neiüko se uko keyhukeshü la.

⁷Derei nieko we thepfulie; nie dzie bu thachüta hie, nie mhatho zhakhra ngulie zotuokecü la.”

⁸Siro Asae die hako Oded nuou Azaria siedzekesi die pukeshü sikelie ki thepfulie, sidi puo Juda mu Benjamin nu kijükhru rüna Efraim nunu liekelie nadoko nunu terhuomiarhi kerütsekecüko bie phrewa, siro puo Jihova kiu kifükhro ki keba Jihova ruosuobau ketsopevi lalie.

⁹Puo Juda mu Benjamin mu Efraim, Manasseh siro Simeon uko ze rühoutuoketako kie kengulie, Jihova puo Kepenuopfü puo zetuokecü nguketa ki themia kekra Israel kinu ta puo kitsa vorta.

¹⁰Uko Asa kedi chükelie cie kerepengou cie thekhrü seu nu Jerusalem nu kengulie.

¹¹Uko sünhie mhavakelie sekevor nunu mithu krie thenie mu tekuo nyie thenie se ruosuo chüpie Jihova tsü.

¹²Sidi uko u melou pete mu u ruopfü pete se Jihova uko pfutsanuoko Kepenuopfü pfhülietuoü di kediekhokelie puo chüwa.

¹³Sidi themia kehoupuorei Jihova Israel Kepenuopfü pfhü mvüta ro, puo thuo nhicu rei phichü rei, thenu morei thepfu shierei dukhriwa zotuoüwata.

¹⁴Ukoe Jihova ki shie peto seshü, ketsükhou mu chükiako se di rüseshü.

¹⁵Siro Juda pete rüse süu u nei, uko u melou pete se di rüse zokecü la, uko puo pfhü nyü bei di pfhü zo, mu uko bu puo ngulie, siro Jihova kerülei khapie uko tsü vo u khie u mhou rei sashü.

¹⁶Kediu Asa-e puo zuo Maaka bu zorei kedi krüpfü chü mota, puo Ashera miarhi kerütsecü puo chükeshü la. Asa-e miarhiu duthewa, biephrophawa, di Kidron rü nunu süu thewa.

¹⁷Derei Israel nunu thechü kerükrieko we biewa mo, siürei Asa puo kerheichie puo nou puo pejokecü ba mo.

¹⁸Tsiu puo Kepenuopfü kiu nu puo puo vie mu puo thuo puo vie khashütuoü di pushüwaketa mhaphra, rakachü, suna mu mhakhouko se vorshü.

¹⁹Siro Asa kedi chükelie cie serepengou mhodzü we terhü chü mo zolie.