Read Angami Naga Seyiedze Kenieu 16 Bible Online

Seyiedze Kenieu 16 - Angami Naga bible

Seyiedze Kenieu 16

¹Asa kedi chükelie cie seresorou cie Israel kediu Basha-e Juda petsou sie di Rama chülie, süusü miapuorei bu Juda kediu Asa ki vo morei vo molieketuo la.

²Sitse Asa-e Jihova ki nunu mu kediu ki nunu rakachü mu suna chülie di süko ketsepie Siria nu kediu Ben-hadad, Damaska nu lhou tuoyakezhau ki shü di pukecü,

³“Avu donu kepfhekhokelie puo balie khe, a puo mu n puo unie donu bakecü tuoi di; a rakachü mu suna ketsepie n tsüshüzhie; no vo di Israel kediu Baasha n nie kepfhekhokebau vawacie, puo bu a kinu nu laketa chülieketuo la” sita.

⁴Sitse Ben-hadad-e kediu Asa pfhe rünyülie di chüpahi mhokezhako ketseshü di uko bu Israel nadiko petsou vor. Sidi ukoe Ijon, Dan, Abel-maim, mu Naftali nu mhanya khapie bayakezha nadiko pete penyülie.

⁵Siro Baasha-e süu sikeshü ki, Rama chü sa mota, di puo mhatho khawa.

⁶Sitse kediu Asa-e Juda pete lielie, sidi uko Rama tsieko mu seiko pete, Baashae se mhachükeba kinyieko pete se vo Geba mu Mizpa chülie.

⁷Süteiki ziemho nguyakezhau Hanani kediu Asa ki vor di sie puo ki, “No Siria kediu peleta di n Kepenuopfü Jihova pele moketa la, Siria rüpfhünuoko n ki nunu tate.

⁸Ethiopiako mu Libiako rüpfhünuoko zha phi mu uko guragariko mu gura chüpahiko krathor mo me? Derei no Jihova pelekelie la puo süko kha n dzie nu shüshü.

⁹Jihova mhi sü kijü peteu ngu baya, sidi u melou se puo gei diethokethamia chüpekuoshütuoü baya. No hau nu mhalekemo puo chüwate; cüsie tsieyawinu no sü terhü chüvütatie” sita.

¹⁰Sitse Asa ziemho kenguu gei puo neimota, di puo phi kekhawa di puo bu kediekinu bata, puo mha hau la puo gei puo noumeyieketa la, siro Asa süu va themia huo rei pechü sata.

¹¹Asa mhathoko therie nunu thela ketso Juda mu Israel kediko dze dau nu tuo.

¹²Puo dikelie cie serethepfü cie Asa-e puo phi kechü puo tuota, mu puo kechüu reta derei puo puo kechü nu rei Jihova pfhülie mo di darukesiko pfhüta.

¹³Tsiu Asa dikelie cie hiediaepuokrü cie siata di puo pfutsanuoko ze zhüta.

¹⁴Puo David rünau nu puo thuo puo la mekhru puo kepie kezhüu nunu puo khruwa. Mia puo khapie mhare kevi chüyakezhamia do se di mhare neiünei khapiekezhü mopiera puo gei shü; sidi uko puo kerhu nunu mi chü seshü.