Read Angami Naga Seyiedze Kenieu 17 Bible Online

Seyiedze Kenieu 17 - Angami Naga bible

Seyiedze Kenieu 17

¹Puo nuou Jehoshafat puo sounu kedi chülie, sidi Israel perhieketuo la puo thuo puo chü kemeteilie.

²Puoe chüpahi pie dahou keba Juda nadi peteko nu balie, siro puo puo Asa liekelie Efraim rünako nu rei sa.

³Jihovae Jehoshafat zetuo, puoe puo puo zho[12] kerieki mhietuokelie la; puoe Baalko pfhüta mo,

⁴derei puoe puo puo Kepenuopfü pfhülie di puo diekhakeshüko zelie mu Israel zhoko ze molie.

⁵Süla Jihova kedi kesepie puo dzienu shü, siro Juda pete thekhruo se Jehoshafat ki vor, sidi puo kinyi mu therhu ngu philie.

⁶Puo meloue Jihova chako nu thepfutuolie. süsie rei puoe Juda nu thechü kerükrieko mu Ashera-u biewa.

⁷Puo dikelie cie se cie puo kezhako, Ben-hail, Obadia, Zekaria, Nathanel mu Mikaia hako bu Juda nadiko nu pethatuoü di ketseshü.

⁸Siro uko ze kevo Leviko liro, Shemaia, Nethania, Zebadia, Asahel, Shemiramoth, Jehonathan, Adonija, Tobija, mu Tob-adonija mu Levi hako ze di Elishama mu Jehoram zievonie rei sa.

⁹Ukoe Jihova zho leshüdau se ketuo la Juda nunu petha; uko Juda nadi pete nu rühou vo di themiako donu pethashü.

¹⁰Siro Juda khieümhou keba kijüko pete gei Jihova kepreiu bata, di uko Jehoshafat ze terhü puorei chü mo.

¹¹Filistinko huo mha se vor Jehoshafat tsü mu thekhruo rei rakachü se vor, siro Arabko tekuochü nyie thenie di krie thenie, mvüdo nyie thenyie mu krie thenie se vor puo tsü.

¹²Jehoshafat-e rüli di zhasieta. Puoe Juda nu dahouko mu mhanya khapie keba nadiko chülie.

¹³Sidi puo Juda nadiko nu mha ba phita. Puoe rüpfhünuo, terhümiavimia pie Jerusalem nu bawa.

¹⁴U pfutsanuo kikru le di uko phrükecü hamhie: Juda nu nyie mho kekhakezhako: kezhau Adna, themia kekuo kethepfu nyie krie se mho ba,

¹⁵puo sieso-u, kezhau Jehohanan-e mia nyie krie kenie di hiethetha mho ba.

¹⁶Puo so-u Zikri nuou Amasia, Jihova la mhachüshütuoü di puo thuo parkelieu, terhü kethepfuko mia nyie krie kenie ze ba.

¹⁷Benjamin nunu Eliada, terhü nu kethepfu puo, theü mu pezhü kepfü mia nyie krie kenie sa,

¹⁸mu puo sieso-u Jehozabad, terhü la mia nyie krie puo di hiethetha sa.

¹⁹Hako kediue khapie Juda pete nu kuda nadiko nu kebako tsü geinu kediu lietho la bakecü themiako.