Read Angami Naga Seyiedze Kenieu 18 Bible Online

Seyiedze Kenieu 18 - Angami Naga bible

Seyiedze Kenieu 18

¹Siro Jehoshafat-e kinyi mu therhu ngu philie, mu puoe kishükiya geinu Ahab ze vitho chütuoü rhülie.

²Teicie huo sie puo Samaria nu Ahab ki tsu, sitse Ahab-e tekuo mu mithu kekra, puo mu puo ze ketuoko la dukhrishü di puo bu kho Ramoth-gilid perhienuta.

³Israelko kediu Ahab-e sie Juda kediu Jehoshafat ki, “No a ze Ramoth-gilid nu votuo me?” si. Sitse puo puo die kela di sie, “A n ze tuo zo, a themia sü n themia zo. Hieko terhü hau nu n zetuotuo”

⁴Derei Jehoshafat-e Israel kediu ki, “Jihova dieu ketso periecie” sita.

⁵Sitse Israel kediue siedzekesimia krie dia kie kengulie di uko ki, “Hieko bu Ramoth-gilid perhie votuo mo, a bu kege se batuo ga?” sishü. Sitse ukoe sie, “Kholie, Kepenuopfü süu khapie kediu dzienu shütuoükeba la,” sita.

⁶Derei Jehoshafat-e sie, “Hakiha úko bu ketsolie kevi Jihova siedzekesi kekrei ba mo me?” sita.

⁷Sitse Israel kediu sie Jehoshafat ki, “Tsierei uko puo kinu Jihova medo ketsolie kevi puo baluo, süu Imla nuou Mikaia; derei a puo ngumecülie, puo mhakipuorei a dze kesuo sie kevi puorei chüketuo puya mo zocü la” sita. Sitse Jehoshafat sie, “Kediu bu sikecü puta hiecie” ishü.

⁸Sitse Israel kediue kezhamia puo kielie di puo ki, “Imla nuou Mikaia ze mhai vorliecie” sishü.

⁹Hameseki Israel kediu mu Juda kediu Jehoshafat unie unie kedi pfhenei se kerütsopfü di kediba gei ba; mu unie Samaria nu kele kharuu tie sienu ba; mu siedzekesiko pete unie mhodzünu nu siedzekesidie pu ba.

¹⁰Tsiu Kenana nuou Zedekia-e thegipie puo kia chülie di sie, “Jihova hakemhie di puya. Hako se di nieko Siriako pekawa kemochie uko khoutuo zotuo.”

¹¹Siro siedzekesi kekreiko pete rei sicü pu di sie, “Ramoth-gilid nu kho di kuoliecie, Jihova süu khapie kediu dzienu shü zotuo” sita.

¹²Süsie Mikaia kietuoü di voketa chalieu puo ki, “Mehoshücie, siedzekesiko pete die puo chü di kediu dze pu pevi phrete, n die rei bu uko mia puopuo die tuoi di kevi pushü üthienyü” sita.

¹³Derei Mikaia sie, “Jihova rheiketuo tuoi, a Kepenuopfü kedipuo putuo shi, a we süu pu zotie” sita.

¹⁴Sidi puo kediu ki vor tse, kediu sie puo üse, “Mikaia, hie bu Ramoth-gilid nu vo terhü chütuo mo, a bu kege se batatuo ga?” si. Puoe la sie, “Kho di kuoliecie, uko khapie n dzienu shü zotuowe” sishü.

¹⁵Derei kediu sie puo ki, “A n bu Jihova za nunu dietho-u rübei sie mhakekrei puo rei pu hienucü va kitsuo n ki putuo ga?” sishü.

¹⁶Siru Mikaia lasie, “A kijüthouko gei Israel pete kezakezipfü tekuo u kepfhe kejüko tuoi tuocü ngu; mu Jihovae sie, ‘Hako u niepu tuo mo; mia puopuocü bu mene di u kinu votacie’ siyalie” sishü.

¹⁷Sitse Israel kediue Jehoshafat ki, “Puoe keka zo moro a dze kesuo sie a dze kevichüketuo pu lho zocü a pu mo me?” sita.

¹⁸Sitse Mikaia sie, “Süla Jihova pfhe rünyüliecie: A Jihova puo kediba gei ba di ngu, siro teigei ketuo krodiko pete puo zatsa mu puo vitsa thacü ngu.

¹⁹Mu Jihova sie, ‘Supuo Israel kediu Ahab meshü ze Ramoth-gilid nu kho di puo bu krüta tuo ga?’ Sitse mia puo mha puo pu mu kekrei puo mhakekrei puo puputa,

²⁰sidi ruopfü puo par di vo Jihova mhodzünu thalie di sie, ‘A puo meshülie tuo’ sishü kemochie. Sitse Jihova puo ketso di sie, ‘Kimhie di ta?’

²¹Ru puo lasie, ‘A vo di puo siedzekesiko, pete tienu ketijü ruopfü puo chülietuo.’ Sitse Jihovae sie, ‘No puo meshülietuo mu no chü toulietuo; volie di süu chülie.’

²²Süla harie, Jihova ketijü ruopfü puo khapie n siedzekesi hako tienu shüshüte; Jihovae n pekawaketuo zho puo khashüte” sishü.

²³Sitse Kenana nuou Zedekiae Mikaia ki phir di puo dzo vüshü di sie, “Jihova ruopfüu kedipuo cha ze di a pfüthe vo n rüchü ga?” sita.

²⁴Sitse Mikaia lasie, “Noe kinutshekou vo kibou puo nu rüshütuoü kesie nhie ngulietuo” sishü.

²⁵Süsie Israel kediu diekhashü di, “Mikaia teliecie, di puo ze nadi nu kezhau Amon mu kediu nuou Joash ki volie.

²⁶Sidi sie, ‘Kediu hakemhie puya: Themia hau bu kediekinu batalie, niekhrüda mu dzü kha petsase pie puo tsülie, a mene di la vorlie kemochie’ ” ishülie.

²⁷Sitse Mikaia lasie, “No vi di la vorlie üro, Jihova a geinu die pushü mota zo” sishü. Sitse puo sie, “Themia pete rünyüshücie” sita.

²⁸Süla Israel kediue mu Jehoshafat Juda kediu Ramoth-gilid nu kho,

²⁹Israel kediu Jehoshafat ki, “A rüyachü nu a chüpekreipfü di letuo, derei nowe n thuo n kedi pfheneiko se zolie” sishü. Sidi Israel kediu puo chü pekreipfülie, sidi unie rüyachü nu vo.

³⁰Tsiu Siria kediu puo guragariko mhokezhako ki, “Kecü rei kezha rei whuo hie, derei Israelko kediu rübei rülie” ishü.

³¹Guragari mhokezhako Jehoshafat ngu tse, uko sie, “Luuha Israel kediute” si. Süla uko puo ze kegei tuoü di rürei vor, sitse Jehoshafat melieshü, ru Jihova puo khruohilie. Ukepenuopfü puo kinu nu uko teshüze lata.

³²Guragariko mhokezhako Israel kediu motacü ngu tse, uko puo whuosa mo di lata.

³³Derei mia puo puo theü gapie cieshü mu tuoü mo di vo Israel kediu rünyieko mu puo merükeyau tiema nu le vatouwata; süla puo gari keseu ki, “Rüreilie di rüyachü nunu a toupfü tatacie, a rüzaliete mu” si.

³⁴Sünhie terhüu re seta, mu Israel kediu puo gari geinu doupfü di Siriako meho ba thevatie tso; sidi puo niaki kele ki siata.