Read Angami Naga Seyiedze Kenieu 19 Bible Online

Seyiedze Kenieu 19 - Angami Naga bible

Seyiedze Kenieu 19

¹Juda kediu Jehoshafat-e ketsopfhü dzü mo di puo thuo puo ki Jerusalem nu la vorlie.

²Derei Jehu siedzekesiu Hanani nuou puo ze kesetuoü par di sie puo ki, “Noe kerüzhüko khruohi mu Jihova mecüyakezhako n neikecü mese me? Mha hau la Jihova nouyieu n gei pfüte ho.

³Siürei n geinu mhakesi puo ngulie, süusü no kijüu nunu nanyü seiko[13] pejüwa di n melou se Jihova pfhüliete” sita.

⁴Jehoshafat-e Jerusalem nu lhouta; mu puo themiako Beersheba nunu Efraim kijükhru rünako ketso nunu vo uko ze la vor uko puonuoko Kepenuopfü Jihova ki lashülie.

⁵Puoe Juda kijü nu dahou chüpfükeba nadiko nu capiko bu baketuo kedalie.

⁶Sidi sie capiko ki, “Nieko mha kikecüpuo chü ba shi le menuoliecie, niekoe themia la mo di Jihova la capichüketuo la, nie mha pepikecü ki puo nieko ze ba zo.

⁷Süla tsie Jihova kepreiu bu nie gei balie; nie mhatho nu menuo zolie, Ukepenuopfü Jihovae puotoukemo, morei puo nei si kreikecü morei theso liekecü baya mo ho” sishü.

⁸Süsie Jehoshafat-e Jerusalem nu Leviko mu zievoko tsiu Israel kikruko nu thekrüko bu Jihova la dienyako pepikecü chüketuo kedalie, uko Jerusalem nu uko ba baya.

⁹Puoe uko ki pu bei di sie, “Nieko hamhie di mha chütuo, Jihova keprei, dietho mu nie melou pete se di.

¹⁰Nie siezedzüriemia huo thezie kepekru nyie morei thezho morei zenu keshüko, nanyü zhoko la nie pfhü vorcü ki, nie uko pethashülie di Jihova mhodzü kejochüwa mo, mu noupfhü bu nie gei mu nie siezedzürieko gei vor mokelie chülie. Nieko hakemhie chülie, siliero nie jo molietuo.

¹¹Siro harie, Jihova zho peteko nu la phichükezhau Amaria bu nieko mho ba, mu kediu nyietsa peteko la Ishmael nuou Zebadia, Juda kiko mho kezhau bu ba; siro Leviko bu kezhako chü di nieko mehotuo. Thepfu di mhachülie, mu Jihova bu kemezhümia zetuolie üthienyü!” sishü.