Read Angami Naga Seyiedze Kenieu 2 Bible Online

Seyiedze Kenieu 2 - Angami Naga bible

Seyiedze Kenieu 2

¹Solomon-e Jihova zau la rüsuoki puo, mu puo thuo puo la kediki puo chüketuo rhülie.

²Sidi Solomon-e mia nyie hiethenie bu thepieko toukepfü mu kijükhruko geinu ketsie bieketuo la mia nyie hiethetha, siro süko mhatho kemeho la mia nyie se di krie sorou khapie balie.

³Süsie Solomon-e Tur kediu Huram ki die ketseshücü, “No va puo a puo David gei chükeshü, puo bu puo ki chüketuo la sedar sei ketsekeshü tuoi di a la rei chüshücie.

⁴A tsie Jihova a Kepenuopfü za la ki puo chüketuo mu süu chükemesa pie puo tsü di puo mhodzünu mharekethengu the, mu se mia kepekie niekhrüdau ruosuo chü sei baketuo, siro khise rei thevatie rei kethe ruosuo kechü, sabat mu khrüsako mu Jihova hie Kepenuopfü la chieseketuo thenyiko, Israel la chü sei tuoketuoko chüpie puo tsütuoüzhülie.

⁵A ki puo chütuoükezhüu zha zotuo, hie Kepenuopfü sü terhuo peteko ki zhakecü la.

⁶Derei supuonie ki puo chüpie puo tsülie vi ta? Teigei, teikerükrietho-u zorei puo khapie balie kenjü ze. A sü supuo di puo mhodzünu mharekethengu thepie rüsuokeshü puo chükeshüu moro ki puo chüpie puo tsülie vituo dimu?

⁷Süla no tsie suna, rakachü, merenyi mu thegi mu pfhe kemege, merieteikecü, mu teichü kemhiepfü chü kesimia, mha kekecüthoko si sekecümia bu a puo David kese seketuo mhachükesiko a ze Juda mu Jerusalem nu kebako ze baketuo themia ketseshücie.

⁸Süsie rei Lebanon nunu sedar, saipres mu algum kinyie rei ketseshüyi, n kituoko Labanon nu kinyie liesiyakecü a sikeba la. A kituoko bu n kituoko ze mhachütuo,

⁹a la kinyie kese phiketuo la, a chütuoü keba kiu zha mu u ngo zotuo.

¹⁰N kituomia kinyie du ketuoko la a thou rha nyie mepfü, barli lha rha nyie mepfü, khubezu sü nyie mepfü mu tier sü nyie mepfü khashütuolie” sishü.

¹¹Sitse Tur nu kediu Huram leshü puo thupie Solomon die kelashü di sie, “Jihovae puo themiako khriekecü la n chüpie uko mho kedi chüshüte” si.

¹²Siro Huram pu sacü, “Jihova Israel Kepenuopfü, tei mu kijü chükeshüu bu theja kepfüu chücie, mhakesi nuo puo khapie kediu David tsüshü, puo bu mhakele mu puocapuola sikelie se Jihova la rüsuoki puo mu puo thuo puo la kediki puo chütuoüliete.

¹³“Ae mhachükesi, mhacamhala kesi,

¹⁴Dan nuopfüko miapfü puo nuou, puo puoe Turmia, Huram-abi ketseshü ho. Puoe suna, rakachü, merenyi, thegi, ketsie mu sei, siro pfhe kemege, keloshü, mu kemerie mu linen kemese se mhachü si, mhakekecü thoko, mharhi kehoupuorei puo bu chünukeshüu chülieketuo themia puo, n liethoko mu a niepuu n puo David liethoko ze di mha chülie kevi puowe.

¹⁵Süla thie a niepuu pukeshü ki ze di thou, telha, tier mu khubezuko ketseshü puo kituoko tsüshücie.

¹⁶Hieko Lebanon nunu nie liekenyü de kinyie dulie di dzükezha nunu se vo Jopa nu shü di nieko bu sünu nu se Jerusalem nu volietuo” sishü.

¹⁷Süsie Solomon puo puo David-e themia phrükewa sie nu Israel kijü pete nu chazoumia ketuoko phrü, mu mia nyie krie puo di hiepengouese di krie sorou ngulie.

¹⁸puo uko mia nyie hiethenie bu thepie pfüketuo chüshü, nyie hiethetha bu kijükhru gei ketsie bieketuo, mu nyie se di krie sorou bu mhatho themiako kemeho chüketuo kedashüwa.