Read Angami Naga Seyiedze Kenieu 20 Bible Online

Seyiedze Kenieu 20 - Angami Naga bible

Seyiedze Kenieu 20

¹Mha hau sie Moabko mu Ammonko siro Meunko[14], huomia sa di Jehoshafat ze terhü chütuoü vor.

²Dieliemiako[15] vor Jehoshafat ki, “Themia krodi puo Edom[16] nunu mu dzükezha khie lu tsatienu n perhietuoü vor bate, süko tsie Hazazon-tamar (En-gedi üya cüu) nu vor bate” sishü.

³Sitse Jehoshafat michieta; sidi puo thuo Jihova pfhütuoüta, tsiu Juda pete bu mevo balienukecü pesishüwa.

⁴Siro Judae Jihova kekhruohi pfhütuoü di vo kengulie; Juda nado pete nunu Jihova pfhütuoü di vorlie.

⁵Sitse Jehoshafat-e Juda mu Jerusalem kehouu metsuo nu thalie, kiu kitiezha kesau mhodzünu,

⁶sidi sie, “He-i Jihova, hie pfutsanuoko Kepenuopfü, no teigei Kepenuopfü mo me? No seyie pete nu kedi peteko mho di ba mo me? Miapuorei n mhodzü thalie kenjü zokecü kekuo mu kezha ba mo me?

⁷Harie Kepenuopfü no n themia Israelko mhodzünu nu kijü haunu lhoukevorko whuowa di süu khapie n khrietho-u Abraham nuonuoko bu se seituota moü me?

⁸Ukoe sünu lhou vorliete, sidi n za la kemesa chü puo chüpie sünu shülie di pukecü,

⁹‘Mhanuü kepeka, zhiecha, ketsokecü morei thesa, morei pekriekecü hie gei vor ro, hie ki hau mhodzünu mu n mhodzünu thatuo, n zae ki hau nu bayacü la, sidi hie hie mezhie nu n ki rükhruoshütuo, siro no sielie di kelashütuo.’

¹⁰Siro harie tsie Amon mu Moab mu Seir kijüthou themiako, no uko bu Israel Ijipt kijü nunu parkelie ki, uko whuo molieketako mu uko therhieta di peka mokelieko;

¹¹uko vor di no kha hie tsü di hie bu wekelieko, n rüvie nunu hie whuokeshü üse hie zhakhra chüshütuoü vorzhie.

¹²Harie hie Kepenuopfü, no uko gei ketsokecü khashü lho me? Hie we hie petsou vorkezhü krodi hau mhodzünu hie kekuo jü zokecü la. Hie kedipuo chütie shi si mote, derei hie mhiwe n gei ba zowe.”

¹³Sikeba ki Juda themia peteko u nuonuo kecünuoko, u nupfünuoko mu u nuonuoko ze di Jihova mhodzünu tha.

¹⁴Sitse Jihova ruopfüu Zekaria nuou Jahaziel gei vorlie, Benaia nuou, Jeiel nuou, Matania nuou Asaf nuonuoko donu Levimia puo, kehou kro-u donu tha.

¹⁵Sidi puo sie, “Juda mu Jerusalem nu lhouketuoko mu kediu Jehoshafat, rünyüliecie: Jihovae hikecü se nie ki puya; ‘Michie hie morei krodi hau la nie nou thachüta hie; terhüu nie vie mo derei Kepenuopfü vie zocü la.

¹⁶Sodu tsu di uko ze kegeicie, ukoe Ziz Khru gei khortuo ho; nieko razhau tienu Jeruel tsau niathutsa nu uko ngulietuo.

¹⁷Terhü hau nu nieko bu uko ze kebielie lho; nie tha nu thalie, mu sei pfüthalie, sidi nie la Jihova kuokelieu ngushücie, harie Juda mu Jerusalem.’ Michie hie morei nie nou thachüta hie; sodu pra uko ze keperhiecie, mu Jihova nieko zetuo zotuo ho” sita.

¹⁸Sitse Jehoshafat-e tsu kijü zerepfü zhüta, mu Juda pete mu Jerusalem nu kelhouko Jihova mhodzünu tetsu zhülie di Jihova rüsuota.

¹⁹Siro Leviko, Kohat mu Kora yieko u pfhe peto se di Israel Kepenuopfü Jihova tshetuoü di siethata.

²⁰Süsie uko khiserüna sielie di Tekoa rayhanu volie, mu uko vo kezhü ki Jehoshafat tha zolie di uko ki, “He-i Juda mu Jerusalem nu kelhouko, a pfhe rünyüshücie! Nie Kepenuopfü Jihova pele zolie sitse puo nie piesieshü zotuo; puo siedzekesiko pelelie, siro nie chü toulie zotuo” sishü.

²¹Sidi puo themiako ze kevasikelie sie, puo kemesa pfhenei se di Jihova ki chieli mu puo tsheketuoko kedalie, mu ukoe rüpfhünuo mhodzü tuo vokezhü ki pukecü, “Jihova thezieliecie, puo kekhrie rüdiya kemo-u ba seiyacü la” ituo.

²²Sidi uko keli mu ketshe chü vü tse Jihova huomia bu rüshü vo Ammon, Moab mu Seir kijüthougei themiako, Juda petsou vorkezhüko chadze ba di uko bie tseiwa.

²³Ammon mu Moabmiakoe Seir kijüthou themiako ngumvü sieta di uko peka lotsowa; siro uko Seir gei kelhouko biepejü thewa tse uko thuo huoniehuo peka lata.

²⁴Judae nhatsa nu rükhouki kerükrieu nu vorlie di themia krodiu kitsa mehoshü tse, kijü kesiamo thuo zhü zo vota; miapuorei talie mo zo.

²⁵Jehoshafat mu puo themiako uko nyako bielietuoü di vo tse, kiriko kekra, mhanya, pfhemenei, mhamakereko ngu philie, uko süko pfü salie kenjüta kemochie u thuo chülielieta. Mha krathorkecü la uko zha se vakelieko ketabata.

²⁶Zha dia nhie uko Baraka razhau nunu kengulie, uko sükisü nu Jihova tsheshü; sikecü la thie ketsorei thechü süu za üse Baraka[17] razhau ütuote.

²⁷Sidi uko la vorlie, Juda mu Jerusalem themia kehoupuorei, Jehoshafat bu uko tsüu chü di u nei phi di Jerusalem nu la vorta, Jihova uko bu uko ngumvüko mho u neikelie chükeshü la.

²⁸Uko übouko mu ketsüko se di Jerusalem nu Jihova kiu nu vorlie.

²⁹Jihovae Israel ngumvüko ze kegeitaücü sikelie ki kijüko nu kediko gei Kepenuopfü kepreiu bata.

³⁰Süla Jehoshafat kedirüvie nu kemekrie balie, puo Kepenuopfüe kerülei khapie puo khieümhou pete tsü keshü la.

³¹Siro Jehoshafat-e Juda mho kedi chü. Puo kedi chüvücü ki puo kelhouzha cie serepengouta mu puo Jerusalem nu cie mepfüepengou dilie, Puo zuo zae Azuba, Shilhi nuopfü.

³²Puoe puo puo Asa chanu tuo zolie; di puo süu nunu rüreita mo zolie; puo Jihova mhingu ki mezhüükecüu chülie.

³³Thechü kerükrieko zowe biewa mo ba zoluo; themiako u melou khapie uko pfutsanuoko Kepenuopfü tsülie moluocü la.

³⁴Jehoshafat mhatho kekreiko, therie nunu thela ketso Hanani nuou Jehu dze kethu dau nu thupietuo, süko Israel kediko leshüdau nu tuoya.

³⁵Hau sie Juda kediu Jehoshafat, Israel kedi Ahazia, mhakesuokechüu unie kezeta.

³⁶Puo süu ze di Tarshish nu voketuo la rouko chü, di unie-e Ezion-geber nunu rouko chü.

³⁷Sitse Mareshamia Dodavahu nuou Eliezer-e Jehoshafat petsoukecü siedzekesidie pu di sie, “Noe Ahazia zetacü la, Jihova no chükelieu bierhuowatuo” sishü. Sitse rouko suota di Tarshish nu volie suota.