Read Angami Naga Seyiedze Kenieu 21 Bible Online

Seyiedze Kenieu 21 - Angami Naga bible

Seyiedze Kenieu 21

¹Jehoshafat puo pfutsanuoko ze zeta di David nadiu nunu puo pfutsanuoko ze di puo khruwa, sidi puo nuou Jehoram puo sounu kedi chülie.

²Puoe puo siezemia Jehoshafat nuonuo kekrei nyi: Azaria, Jehiel, Zekaria, Azaria, Mikael mu Shefatia hako Juda[18] kediu Jehoshafat nuonuo phre.

³Uko puou mha kekra khapie uko tsüshü, rakachü, suna mu mhamakere vieko, süsie rei nadi kezha dahou kebako sa; derei puo kedirüvie se Jehoram tsü, puoe nuorieucü la.

⁴Jehoram-e puo puo kediba gei sielie di puo keselieta tse, zhiecha üse puo siezeko pete dukhriwa, siro Israel kezhamia huo rei sa.

⁵Jehoram kedi chükelie ki puo kelhouzha cie serekenieta, mu puo cie thetha Jerusalem nu dilie.

⁶Puoe Ahab kinuko tuoi, Israel kediko chau ze vota; Ahab nuopfüe puo kimiacü la. Tsiu puo Jihova mhodzünu suoücüko chü.

⁷Siürei Jihovae David ze kediekhokewau la David kiu bie pesuowa nyü mo, puoe mitoubou puo khapie puo mu puo nuosenuoyieko bu se rei tuotuoü di phrashükewa la.

⁸Puo teiki Edom-e Juda kedi khrotuo lhoü di petsou sierta di uko thuo uko kedi pesielie.

⁹Sitse Jehoram puo nyiemho kezhako mu puo guragari keseko zelie di tuoshü. Puoe theva nu vo puo mu puo guragari keseko houpfükeba Edomko ze kebieta.

¹⁰Süla thie ketso rei Edomko Israel kedi ngumvütuoya zo. Süteiki Libna rei puo kedi khro ba mvüta, puoe puo puo nuoko Kepenuopfü Jihova khawaketa la.

¹¹Sizomonyü puo Juda kijükhru rünako nu thechü kerükrieko chüshü di Jerusalem nu kelhouko meshüpie uko bu mezhükemo nu shü, mu Juda bu rütsita.

¹²Tsiu siedzekesiu Elija kinu leshü puo puo ki vor di pukecü “N puo David Kepenuopfü Jihovae hikecü puya; No n puo Jehoshafat chanu morei kediu Asa chanu tuolie mo.

¹³derei Israel kediko chanu vote; sidi Juda mu Jerusalem nu kelhouko bu mezhükemo nu voketa la, Ahab kinuko Israel bu mezhükemo nu voketa tuoi, siro no n siezeko, n puo kinuko n ki vikuocüko dukhrikecü la;

¹⁴harie, Jihovae thepe kezha puo se n themiako gei, n nuonuo, n nupfünuoko mu n vie peteko gei vortuo,

¹⁵mu no n thuo rei n la kechü kere se puo ngulie di n va nu kebako rüla parta kemochie teisonhie kechüu pfü batuo” sita.

¹⁶Siro Jihovae Ethiopiamia[19] khiekikeba Filistinko mu Arabko nou chüpie Jehoram gei u noumeyie sieta.

¹⁷Sidi uko bu Juda whuo vor puo vie valie, sidi kediu kinu vienyako pete chüsetuota, puo nuonuoko mu puo nupfünuoko rei sa, puo nuo nhicutho-u Jehoahaz kemosie nuo puorei peshashü puo tsü mo zo.

¹⁸Mha hako pete sie chüpevilie kelho kechü puo Jihovae khapie puova nu shükecü se puo vü.

¹⁹Sizotuo di cie kenie sie, kechüu la puova rüla parta, mu puo rei kemezhie phi di sia. Puo themiako puo kerhu nunu mi puo rei petushü mo, puo pfutsanuoko la mi petushüyakezha mhiecü.

²⁰Puoe kedi chüliecü ki cie serekenieta, mu puo Jerusalem nu cie thetha kedi chülie, siro puo siaketa rei miapuorei rünoumota mo. Mia David nadiu nunu puo khru, derei kediko mekhru nunu mo.