Read Angami Naga Seyiedze Kenieu 22 Bible Online

Seyiedze Kenieu 22 - Angami Naga bible

Seyiedze Kenieu 22

¹Süsie Jerusalem nu kelhouko puo sounu puo nuo nhicutho-u Ahazia bu kedi chülie, Arabko ze kevor kro-u puo nuo thepfu phichüko pete dukhriwaketa la. Süla Juda kedi Jehoram nuou Ahazia kedi chüta.

²Ahazia kedi chüliecü ki cie hiediaekenieta, mu puo Jerusalem nu cie puo kedi chülie. Puo zuo za Athalia, Omri tsupfü puo.

³Puo rei Ahab kinuko chau zeta, puo bu mha kesuo chükecüko nu puo zuoe puo hüya kezhapfü zocü la.

⁴Puoe Jihova mhi ki suoücüko chü, Ahab kinuko chükewa mhie di, puo puo se sie, sükoe puo hü di puo biepesuowa.

⁵Puoe uko do rei medzita, sidi Israel kediu Ahab nuou Jehoram ze di Ramoth-gilid nunu Siria kediu Hazael ze terhü chütuoü vo. Sitse Siriako Joram bie kerüzawa.

⁶Siro puo Rama nu Siria kediu Hazael ze kegei di rüzakelieu chüpeviwatuoü di Jezril nu la vor. Siro Juda kediu Jehoram nuou Ahazia, Ahab nuou Joram vasituoü di Jezril nu tsu, puo suobacü la.

⁷Derei Jihovae kese se kebau Ahazia bu tetsutaketuou sü puo bu Joram mehotuoü vokezhü ki nu tuoü ba. Puo Jehoram ze di Nimshi nuou Jehu, Jihovae puo bu Ahab kinuko pekashütuoü di keda se kebau ze kesetuoü par.

⁸Siro Jehue Ahab kikruko pejokewa siazhau khashü kevo ki, puo Juda kezhako mu Ahazia siezedzürieko theke kebako ngu tse puo süko dukhriwa.

⁹Puoe Ahazia pfhü, ru puoe vo Samaria nu rüshü ba di puo telie, sidi puo ze Jehu ki vor, sitse puo dukhriwa, ukoe puo khruwa, uko sie, “Puoe Jehoshafat tsuu zo, süuwe puo melou pete se Jihova pfhü zo” idi pucü la. Sidi Ahazia kinumia miapuorei kedi seliekevi tuo mo zota.

¹⁰Ahazia nuo zuoe Athalia sü puo nuou siaketa ngu tse, puo thuo sie Juda kinu kedi kinuko pete pekawatuoüta.

¹¹Derei Jehoshabith, kediu nuopfüe Ahazia nuou Joash chüpielie, di kedinuonuoko dukhriwatuoü keba nunu süyo rügulie, di süyo mu puo thekepfü unie khapie thezhübou puo nu bawa. Hamhie di Jehoshabith, kediu Jehoram nuopfü mu zievo-u Jehoiada kimia, puoe Ahazia üpfücü la, Athalia kinu puo keviewa di süpfü bu puo dukhriwa molie.

¹²Siro puo unie ze di cie sorou Kepenuopfü ki nunu rüshü bata; süki Athaliae kijüu nu kedi chü ba.