Read Angami Naga Seyiedze Kenieu 23 Bible Online

Seyiedze Kenieu 23 - Angami Naga bible

Seyiedze Kenieu 23

¹Derei cie thenie cie Jehoiada thepfulie di krie mhokezhako Jeroham nuou Azaria, Jehohanan nuou Ishmael, Obed nuou Azaria, Adaia nuou Maaseia mu Zikri nuou Elishafet hako ze kepfhekhokecü puo chülie.

²Sidi ukoe Juda pete nu vo di Juda nadoko nunu Leviko pfhü kengulie, siro Israel kikruko nu thekrüko, zelie di uko Jerusalem nu vorlie.

³Sitse kehou pete Kepenuopfü kiu nunu kediu ze kediekhokelie puo chü. Siro Jehoiada sie uko ki, “Harie kediu nuou sü! Jihovae David nuoko dze le di phrakeshü tuoi, puo bu kedi chüliecie.

⁴Nieko mha hau chütuo: nieko za se za puo bu zievoko mu Leviko sabat nhie mhathochütuoü kevor ki kicieko pfhepfhetuo,

⁵mia za se za puo bu kediu kinu batuo, mu za se za puo we Kharu Mvüdzeu nu batuo; mu themia pete Jihova kiu kitiezha nu batuo.

⁶Zievoko mu mhachüketha Leviko kemosie mia kekrei puo bu rei Jihova kinu le hie, ukoe lelie vi, uko sü mesa eru, derei themiako pete bu Jihova kepuu ze zotuo.

⁷Leviko bu kediu houpfü batuo, mia puopuokecü bu u rünyie u dzie nu se phre di, siro kehoupuorei kinu kelermia dukhriwatuo. Kediu ze ba zolie, puo lercü ki mu pracü ki” sishü.

⁸Leviko mu Juda pete zievo-u Jehoiada pukeshüko chülie; uko kehoupuorei u themia sabat nhie vor di mhachüketuoko ze vorya, mu sabat nhie u mhatho nunu lataketuoko ze voshüya; zievo-u Jehoiada-e themia kezapie kebako khawa mocü la.

⁹Sidi zievo-u Jehoiadae rüngou, siro kediu David vie pezhü kezha rei kecü rei khapie Kepenuopfü kiu nu bayakezhako chüpie kriemhokezhako tsüshü.

¹⁰Sidi puo themia pete bu kediu pfhe balie, kehoupuorei puo dzie nu puo rünyie sese di, kiu pekhrotsa nu vo pesotsa ketso, ruosuobau mu kiu houpfü balie.

¹¹Sidi puo kediu nuou ze par di keditsüre pie puo tsügei shü, sidi dietseidiekho-u[20] khapie puo tsüshü, mu uko puo pie kediu chülie, süsie Jehoiada mu puo nuonuoko puo kenheshü di uko shiekhoui di sie, “Kediu bu rheikechau chücie!” sishü.

¹²Athalia sü themiako ta vo di kediu tsheketuo pfheko sishü tse, puoe Jihova kiu nu themiako ki ler,

¹³Mu puo mehokeshü ki kediue kicieu nu co-u khieki tha, mu krie mhokezhako mu ketsükekhouko kediu khie ki tha, siro kijüu nu themia pete u nei di ketsükhou mu tsali kechüko übouko se krüta chüketha ngulie, sitse Athalia puo pfhe cierha di melie di, “Ketijü, ketijü!” situota.

¹⁴Sitse zievo-u Jehoiada krie mhokezhako bu chüpahiko mho kekhasekebako ze parlie di uko ki, “Themiako donu puo ze partalie, kehoupuorei puo siekemedzimia zhiechapie dukhriwa zotuo” ishü. Siro zievo-ue sie, “Jihova kiu nunu puo dukhri hie” si,

¹⁵süla uko u dzie pie puo gei shü ru puo kediu kinu gurako Kicieu nu leta, mu uko süki nu puo dukhriwa.

¹⁶Süsie Jehoiada puo mu themia peteko mu kediu uko donu ukoe Jihova themia chütuo zo morokesuo kediekhokelie puo chü.

¹⁷Süsie themia pete Baal kiu nu le di süu rhuowa, puo ruosuobako mu puo miarhiko biephro phawa, mu ruosuobako mhodzünu nu Baal zievo-u Matan dukhriwa.

¹⁸Siro Jehoiadae Jihova kiu la David-e Levi zievoko mu Leviko bu Jihova kiu kesenukeshü zhoko chüketuo la uko pelewata, mu Jihova ki kethe ruosuo khashüketuo, Mosa zhonu thupieketuo tuoi u nei mu chieli di David diekhakeshü tuoi chülienushü.

¹⁹Puo Jihova kiu careko nu care kepfheko bu balie di mhahuo nu mesakemo puo bu rei lerlie kelho chüwa.

²⁰Siro puo krie mhokezhako, kezhamiako, mu themia kekhayakezhako, mu kijüu nu themia pete bu kediu ze kedikiu care pesotsa kebau pfüthe di kediu kiu nu ler. Sidi uko kediu khapie kedibau gei shülie.

²¹Süla kijüu nu themia pete u neilie, siro zhiechapie Athalia dukhrikewa sie nadiu mene bata.