Read Angami Naga Seyiedze Kenieu 24 Bible Online

Seyiedze Kenieu 24 - Angami Naga bible

Seyiedze Kenieu 24

¹Joash-e kedi chüvücü ki cie thenieta, mu puo cie hiedia Jerusalem nu kedi chü; puo zuo za Zibia, Beer-shabamiapfü.

²Siro zievo-u Jehoiada teiki we Joash Jihova kengu ki puotou ücüko chü.

³Tsiu Jehoiadae puo kimia kenie pfhüshü puo tsü, mu puoe puo nuonuo thenu rei thepfu rei balie.

⁴Puotei huo sie Joash Jihova kiu ketso laketuo rhülie.

⁵Sidi puo zievoko mu Leviko kie kengulie di uko ki, “Juda nadiko nu vo di teicie puo sie puopuo idi Kepenuopfü kiu ketso laketuo la Israel pete kinu raka khruolie; mu mha hau chü rükreilie cie” sishü. Derei Leviko sü chü rükreishü mo.

⁶Süla kediu phichükezhau Jehoiada kielie di puo ki, “No kiüdi Leviko bu Juda mu Jerusalem nunu Mosa, Jihova kituo-ue dietseidiekhobou pfhekiu[21] la, Israel kehou gei thekhruo khruoyakezhau keseshülie mo ga?” sishü.

⁷Athalia, thenu kesuopfü nuonuoko Kepenuopfü kiu nu ler di Jihova kiu nu chükemesakelie vieko pete Baal la se phrewaketa la.

⁸Süla kediu pushü di uko bu labou puo chülie, di süu khapie Jihova kiu care khie ki khapieba.

⁹Süsie Mosa, Kepenuopfü kituou Israelko rayha nu ketuo ki, Jihova la thekhruopuo lietuoü keshüu se phre vorlie nu di Juda mu Jerusalem nu pesishü.

¹⁰Sitse krütako pete mu themiako pete u nei di u khruo se vor labouu nu tshuliekemochie khashü bata.

¹¹Siro Leviko bu labouu toupie kediu kezhako mhodzünu kevor metsei, ukoe sünu raka ba phicü ngu tse, kediu kinu kethuu mu zievo phichükezhau lietho-u bu vor labouu pie kemethuoshü di pie la vo puo ba nu khashüwaya. Ukoe teisonhie hikecü chü di raka kengu philie.

¹²Siro kediu mu Jehoiada süu khapie Jihova kiu mhatho keseyakezhako tsüshü, sidi sükoe Jihova kiu chüketsolaketuo la ketsie mu seimistiriko zha khrülie, thegi mu merenyi se mhachüyakezha rei sa.

¹³Sidi mhatho chütuoükelieko mhachüvü, mu ukoe kemielakecü thoko chü vota, sidi uko Kepenuopfü kiu ketso lapie puo rhiu lashülie mu chü kemeteilie.

¹⁴Süsie uko chü tseilie tse, raka peshakelieko se la vor kediu mu Jehoiada mhodzünu khashü, mu süko se Jihova kinu mhakhouko liethokechü ki mu kethe ruosuo khakeshü ki seketuo, siro kecielivüko mu suna, rakachü khouko chülie. Sidi uko Jehoiada rhei kebachie Jihova kiu nu kethe ruosuo khashü seilie.

¹⁵Derei Jehoiada tsata mu puo teisozhako tseita di siata; puo se ki puo kelhouzha cie krie puo di serta.

¹⁶Siro puo Israel nu mu Kepenuopfü la tsiu puo kiu la mha kevi chükeshü la David nadiu nu kediko donu nu ukoe puo khruwa.

¹⁷Siro Jehoaida se sie Juda mia kezhako vor di kediu kelu, mu kediu uko pfhe rünyülie.

¹⁸Sitse ukoe uko pfutsanuoko Kepenuopfü Jihova kiu khawa di Asherako mu terhuomiarhiko lie chüta. Uko kejo hau la noupfhü Juda mu Jerusalem gei vor.

¹⁹Sirei puo uko ze Jihova ki la vorlietuoü di uko ki siedzekesiko ketseshü, sükoe mha süko vikemo petsoushü zoürei, ukoe rünyü mvüta.

²⁰Sitse Kepenuopfü ruopfüu zievo Jehoiada nuou Zekaria gei vorlie; sitse puo themiako mho thalie di uko ki, “Kepenuopfü hakemhie puya: Nieko kiüdi Jihova diekhakeshüko varhuo di kruolie lho bata ga? Nieko Jihova khakewa la puo rei nieko khawate” sishü.

²¹Derei uko puo ngumvü di kedovalie, sidi kediu diekhakeshü ze di Jihova kiu kitiezha nunu ketsiepie puo vakhriwa.

²²Kediu Joash-e Jehoiada, Zekaria puou, puo gei tseiüvi kevorko rükra mota di, puo nuou dukhriwa. Sidi puo siatakezhü ki pucü, “Jihova bu ngu di khepu chüshü thienyü” sita.

²³Teicie thela ki Siriamia rüpfhünuo Joash petsou khor, sidi uko vor Juda mu Jerusalem themiako donu mu uko kezhako dukhri phrewa, mu uko mha vakelie peteko ketsepie Damaska kediu tsüwa.

²⁴Siriamia rüpfhünuo themia keduo yopuo vor zo shierei, Jihovae rüpfhünuo kezha puo pie uko dzie nu shü, ukoe uko pfutsanuoko Kepenuopfü Jihova khawaketa la. Hamhie di uko Joash pejowata.

²⁵Ukoe puo bie kerüza phishü mu puo khawa di tuota, sitse puo kituokoe zievo-u Jehoiada nuou zie la puo ngumvü di kedovalie di puo zhü geinu puo dukhriwa. Sidi puo siata; mu uko David nadiu nunu puo khru; derei kediko mekhru nunu puo khru mota.

²⁶Puo ngumvü di kedovakelieko Ammonmia Shimeath nuou Zabad, mu Moabmia Shimrith nuou Jehozabad.

²⁷Puo nuonuoko dze mu puo pejo di siedzekesi pukeshüko mu Kepenuopfü kiu chü la keshüko dze pete kediko dze dau nu thupie ba. Süsie puo nuou Amazia puo sounu kedi chülie.