Read Angami Naga Seyiedze Kenieu 25 Bible Online

Seyiedze Kenieu 25 - Angami Naga bible

Seyiedze Kenieu 25

¹Amazia kedi chüvücü ki cie mepfüepengouta mu puo Jerusalem nu cie mepfüethepfü kedi chülie. Puo zuo za Jehoadan, Jerusalemmiapfü.

²Siro puo Jihova mhinguki puotoucüu chü zo, derei puo nou ketho chü mo.

³Siro kedi kekuou puo dzie nu metei balie mumetha puo puo kediu dukhrikewa puo kituoko dukhriwa.

⁴Derei puo süko nuonuoko we dukhri mo, Mosa leshüda nu, Jihova diekhakeshü thezho nu thupieketuo tuoi, “U nuonuo la u krünuo dukhrilie lho, morei u krünuo la u nuonuo dukhrilie lho; derei kehoupuorei puo thuo puo kephouma la siasiatuo” si.

⁵Süsie Amazia Juda themiako kiekengulie di Juda mu Benjamin pete la pfutsanuo kiko le di uko khapie nyie mu krie mhokezhako khro khapie balie. Puo cie mepfü mu sümhoketako phrükeshü ki mia nyie krie se, terhü nu volie kevi, rüngou mu pezhü selie kevi themia ngulie.

⁶Puo talent krie puo pie Israel nunu terhümiavimia nyie krie puo zha khrü salie.

⁷Derei Ukepenuopfü themia puo vor di pukecü, “Harie kediu, Israel chüpahi bu n ze vo hiecie, Jihovae Israel, Efraimko pete zetuo mote.

⁸Sikecüumonyü nie thuo nie rübei vo di chüshülie, terhü nu meteilie, moro Ukepenuopfü ngumvümia mhodzünu nu n pekrüshütuo; Ukepenuopfü süu khruoshüketuo mu pekrüshüketuo rei puo kekuo ba” sita.

⁹Sitse Amazia sie Kepenuopfü themiau ki, “Di siro a talent krie puo khapie Israel chüpahi tsükewau la hie bu kedipuo chüta?” sishü. Sitse Kepenuopfü themiau la sie, “Jihova hako kezie phi kha lashü n tsülie viwe” sita.

¹⁰Sitse Amazia Efraim nunu puo ki kevor chüpahiko bu tuota di süko la u ra vota. Sitse uko Juda gei u nei mo phita, mu u noumeyiethor di uki la vota.

¹¹Derei Amazia thepfu zo di puo themiako ze Metsie Razhau nu vo di Seir nu themia nyie ker biewa.

¹²Juda themiakoe mia kekrei nyie ker perhei telie, di uko ze Sela nu tsiekrie zügei kho di uko khu khrüshü, sidi uko pete kesetshie phawa.

¹³Derei Amazia-e u ketse lakewa chüpahiko, uko bu puo ze terhü nu vo moketako, Juda nadiko Samaria nunu vo Beth-horon ketso whuo vor, di süko nu mia nyie se dukhriwa di mha keta philie.

¹⁴Amazia-e Edomko geilie di la kevor sie, Seirmia rhuoko se vor di süko pie puo rhuo chü bata, di süko rüsuo mu mhapie uko tsü ita.

¹⁵Süla Jihova Amazia gei puo noumeyieta di siedzekesimia puo ketsepie puo ki shü, süu puo ki, “No kiüdi themia kro puo n dzie nunu thuo rei u rhuo-ue u themia kelashülie kenjükecü rhuo pfhü la mu?” si.

¹⁶Derei puo diepu ketha nu kediu sü puo üse, “Hieko n bu kediu tarhokecüu chüte me? Khawalie! Kiüdi n dukhri ba ta?” si. Süla siedzekesiu rei khawa, derei sie, “Jihovae n pekawatuo ücü le tou baketa a site, no hikecü chü mu a kepu rünyü moketa la” sishü.

¹⁷Süsie Juda kediu Amazia-e mia ketsolie di mia ketsepie Jehu nuou Jehoahaz nuou, süu Israel kediu ki shü, di sie, “Vorlie, sidi uko thuo mhotsou kengushü khe!” sishü.

¹⁸Siru Israel kediu Joash-e Juda kediu Amazia ki die khalashü, “Lebanon nhahu puoe Lebanon nu sedar bo puo ki, ‘N nuopfü pie a nuou ki nyicie’ isi; ru Lebanon nu nhachü puo tuo vokecü ki nhahuyo menyüwa.

¹⁹Niekoe sie, ‘Harie, a sü Edom penyüwate,’ idi nie meloue nie chüpie kemelha phi bate. Tsieki kinu ba sei zolie, kiüdi kemezhielieketuo meshülie di tetsutuo ga, no mu Juda bu n sa di?” sishü.

²⁰Derei Amazia süsü rünyü mvüta, süu Jihova thuo chüshü, uko Edom rhuoko pfhüketa la, puoe uko khapie ngumvümia dzienu shüwaketa la zo.

²¹Süla Israel kediu Joash-e kho, puo mu Juda kediu Amazia unie Juda kijü Beth-shemesh rüyachü nunu kebie.

²²Sitse Israel bu Juda penyüwa; mu mia pete ta u thuo u kinu vota.

²³Tsiu Israel kediu Joash-e Ahazia nuo Joash nuou, süu Juda kediu Amazia, Beth-shemesh nunu telie; di puo ze Jerusalem nu vorlie, sidi Jerusalem dahouu thu krie dia dumewa, Efraim dahouu nunu vo puo Kenu Kharuu ketso.

²⁴Puoe suna mu rakachü pete, mu Ukepenuopfü kiu nunu ngukelie mhakhouko pete mu Obed-edom sa chülie: puo kediu kinu kinyiko mu tekelie themiako sa zelie di Samaria nu la vorta.

²⁵Juda kedi Joash nuou Amazia-e Israel kediu Jehoahaz nuo Joash se sienu cie kerepengou lhou salie.

²⁶Amazia mhathoko therie nunu thela ketso Juda mu Israel kediko Dze Dau nu thupie tuo moü me!

²⁷Amazia Jihova kinu rüreiketa yawinu mia Jerusalem nu puo ngukemvü do rhüba zota, sidi puo ta Lakish nu vota. Derei mia sünu puo pfhü vo di puo dukhriwa.

²⁸Mia gura geinu puo pfü vor; di David nadiu nunu puo khrupie puo pfutsanuoko sa zhüwata.