Read Angami Naga Seyiedze Kenieu 26 Bible Online

Seyiedze Kenieu 26 - Angami Naga bible

Seyiedze Kenieu 26

¹Siro Juda themia pete Uzzia, cie keresorou ketau zelie di puo bu puo puo Amazia sounu kedi chüta,

²Puo Eloth chü lalie di süu khalapie Juda tsüshü, kediu puo pfutsanuoko ze di zeketa sie.

³Uzzia kedi chükelie ki cie keresorouta, mu puo Jerusalem nu cie hiepengouekenie dilie. Puo zuo za Jekolia, Jerusalemmiapfü.

⁴Puo puopuo Amazia tuoi di Jihova mhiki puotoucüko chülie.

⁵Puo Zekaria teiki Jihova pfhülie, süu puo pethapie puo bu Kepenuopfü preikelie la, mu puo Jihova pfhüketuochie Kepenuopfüe puo chü pekruoshü.

⁶Puo pra di Filistinko ze terhü chü di Gath dahou, Jabne dahou, mu Ashdod dahou biemewa; sidi puo Asdod kijünu mu kekrei Filistinko donu rei nadiko chüshü.

⁷Kepenuopfü puo khruopie puo bu Filistinko mu Gur-baal nu kelhou Arabko mu Meunko ki kuolie.

⁸Ammonko thekhruo pie Uzzia tsü, mu puo Ijipt rieketso meyie vota, puo kuo setacü la.

⁹Süsie rei Uzzia-e Jerusalem nu puo Kenu Kharu, Razhanu Kharuu, mu puo Kekechüu nu rükhouki kerükrie kro puo chüshü di kuda chüwa.

¹⁰Siro rayhanu rükhouki kerükrieko chüshü siro dzübou kepie dzükhouko chü phishü, puo Shefela nu mu kijüzhau nu rei puo kiri ba phicü la, siro puo kijü khriecü la, kijüthouko nu rei mu kijü kekruoko nu rei lieciemia mu khube kecieko bu baya.

¹¹Süsie rei Uzzia, terhü chülie kevi chüpahi rüpfhünuo ba di kediu khro kezhamia puo Hanania pukeshü medzi di kethuu Jeiel mu kezhau Maaseia unie bu uko tsüphrü medzi di kezalie.

¹²U pfutsanuo chienuoko nu krütako pete terhümiavimiako pete kesa nyie kenie di krie sorou.

¹³Uko khro chüpahimia lakh se nyie thenie di krie pengou, süko kuo phi mu kediu khruohi di ngumvümia ze terhü chülie vi.

¹⁴Siro Uzzia chüpahi pete la pezhüko, rüngou, tsüre, thegiboulie, theü mu cieketuo la tsierünuo kese phrelie.

¹⁵Puo Jerusalem nu mhachü kesi kro puo bu mhanya kropuo chüpie rükhouki kerükrieko gei, mu puokeko nu, theüko mu ketsie kezhako cieshülieketuo chüpie ba. Puoza meyie se vo kepetse nu vota, puo meteilie kemochie u ngo zo di puo khruotuo zo.

¹⁶Derei puo meteilie tse kemiakota di puo thuo puo pekawa. Puo Kepenuopfü Jihova gei kekrüwa, Jihova kerüsuokiu nu mhare kevi ruosuobau gei nu mhathetuoü leketa la.

¹⁷Derei zievo-u Azaria-e Jihova zievo kethepfu kro puo mia hiethetha ze salie di puo sie lerlie,

¹⁸di uko kediu Uzzia petsou di sie puo ki, “Uzzia, mharekethengu thepie Jihova tsüketuou n mese mowe, derei Aron nuosenuoyie zievoko mharekethengu theketuo la uko chü kemesa kreiwate. Kemesachüu nunu pratalie, no mhachü kekrüwaketa la, mu süu Kepenuopfü Jihova kinu therhu puorei se vor n tsüshülie lho” sishü.

¹⁹Sitse Uzzia puo noumeyieta. Puo süki puo dzienu mharekethenguu theshütuoü di puo khouu pietha, mu puo zievoko gei puo noumeyieketa ki, puo teikhie gei mpa chü parta, Jihova kiu nu zievoko mhodzünu mharekethengu kethe ruosuobau khieki nu.

²⁰Siro phichükezhau mu zievoko pete puo mehoshü ru, harie puo teikhie gei mpa chü bata. Sitse uko rükri puo bu chazou vota, mu puorei Jihova puo vükeshü la puo thuo rükri pratatuoüta.

²¹Kediu Uzzia puo se ketso, mpa kechü puo chü di ki kekrei puo nu bata, Jihova kiu nunu puo khawaketa la. Siro puo nuou Jotham kediu kiu meholieta di kijünu themiako kekha se bata.

²²Uzzia mhatho kekreiko, therie nunu vo thela ketso Amoz nuou siedzekesiu Isayae thushü.

²³Siro Uzzia puo pfutsanuoko ze di zeta, mu mia puo pie kediko mekhruchünu puo pfutsanuoko khieki nu khruwata, ukoe sie, “Puo sü mpamia puo eru” ikeshü la. Siro puo nuou Jotham puo sounu kedi chülie.