Read Angami Naga Seyiedze Kenieu 27 Bible Online

Seyiedze Kenieu 27 - Angami Naga bible

Seyiedze Kenieu 27

¹Jotham kedi chükelie ki cie mepfüepengou ta, mu puo Jerusalem nu cie keresorou kedi chülie. Puo zuo za Jerusha, Zadok nuopfü.

²Puoe puo puo Uzia chükecü tuoi Jihova mhinguki puotoucüko chü, puo we Jihova kerüsuokiu vajo vota molie. Derei themiako süteiki mha kesuo chü ba zo.

³Puoe Jihova kiu nu pesotsatie careu chüshü, mu Ofel dahou gei ki chü phishü.

⁴Süsie rei puo Juda kijükhruko nu nadi mu ketsa kevi kijükhruko gei kuda mu rükhouki kerükrieko chüshü.

⁵Puo Ammon kediu ze kegei di puoki kuolie. Sitse Ammonko süciesü rakachü talent krie puo mu thoulha kemejü nyie ker mu telha kemejü nyie ker se puo tsü. Siro Ammonko cie kenieu mu seu nu rei mha süde se puo tsü lashü.

⁶Sidi Jotham-e puo chako khapie puo Kepenuopfü Jihova tsükelie la kuosieta.

⁷Jotham mhatho kekreiko, puo terhü kechü pete, puo mhathoko Israel mu Juda kediko leshüdau nu thupietuo.

⁸Puoe kedi chüliecü ki cie mepfüepengouta, mu puo Jerusalem nu cie keresorou kedi chülie.

⁹Siro Jotham puo pfutsanuoko ze di ze zhüta, mu uko David nadiu nunu puo khruwa, siro puo nuou Ahaz puo sounu kedi chülie.