Read Angami Naga Seyiedze Kenieu 28 Bible Online

Seyiedze Kenieu 28 - Angami Naga bible

Seyiedze Kenieu 28

¹Ahaz-e kedi chükelie ki cie mepfüta, mu puo cie keresorou Jerusalem nu di, siro puoe puo puo David tuoi menuo di Jihova mhingu ki puotoucüko chülie mo,

²derei puo Israel kediko chako nu tuota. Puo mha the pezhapie Baal miarhiko rei chüta.

³Siro puo Hinnom nuou razha nunu mhare kevi rei theshü, di Jihovae Israelmiako mhodzünu nu u whuokeshü seyieko mha kesuo chütuoyakezhako kemhie di puo nuonuo rei thepie ruosuo chüta.

⁴Puoe thechü kerükrieko gei, kijükhruko gei mu seibo kepejo pete khronu ruosuo chü mu mhare keviko the tuota.

⁵Sikecü la puo Kepenuopfü Jihovae puo khapie Siria kediu dzie nu shüwa, süu bu puo penyüwa mu puo themia kekra telie di ze Damaska nu vota. Puo kha rei pie Israel kediu dzie nu shüwa mu süu puo penyükelie ki uko gei phiwa.

⁶Uko pfutsanuoko Kepenuopfü Jihova khawaketa la Peka, Remalia nuou khunhie puo nu Juda nu mia lakh puo di mepfü dukhriwa, süko terhümiavimia phre zo.

⁷Siro Zikri, Efraim terhümiavimia puo ru, puoe kediu nuou Maseia mu kedikinu mhakekhayakezhau Azrikam, mu kediu sieso puo kekuo kebau Elkanah hako rei dukhriwa.

⁸Israel-e seyie mia thepfumia lakh kenie teze vo kedie chüta, thenuko, nhicumia thenu rei thepfu rei; ukoe süko kinu mha bie philie di biekelieko se Samaria nu vor.

⁹Derei Jihova siedzekesimia puo sünu ba, puo za Oded; mu puo Samaria nu kevor chüpahiko ze kesetuoü par, di sie uko ki, “Jihova nie pfutsanuoko Kepenuopfüe Juda gei puo noumeyieta di puo khapie nie dzienu shü zo, derei nieko noumeyie di uko geizoketau we kho tei tsobate ho.

¹⁰Nie tsiewe Juda mu Jerusalem themiako thepfu rei thenu rei pie nie khro mu nie die chü zocü le thate. Nie we Kepenuopfü Jihova mhodzünu nie thuo nie kephouma jü zo me?

¹¹Tsie a pfhe rünyülie di nie seyiemia teze vorkebako ketse lashüwalie, Jihova noupfhü kere nieko gei baketa la” sita.

¹²Süsierei Efraim pehümia kro puorei, Johanan nuou Azaria, Meshilemot, Shalum nuo Jehiskia mu Hadlai nuou Amasa hako terhü nunu vorkezhü ki uko petsou thalie,

¹³sidi sie uko ki, “Nieko bu mia tekelieko ze hanu vor lho zo, niekoe tsie hie kephouma mu kejoko tsü geinu Jihova petsou sidi kejopie hie gei ba sakeshü le bate mu. Hieko kejoe zha phi bate mu noupfhü kere Israel gei batakecü la” sita.

¹⁴Süla terhümiakoe themia tekelieko mu mhavakelieko khapie pehüko mu mechükehou mhodzünu shüwa.

¹⁵Süsie themia u za kiekeshüko siethalie di themia tekelieko zelie mu uko mhavakelieko nunu methuoketuoko pete pedzieshü, uko pfhenei se uko bu selie, phikou se uko tsüshü, kecükekrie se uko tsüshü mu mhapie uko kenheshü, siro gadako geinu kemezieko pete pfhülie di uko ze vo uko kicükinumia keba Jeriko, kukuo nadiu nu khashü, sidi uko Samaria nu la vorta.

¹⁶Süteiki kediu Ahaz mia ketsepie Asiria kediu ki kekhruohi cha.

¹⁷Edommiakoe Juda whuo la vor puo penyüwa di themia tezeketa la.

¹⁸Siro Filistinko Juda nadi Shefela mu Negeb nu nadiko whuo vor di Beth-shemesh Aijalon, Gederot, Soko mu puo rünako Timna mu puo rünako, siro Gimzo mu puo rünako lielie di ukoe süko nu lhou bata,

¹⁹Israel kediu Ahaz la Jihova Juda bie kerünuowa, puo Juda nunu rüzhü se mu Jihova gei dietho moketa la.

²⁰Süla Asiria kediu Tilgath-pilneser-e vor di puo chü pekuokeshüu monyü puo pechüta.

²¹Ahaz-e Jihova kiu nunu siro kediu mu puo kezhako kiko nunu mhapielie di thekhruo khapie Asiria kediu tsüwaketa la, derei süsü puo khruohilie mo.

²²Puo kemezhiekelie ki Jihova gei dietho mo sakuota, haue kediu Ahaz zo.

²³Puo ruosuo chüpie Damaskamia rhuo, puo thuo penyükewako tsü di sie, “Siria kediko rhuokoe uko khruohikeshü la, uko bu rei a khruohishüketuo la a ruosuo chü uko tsü tuowe” ita. Derei hako puo mu Israelko pete kepekau chüta.

²⁴Tsiu Ahaz-e Ukepenuopfü kiu nu hiekhouko kengulie di Ukepenuopfü vie hiekhouko da phawa, mu puo Jihova kikhako khawata; sidi Jerusalem nu puoke peteko nu puo thuo ruosuobako chülieta.

²⁵Juda nadi kheko nu terhuo kekreiko ki ketheruosuo chütuoü di puoe thechü kerükrieko chü di Jihova puo pfutsanuoko Kepenuopfü neikemo chütuota.

²⁶Puo mhatho kekreiko therie nunu vo thela ketso mu puo zhoko pete thupie Juda mu Israel kediko leshüdau nu tuo zo.

²⁷Ahaz puo pfutsanuoko ze di siata, mia Jerusalem nunu puo khruwa, uko puo ze vo Israel kediko mekhruko nu shü mote. Siro puo sounu puo nuou Hezekia kedi chülie.