Read Angami Naga Seyiedze Kenieu 29 Bible Online

Seyiedze Kenieu 29 - Angami Naga bible

Seyiedze Kenieu 29

¹Hezekia cie mepfüepengouketa ki kedi chülie mu puo Jerusalem nu cie mepfüethepfü kedi chü. Puo zuo za Abija, Zekaria nuopfü.

²Siro puo we puo pfutsa David chükevor tuoi di Jihova mhingu ki mezhücüko chülie.

³Puo diketa teicie therieu thekhrükerietho-u nu puo Jihova kiu kikhako khrüshü di süko ketso lawa.

⁴Puoe zievoko mu Leviko ze vorlie, di kitiezhau niathu tsatie nu uko bu kengulie.

⁵Sidi puo sie uko ki, “A pfhe rünyüshücie, Leviko! Nie chü kemesalie mu nie pfutsanuoko Kepenuopfü Jihova kiu chü kemesalie, sidi kemesachüu nunu kerhuko se vo chazou shüwalie.

⁶U pfutsanuokoe dietho mo di Kepenuopfü Jihova mhodzü kesuo chüwaketa la; uko puo meliewa, di Jihova kebachü nunu u zie kereilie, mu u sietsa kereishüte.

⁷Ukoe kifükhro kicieko rei khawa di mhare keviko theshü mota morei Israel Kepenuopfü la keba kemesa chüu nunu kethe ruosuo khashü mote.

⁸Süla Jihova noupfhüu Juda mu Jerusalem gei vorte, di puo uko chüpie ngu kemeriekecü mu u vapetho zokecü, mu kechü zokecü nie thuo nie mhi se ngushüte.

⁹U puonuokoe zhiecha bu u bie khrüpiezhüwa mu u nuonuo thenu rei thepfu rei mu u nupfünuoko bu mia die chütuote.

¹⁰A tsie a nounu Israel Kepenuopfü Jihova ze kediekhokelie puo chücü le ba, puo noupfhü kereu bu úko kinu lataketuo la.

¹¹A nuonuoko tsiewe kevavuota hiecie, Jihova nieko bu puo mhodzü ki tha di puo lie chü mu puo liethomia chü di mhare kevi thepie puo tsüketuo la nieko kedalieketa la” sishü.

¹²Sitse Leviko sielie, Amasai nuou Mahath, Azaria nuou Joel, Kohat nuonuoko mu Merari nuonuoko, Abdi nuou Kish, Jahalelel nuou Azaria, Gershonmiako, Zimma nuou Joah, Joah nuou Eden,

¹³Elizafan nuonuoko, Shimri mu Jeuel, Asaf nuonuoko, Zekaria mu Matania.

¹⁴Heman nuonuoko, Jehuel mu Shimei, Jeduthun nuonuoko, Shemaia mu Uziel.

¹⁵Uko u siezedzürieko pfhü kengulie, di uko thuo u chü kemesalie, sidi kediu Jihova die se di diekhakeshü ze di Jihova kiu chü kemesatuoü lerlie.

¹⁶Zievokoe Jihova kinutsa chü kemesatuoü di le, sidi uko Jihova kerüsuoki nunu mha mesakemo ngukelie pete sepra Jihova kiu kitie shüwa, sitse Levikoe süko pielie di se vo Kidron Rücünu shüwa.

¹⁷Uko mhachü kemesakecüu thekhrü kerieu nu zha therie nhie chü sedevü, mu thekhrüu zha thetha nhie uko Jihova kiu kifükhro vorlie; sidi uko zha thetha Jihova kiu mesa ba di thekhrüu zha keresorou nhie chü tseilie.

¹⁸Sitse uko kediu Hezekia ki ler di sie puo ki, “Hieko Jihova kiu chükemesawate, kethe ruosuobau mu puo viekhou pete sa, siro kepekie niekhrüda mizhüu mu puo viekhou pete sa.

¹⁹Kediu Ahaz puo kedi teiki diethomo di vakewa viekhouko hiekoe chülalie di chü kemesaliete, mu harie, süko Jihova ruosuoba mhodzünu batewe” sishü.

²⁰Sitse kediu Hezekia khiserüna sielie di nadiu nu kezhako kiekengu ze Jihova kiu nu kho.

²¹Tsiu uko thudo thenie, tekuochü thenie, tekuonuo thenie mu mvüdo thenie se di kedirüvie mu Juda la kemesa chü la kephouma ruosuo chütuoü di se vor. Sidi puo Aron nuonuoko, zievoko bu Jihova ruosuoba gei süko se ruosuo chüshünukecü diekhashü.

²²Ukoe thudoko geilie, mu zievo-ue süko zie kelhou pie ruosuoba vashü; ukoe mvüdoko geilie di süko zie kelhou pie ruosuobau vashü; ukoe tekuonuoko geilie di süko zie kelhou pie ruosuoba vashü.

²³Süsie kephouma ruosuo la mvüdoko se kediu mu mechükehou nu vorlie, sitse uko dzie khapie süko gei shüshü.

²⁴Süsie zievoko süko geilie di Israel pete rhalietuoü di süko ziepie ruosuoba geinu kephouma la khakeshü ruosuo chüshü, kediue Israel pete la kethe ruosuo mu kephouma ruosuo khashü nu diekhakeshü la.

²⁵Siro puo Leviko bu mha kekreiyakezhako, übou puorhü kechüko se di David mu kediu kepethau Gad mu siedzekesiu Nathan pukeshü mhie di thalie; Jihova diekhakeshüko sü puo siedzekesiko geinu voryakezha la.

²⁶Levikoe David übouko se mu zievokoe ketsüko pie di tha.

²⁷Süsie Hezekia ketheruosuo chüpie ruosuoba gei shünushü. Kethe ruosuo chüvü tse Jihova la chieliko rei chüvüta, mu süko ze di Israel kediu David übouko rei sa.

²⁸Mechü kehou pete rüsuota, tsalikechüko kelita, mu ketsüko khoushü; kethe ruosuou tseilie kemochie hai zo ba tso.

²⁹Ruosuo tseita tse kediu mu puo ze ketuoko nerhu tsu di rüsuota.

³⁰Süsie kediu Hezekia mu kedinuokoe Leviko bu David mu kepethau Asaf dieko se di Jihova ketshe chieliko chüshünuta, siro uko rei phi di ketshe tsali chülie mu nerhutsu di rüsuota.

³¹Sitse Hezekia sie, “Tsiewe nieko nie chükemesa kreipie Jihova tsüliete ru; penuo vorlie, ruosuo mu ketshe khakeshüko se di Jihova kiu nu vorliecie” sishü. Sitse mechükehouu ruosuo mu ketshe khakeshüko se vor; siro chükenyümia kethe ruosuoko rei se vor,

³²Mechükehoue kethe ruosuo la sekevor phrükeshü thudo hiethenie, tekuo chü krie puo, tekuonuo krie kenie, hako pete Jihova ketsü kethe ruosuo puo la.

³³Siro chükemesa kreipie khakeshüko thudo krie sorou mu tekuo nyie se.

³⁴Sirei zievoko tsathorkecü kethe ruosuoko zhülo kekralie kenjüta di zievo kekreiko bu u chü kemesalie kemochie Leviko bu uko khruohi di mhatho-u chü tseilie, kekreilamonyü Levikoe zievoko ki rei u chü kemesakecü nu u nou nyükuoliekecü[22] la.

³⁵Kethe ruosuo kha phikeshüko sie rei chüshuoko, se di vitho ruosuokechü rei, siro kethe ruosuo la kekrie ruosuoko rei sa. Hamhie di Jihova kiu lietho-u chü lalie.

³⁶Siro Hezekia mu themia pete Kepenuopfüe themiako la mhachükeshüko la u nei philie, mha hau mhai zo vorkelie la.