Read Angami Naga Seyiedze Kenieu 3 Bible Online

Seyiedze Kenieu 3 - Angami Naga bible

Seyiedze Kenieu 3

¹Sidi Solomon-e Jerusalem nu Jihova thuo pie puo puo David pengukeshü thechüu, David-e Ornan Jebusmia shieu nunu kesekeshü Moria kijüthou geinu Kepenuopfü kiu chü sedevüta.

²Puo kedi chükelie cie dia nu thekhrü kenieu teisozha kenie nhie mhachü sedelie.

³Ukepenuopfü kiu chüketuo la Solomon-e puo kezhakechako rhükelie[1] hakemhie: puocha, keriekimia mha kemejü rhinu, thu hiesorou, mu puozha thu mepfü.

⁴Kidzütsa kijükhro chau thu mepfü, kiu zha de, mu puo rükrie thu krie puo di mepfü. Süu puo noutsa suna kevithopfü pie da phre.

⁵Ki kezhau saipres sei pie puo sozha chü mu suna pie da mu sügei kukuo mu kedoukecü rhishü.

⁶Puoe ketsie puoma kereko rei pie kiu ketso. Suna-u we Parvaim nu sunapfü.

⁷Puoe suna pie kinu kizoko, phiprako, sozhako mu kikhako dawa, tsiu cherubko rhi pie sozha gei shüwa.

⁸Puoe kemesatho chüu kechü; puochae kiu zha de di thu mepfü, mu puozha thu mepfü, puo süu suna kevithopfü talent krie sorou pie da.

⁹Gojalko mesi suna shekel hiepengou mesi de. Puo kibou pesoko suna pie da phre.

¹⁰Kemesatho chüu nu sei pie cherubim kenie rhi di suna pie da.

¹¹Cherubnie shü kesa thu mepfü: unie mia puo shü puo thu pengou di sozhau kupfü ba, mu shü kekreiu rei thu pengou di Cherub kekreiu shü nyü ba;

¹²Cherub hau shü puo thu pengou di kiu sozhau nyü ba, shü kekreiu rei thu pengou di cherub kekreiu shü nyü ba.

¹³Cherubko u phi gei tha di kiluo petsou tha.

¹⁴Siro Solomon-e puo keya pfhe linen kemesapfü kecü geinu cherubko rhi sashü.

¹⁵Kidzütsa co kezha thu serepengou rükriecü kenie chü sashü, puo gei puotsü puo thu pengoungou kecü ba.

¹⁶Puoe thegiro kedoukecü[2] pie co nie tsüle gei gou; mu turaü si krie puo chüpie thegi kedoukecü gei khashü.

¹⁷Puo co nie sepie rüsuokiu mhodzütsa, kekreiu bu pesotsa; pekhrotsa kebau üse Jakin, mu pesotsa-u üse Boaz üdi kielie.