Read Angami Naga Seyiedze Kenieu 30 Bible Online

Seyiedze Kenieu 30 - Angami Naga bible

Seyiedze Kenieu 30

¹Hezekia-e Israel mu Juda pete ki die khashü mu leshü thupie Efraim mu Manasseh rei tsü di uko bu Jerusalem nu Jihova kiu nu vor di ciekevo teiso-u ze morosuo üshü.

²Kediu mu puo liethonu kezhako Jerusalem nunu kengukeliekoe thekhrü kenieu nu ciekevo teiso kerükrazha chütuoü kerüchükelie la.

³(Uko puotei touki süu pie balie lhota kekreilamonyü zievokoe u chü kemesapie mha chüliekevi de chülie mo vorta mu themiako rei vor Jerusalem nu kengulie mo tuoketa la.)

⁴Siro mharhükelie hau kediu mu mechükehouu mhodzü ki puotouta.

⁵Sidi uko thezho puo khashü di Israel pete nu Beersheba nunu vo Dan ketso themiako bu vor Jerusalem nunu Israel Kepenuopfü Jihova la ciekevo teisozhau ze phrenu shü; ukoe pukeshü mhie di themia kekra süu zelie mo tuotacü la.

⁶Süla dieliemia bu Israel mu Juda pete nu kediu mu puo kezhako kinu leshü selie di kediu diekhakeshü mhie di pu vokecü, “He-i Israelmiako, rürei la se Jihova Abraham; Isak mu Jakob Kepenuopfü ki vorliecie, puo bu Asiria kediko dzie nunu pesha lakeshü nieko ki la vorlieketuo la.

⁷Nieko we nie pfutsanuoko mu nie siezedzürieko mhieta hie, süko uko pfutsanuoko Kepenuopfü Jihova gei dietho mota di puo uko pekakeshü nieko rei nguze.

⁸Nieko pfutsanuoko kemhie di voreilie kelho chüta hie, derei nie thuo nie khapie Jihova tsülie, di puo kemesabau nu puoe kechachie la chü kemesalieketau nu vorlie, sidi nie Kepenuopfü Jihova lie chü di puo bu nie kinu puo noupfhüu seketa chüliecie.

⁹Nieko Jihova ki rürei la vorkelie sie nie siezedzürieko mu nie nuonuoko u tezeketuoko bu u ngumezhielie di kijü hau nu la vorlietuo. Jihova nieko Kepenuopfü sü tseiüvi mu mia ngumezhieyakezha la, nie puo ki la vorlie ro puo nie kinu puozie rüreitalie lho zocü la” sishü.

¹⁰Süla dielieko Efraim mu Manasseh pete nu vo Zebulun ketso nadi puo sie puo nu vovo; derei mia uko pese di uko kre zota.

¹¹Ashermia huoyo rübei mu Manasseh mu Zebulunmia huo u thuo u chü kerünuo se Jerusalem nu vorlie.

¹²Kepenuopfü dzie-e Juda gei rei ba di uko bu nou puo chü kediu mu puo khro kezhakoe Jihova die pukeshü ki ze chülie.

¹³Tsiu themia kekra Jerusalem nunu thekhrü kenieu nu khreiüshükemo niekhrüda nyiu nyituoü vorlie.

¹⁴Ukoe Jerusalem nu keba ruosuobako mu mharekevi kethe ruosuobako pete chü se vo di kelhoupie Kidron razhau nu shüwa.

¹⁵Süsie uko thekhrü kenieu nu zha keredia nhie ciekevo kuonuou dukhrilie. Tsiu zievoko mu Leviko mengalie, sidi uko rei u thuo u chükemesalie, sidi kethe ruosuoko se vor Jihova kiu nu khashü.

¹⁶Uko rei Kepenuopfü themiau Mosa zho ze di u thuo u thanu tha phrelie, zievokoe Leviko dzie nunu liekelie thezieko kegeshü.

¹⁷Siro kehouu nu u thuo u chü kemesaliekemo themia ba philuocü la Leviko bu mesaliekemo kehoupuo la rei chükemesapie Jihova tsütuoü di ciekevo kuonuou dukhri morosuota.

¹⁸Themia krodiu nu Efraim, Manasseh, Isakar mu Zebulun mia kekra vor u chükemesa mo, derei uko rei pupieketuo mhie zo mo di ciekevo vieu we cü zo. Hezekia uko la cha di pukecü, “Jihova keviu sü kehoupuo kemou rei vaya zo.

¹⁹Puo noupie Kepenuopfü puo pfutsanuoko Kepenuopfü Jihova tsükelie khe kemesabau nunu chüyakezha kemesa zhoko zelie mota zoü rei” idi pushü.

²⁰Sitse Jihova Hezekia pfhe rünyülie di themiako chü keshürhoshü.

²¹Siro Israelmia Jerusalem nu vorkelieko u nei phi di zha thenie khreiüshükemo nyiu ze volie, tsiu Leviko mu zievoko teisonhie Jihova tshe ba zo, u kekuo pete se Jihova ki chieli zo balie.

²²Tsiu Hezekia rei Levikoe Jihova liethokechü nu chü pevisekeshü la uko shü va perheikecü die pushü. Haidi themiako zha thenie thenyi cau cü vo, mu vitho ruosuo khashü mu uko pfutsanuoko Kepenuopfü Jihova thezie zo balie.

²³Sitse kehou pete zha kekrei thenie thenyiu nyi saketuo kedierhelie, süla uko u nei di zha kekrei thenie süu ze la ba.

²⁴Kediu Hezekia-e thudo nyie puo mu tekuo nyie thenie pie ruosuochüketuo la khapie kehouu tsü, mu kezhako rei thudo nyie puo mu tekuo nyie ker khapie kehouu tsüshü. Siro zievoko kekra u chü kemesalie.

²⁵Juda kehou pete, zievoko mu Leviko, tsiu Israel nunu parkelie solhiko, mu Juda nu lhoutuoketako u nei philie,

²⁶Israel kediu David nuou Solomon sie Jerusalem nu mha hikecü puorei chü mo zoluokecü la.

²⁷Süsie zievoko mu Leviko sielie di themiako gei jashü, mu uko pfhe rünyülie, sidi uko kecha teigei puo kemesabau nu volie.