Read Angami Naga Seyiedze Kenieu 31 Bible Online

Seyiedze Kenieu 31 - Angami Naga bible

Seyiedze Kenieu 31

¹Mha hako tsei phreketa sie Israelmia vorkeba pete Juda nadiko nu vo di co sepie kebako wiwa mu Asherako rhuowa, siro Juda mu Benjamin pete nu keba thechü kerükrieko nu ruosuobako pete pekawa kemochie bierhuo zo vota, süsie rei Israelmia pete u nadiko mu u thuo u viekeba nu vo phreta.

²Siro Hezekia-e zievoko mu Leviko kezapie u la kekreikrei di u bu u thuo u thoko nu baketuo chülie, zievoko mu Leviko kethe ruosuo mu vitho ruosuo khakeshü la, Jihova kebachüu careko meholie; siro kethe mu kethezie khakeshü chütuo.

³Kediu puo thuo puovie nunu khakeshüko bu kethe ruosuoko tuo: Khise mu thevatie ruosuoko, sabat la kethe ruosuoko, khrüsako mu kedaseketuo thenyiko la kethe ruosuoko Jihova zho nu thupie kezhü ze di chülie.

⁴Siro puo Jerusalem nu kelhouko bu zievoko mu Leviko ya ngulie kezhü de se uko tsü, uko bu u khapie Jihova zho-u nu shülieketuo la diekhashü.

⁵Dieu pu keza pralie mumetha, Israelmiako sü u chiesü, khubezu, tier, mepfhidzü mu u lienu ngukelie nunu mha kha phi shüshüta; uko mha peteko geinu ker zau se phi vorshü.

⁶Tsiu Israelmiako mu Judamia Juda nadiko nu lhouketuokoe u thu mu u kuoko ker zau kha kreipie uko Kepenuopfü Jihova tsükewa vieko pie vor di pfhepie zhülie.

⁷Thekhrü seu nu uko puo mvüdzeu pfhe vü di khrü thenieu nu chü tseilie.

⁸Hezekia mu kezhako vor di mhapfhepie kebako ngu tse uko Jihova tshe mu japie puo themia Israelko tsüshü.

⁹Siro Hezekia mhapfhepie kebako dze zievoko mu Leviko ketsota.

¹⁰Phichü kezhau Azaria, Zadok kiu nu themiaue puo die kela di sie, “Uko mha se vor Jihova kiu nu shükelie yawi nunu hie mhacü ba zo mu cü pevülie di pesha philiete, Jihova japie puo themiako tsükeshü la hie mha hako pesha phi se balietewe” sita.

¹¹Sitse Hezekia uko bu Jihova kiu nunu mha khapie baketuo kibouko kemielie nushü, mu uko süko kemielie.

¹²Sidi uko dietho di mha khakeshüko ker zau, mu mha chükemesakelie vieko se vor shülie. Mha hako kemeho kezhaue Levimia Konania, mu puo sieso-u puo siezeu Shimei,

¹³süsierei kediu Hezekia mu Kepenuopfü kiu nu kemeho kezhau Azazia, Nahath, Asahel, Jerimoth, Jozabad. Eliel, Ismakia, Mahath mu Benaia uko bu Konania mu puo siezeu Shimei khruohi di mha kemeho-u chü.

¹⁴Siro Levimia Imna nuo Kore, niathutsa kharu kepfheu bu u nei di khapie Ukepenuopfü tsükeshü vieko kemeho-u chü di mhapie Jihova la mu mha khakeshü kemesathoko khakreipie baketuoko, keseya.

¹⁵Eden, Miniamin, Jeshua, Shemaia, Amaria, mu Shekania hako dietho di zievomia nadiko nu puo khruohi di, uko siezedzürieko keza se phichü nhicu ya kezashü uko tsükecüko chü.

¹⁶U krü geinu le di u za thulieketako zo kemosie thepfumia cie se mu sümhoko pete Jihova kiu nu le di teisonhie u thoko, uko mhokezhako mhatho le di chüyakezhako we keza se ba di mhachüchüya.

¹⁷Zievoko za kethue u puonuoko le di chüya; Leviko we u kelhou cie mepfü geinu uko mhokebako le di chüya.

¹⁸Zievokoe u nuonuo kecünuoko, u nupfünuoko, u nuonuo thenuthepfuko krodiu pete phrülieya; uko dietho zo di u thuo u se kemesa tuolieyakezha la.

¹⁹Mu zievokoe Aron nuomia rüna khie mechü kijü nu lhouketuoko, rüna puo sie puo nu idi theza ru pie keba medzi di mha pie zievo pete mu Leviko pete donu thepfumiako tsülie morosuo.

²⁰Juda pete nu Hezekia hikecü chüshü, mu puo Jihova puo Kepenuopfü kengu ki vi mu puotou mu diethokecü chülie.

²¹Puo Kepenuopfü kiu la mha chükeshü peteko, thezho-u mu diekhakeshüko ze mu puo Kepenuopfü pfhükecü, puo nou pete pie chü mu puo khruolie.