Read Angami Naga Seyiedze Kenieu 32 Bible Online

Seyiedze Kenieu 32 - Angami Naga bible

Seyiedze Kenieu 32

¹Mha hako mu kedietho mhatho hako sie Asiria kediu Senacherib Juda whuo vor mu nadi kudako houlie di puo la süko liekelie le ba.

²Senacherib vor di Jerusalem ze kegeikecü le keba Hezekia ngu tse,

³puo puo khro kezhako mu puo terhüthemiako ze kerüchü di nadiu khie dzüluoko khawaketuo rhülie; ru uko puo khruohishü.

⁴Themia kekra vor kengulie, sidi uko dzüluoko mu rücüko uko kijü nu krukezhü pete khawa di pukecü “Kidi Asiria kediko bu vor dzü u kelhuo ngutuo mu?” ita.

⁵Hezekia mvürümvü mhachü di dahou meketako pete pfhe lasielie di süko geinu rükhouba kerükrieko chüshü, mu süsie rei dahou kekrei puo chü lashü; siro puo David nadiu nu Millo chü kemeteilie, mu terhünyieko mu pezhüko chü philie.

⁶Sidi puo themiako mho terhü krüta kro puo kedalie di nadiu kharu ki thechükezhau nu uko kie kengu ze vorlie di uko chü kethepfushü di sie,

⁷“Meteilie mu thepfu balie; Asiria kediu mu puo zeketuo krodiu prei mu kechazieta hie; puo zeketuo ki zhakuocü puoe úko zetuocü la.

⁸Puo ze ketuowe chüüphou kepfümia zo; derei u zeketuo-u we Kepenuopfü Jihova, u khruohi mu rüyachü nu u la kegeishütuoüyawe” sishü, sitse themiako Juda kediu Hezekia die la thepfulie.

⁹Süsie, Asiria kediu Senacherib, puo rüpfhünuo pete ze di Lakish re kebaue puo kituoko ketsepie Jerusalem nu Juda kediu Hezekia mu Juda themia Jerusalem nu keba peteko ki shü di pukecü,

¹⁰“Asiria kediu Senacherib-e hikecü puya: Nieko Jerusalem khapfü keba haha kedipuo pele di tha ga?

¹¹Hezekia nieko ki pukecü, ‘Kepenuopfü Jihova thuo Asiria kediu dzie nunu a kelashü zotuo’ ikeba ha nieko sepie nieko bu khe terhümerü di siatuoü ba mo me?

¹²Hezekia hau thuo thechü kerükrieko mu ruosuobako biewa di Juda mu Jerusalem ki pukecü, ‘Ruosuoba puo mhodzünu niekoe rüsuotuo mu süu geinu nie ruosuoko thetuo’ ikeshüu mo me?

¹³Niekoe a mu a pfutsanuoko kijü kekreira themiako gei chükeshü siya mo me? Kijü süko nu seyieko rhuoko a dzie nunu uko kijüko kelashü üme?

¹⁴A pfutsakoe peka lotsowaketa seyie kiu nu rhuokoe a dzie nunu u kelakeshü ngu di niekoe nie Kepenuopfüe a dzie nunu nieko kelashütuoü le ga?

¹⁵Tsie süla nieko Hezekia bu hai di nieko kedowa hie; mu puo pele hie, seyie morei kedi rhuo puorei a mu a puonuoko dzie nunu puo themia kelashü chie mo zo ho. Nie Kepenuopfü we a dzie nunu nie kelashüketuo kide retuo shi?” sita.

¹⁶Siro puo kituokowe süzie rei Kepenuopfü Jihova mu puo kituou Hezekia ngukemvü die pu.

¹⁷Puo leshüko thupie Israel Kepenuopfü Jihova ketha dieko mu puo ngukemvü die pukecü, “Kijü kekreira seyie rhuokoe a dzie nunu u themiako kelashü moto zocü tuoi, Hezekia Kepenuopfü rei a dzie nunu puo themiako kelashülie lho zo” si.

¹⁸Sidi uko shie petose di Judako die nunu Jerusalem nu themiako ki pu di uko kechükede mu bie kemidewa di nadiu lielieketuo la.

¹⁹Siro uko Jerusalem Kepenuopfü pupie kijü gei themiako thuo themia dzieü chükelieko tuoi pu zota.

²⁰Sitse kediu Hezekia mu siedzekesiu Isaya, Amoz nuou unie u mezhiemelo di meliepie teigei shü,

²¹ru Jihovae puo dieliemia puo ketseshü di süue Asiria kediu vorkebachüu nunu kezhako, terhümiaviko mu chüpahi kezhako dathewa, süla puoe menga se di puo thuo puo kijünu la vorta, siro puo puo rhuou kinu kele ki, puo nuonuoko huo thuo zhiecha se puo dupie zhüwa.

²²Hidi Jihovae Asiria kediu mu ngumvümia pete dzie nunu Hezekia mu Jerusalem nu kelhouko kelashü; siro puo lutsahatsa kerülei[23] khapie uko tsüshü.

²³Siro themia kekra mha methuo se Jerusalem nu Jihova ki vor mu mhama kere vie se vor Juda kediu Hezekia tsü, süla puo süyawinu seyie pete mhodzünu nu zha sieta.

²⁴Süteiki Hezekia suolie di siata nuota, sidi puo Jihova ki chashü; ru zasi puo pie puo die kelashü.

²⁵Derei Hezekia-e mha kevi puo gei chükeshü de mia pezie mota, puo nou kemiakokecü la. Süla puo mu Juda tsiu Jerusalem gei noupfhüu vota.

²⁶Sitse Hezekia kemiakokecü nunu puo nou rünuoshü, puo mu Jerusalem rei, süla Ukepenuopfü nouyieu Hezekia teiki uko gei vo mota.

²⁷Siro Hezekia kinyi mu therhu ngu philie; sidi puo puo thuo puo la rakachü, suna, ketsie puomakereko, mhare keviko, pezhüko mu mhaviebou puoma kere neiüko keviepie baketuo kiko chülie

²⁸Telha, khubezu mu tier khapie keba kiko, siro kiriko khapie keba kiko mu tekuo bouko chülie.[24]

²⁹Sükemhie di puo thuo puo la rünakezhako nu tekuo mu khunuo kroko khapie ba philie, Kepenuopfü mha kekra khapie puo tsükeshüko.

³⁰Hezekia hauha Gihon dzüluo pesotsa khalie di süko dupie David nadiu niakratsa kru tsuketa chüwa. Siro Hezekia puo mhatho peteko nu kruolie.

³¹Sidi Babilon nu kezhako dieliemia ketsepie puo ki shü di u kijü nu u ngo zasi chükewako dze ketso kevo-u vawe, Kepenuopfüe puo khapie puo bu puo medo chüshü, süusü puo dojü sie mu puo melou nu kebau si tseishüketuo la zo.

³²Siro Hezekia mhatho kekreiko mu puo mhatho keviko, Amoz nuou siedzekesiu Isaya mhakenguko nu, Juda mu Israel kediko leshüdau nu thupietuo,

³³Sidi Hezekia puo pfutsanuoko ze di zezhüta, mu mia David nuonuoko mekhruko gei kekho-u geinu puo khrupie zhü; siro Juda pete mu Jerusalem nu kelhouko puo se ki puo kerhu mhatho chüshü. Siro puo nuou Manasseh puo sounu kedi chülie.