Read Angami Naga Seyiedze Kenieu 33 Bible Online

Seyiedze Kenieu 33 - Angami Naga bible

Seyiedze Kenieu 33

¹Manasseh kedi chükelie ki teicie kerekenieta, mu puo Jerusalem nu cie hiepengouepengou kedi chülie.

²Tsiu puo Jihova kengu ki suoücüko chü, sidi Jihovae Israelko mhodzünu nu u whuokeshü seyieko zho kerütsekecüko do chüta.

³Puoe puo puo Hezekia durhuokewa thechükerükrieko chü lashü, Baal ruosuobako chülie, nanyü seiko[25] chülie di teigei kezhako rüsuo mu süko lie chüta.

⁴Siro puo ruosuobako chüpie Jihova kiu nu shülie, Jihova süu dze pucü, “A za bu Jerusalem nu tuo sei zotuo” ikeshünu bata.

⁵Süsie puo ruosuobako chüpie teigei krodiko la Jihova kiu nu kitie lhanie nu bata.

⁶Siro puo Hinnom nuou Razhau nunu puo nuou thepie ruosuo chü, siro themou rüsa; mha zasiko le di siedze pukeshüko mu kemeduo themoupfhiko ze ituota. Puo Jihova kengu ki mha kesuo chü phita di puo nou va kemeyiewa.

⁷Siro puo thuo terhuomiarhi chükelieu khapie Kepenuopfü kiu nu bata, Kepenuopfü süu dze David mu puo nuou Solomon ki, “Ki haunu mu Jerusalem nu, a thuo Israel seyie pete donu nu kedakeshüu nu, a za khapie tuo sei zotuo;

⁸a Mosa geinu chü hienu di diekhakeshü pete, thezhoko pete, ze morokesuoko mu ahzako zeuze menuokelie sie, a nie puonuoko la kedakeshü kijüu nunu Israel phi bie keyie la salie lhota zo” isikeshüu.

⁹Manasseh-e Juda mu Jerusalem nu kelhou themiako se pie uko bu Jihova Israelko mhodzünu nu u pekakeshü seyieko ki rei mha kesuo chü krakuota.

¹⁰Jihova Manasseh mu puo themiako ki die pushü zo, derei uko puo pfhe rünyü mota.

¹¹Süla Jihova Asiria nu kediu terhü mhokezhako ze vor uko perhie, süko mhapie Manasseh phalie mu thegiro pie puo phalie di puo ze Babilon nu vota.

¹²Sidi puorei kemezhiekelie ki puo Kepenuopfü Jihova nei chütuoü di puo thuo puo chükerünuolie.

¹³Puoe puo ki cha, mu Kepenuopfüe puo kecha rünyülie mu puo mezhiemelokeshü silie, sidi puo ze la Jerusalem nu puo kedinu shü. Sitse Manasseh-e Jihova sü Kepenuopfü ücü silie.

¹⁴Kenuotsa puo David nadiu la Gihon niakratsa razhau nu, mu Khuo Kharuu nu keleu la chazoutsa dahou puo chü vowa, süu Ofel hou pfü vo ba, mu chü kerükrie phi, süsierei puo chüpahi kezhako bu Juda nadiko nu kuda keba peteko nu bakelie chüwa.

¹⁵Siro puo rüsomia rhuoko mu Jihova kiu nunu terhuo miarhiu, siro Jerusalem nu Jihova kiu kijüthou geinu puo thuo chüpie keba ruosuobako pete biewa, di süko kelhoupie nadiu casie shüwa.

¹⁶Süsie rei puo Jihova ruosuobau kha lapie balie mu süu geinu vitho mu kethe ruosuoko chüshü; sidi puo Juda bu Israel Kepenuopfü Jihova lie chülie morokesuo diekhashü.

¹⁷Siürei themiako süsü rei thechü kerükrieko geinu ruosuo chü baya zo, derei pie uko Kepenuopfü Jihova rübei ketsü la zo.

¹⁸Siro Manasseh mhatho kekreiko dze, puo Jihova ki puo mezhiekemelo mu Israel Kepenuopfü Jihova za nunu puo rüchükeshü kepetha dieko, Israel kediko dze kethuleshüko nu tuoya.

¹⁹Tsiu puo mezhiekemelo, mu kedipuo mhie di Kepenuopfüe puo kecha lielie shikecü, puo kephouma mu puo kepele kejü, siro puo thuo puo chükerünuokelie mhodzü puoe thechü kerükrieko chüpie ba di Asherako mu terhuomiarhiko khapie keba kheko, siedzekesiko dze kethu leshüdako nu thupietuo.

²⁰Sidi Manasseh puo pfutsanuoko ze di zeta, mu puo kiu nunu puo khruwa. Süsie puo nuou Amon puo sounu kedi chülie.

²¹Amon-e kedi chükelie ki, puo kelhouzha cie mepfüekenieta, mu puo cie kenie Jerusalem nu dilie.

²²Puoe puo puo Manasseh chükewa tuoi Jihova kengu ki suo ücüko chü. Amon-e ruosuo chüpie puo puo Manasseh-e terhuomiarhi chükeshü peteko tsü mu süko lie chü.

²³Siro puoe puo puo Manasseh Jihova mhodzü puo chü kerünuokelie tuoi puo chü kerünuolie mo, derei Amon hau kejokemou chü miemieta.

²⁴Mu puo kituoko puo ngumvü di kedovalie sidi puo ki nunu puo dukhriwa.

²⁵Derei kijü sünu themiakoe kediu Amon ngumvüketako pete dukhriwa, sidi kijü sünu nu themiako puonuou Josia bu puo sounu kedi chüta.