Read Angami Naga Seyiedze Kenieu 34 Bible Online

Seyiedze Kenieu 34 - Angami Naga bible

Seyiedze Kenieu 34

¹Josia kedi chükelie ki cie thethata, mu puo Jerusalem nu cie serepuo dilie.

²Puoe Jihova kengu ki puotoukecü chau nu tuolie, sidi puo rürei thezatsa morei thevitsa vata mo.

³Puo dikelie cie thetha cie puo nhicumia yopuo zoluo rei, puo we puo puo David Kepenuopfü pfhü vüta; mu cie kerekenie cie puo Juda mu Jerusalem nunu thechü kerükrieko, Asherako, mhakepie terhuorhi chükebako morei mha thepezhapie chükelieko biepejüvüta.

⁴Miae puo mhodzünu nu Baal ruosuobako biephroshü mu puoe süko mhogei keba mhare kevi ruosuobako durhuowa; siro puo Asherako dutsha phawa mu mhakepie terhuomiarhi chükelieko morei mhathepezha pie chükelieko duphro phaphapie nyophe chü zolie di süko pie süki ruosuochükewako mekhruko gei kezashü.

⁵Süsie rei puo zievomia ruko pie uko ruosuobako geinu thewa di Juda mu Jerusalem chükemesalie.

⁶Siro Manasseh, Efraim mu Simeon nunu vo Naftali ketso, mu ruoketako khieümhou rei,

⁷puoe ruosuobako bierhuowa, di Asherako mu terhuorhiko vütshiepie nyophe chü zowa, tsiu Israel nadi pete nu mhare kevi thekeshü ruosuobako dumewa sidi puo Jerusalem nu la vorta.

⁸Siro puo dikelie cie kerethetha cie puoe kijüu mu kiu chükemesawa tse, puoe Azalia nuou Shafan mu nadi nu kezhau Maseia, siro kethuu Joahaz nuou Joah ketseshü, Kepenuopfü Jihova kiu kemie laketuo la.

⁹Ukoe phichükezhau Hilkia ki vor di raka se Ukepenuopfü kiu nu se vorkeshüko, sükoe Leviko, sie kepfheko, Manasseh, Efraim mu Israel keshako Juda pete mu Benjamin siro Jerusalem nu kelhouko kinu kekhruolie.

¹⁰Uko süu khapie Jihova kiu nu mhakechü themiako mhatho kemehoko tsüshü, siro Jihova kiu nu mhachü keba themiakoe süu khapie kiu ketso mu chü lakeshü nu shülie.

¹¹Uko süko se vo sei mistiriko mu kikechüko bu ketsie khrüketuo, mu Juda kedikoe uko bu suoketa kinyieko khrüketuo la khashü.

¹²Siro themiako dietho di mhachüshü. Uko mho nu Levimia Jahath mu Obadia, Merari nuonuoko, siro Kohatko nuonuoko Zekaria mu Meshulam idi süko bu mhatho-u meho.

¹³Levimia übouko khousisecü bu thepie kepfüko mho ba di mhatho neiüko nu chüketuoko thapie kie, siro Leviko huomia kethumia, mu mhatho kezhako mu kharu kepfheko chü.

¹⁴Uko raka khapie Jihova kiu nu keshüko se par zhücü ki, zievo-u Hilkiae Jihova Mosa geinu khakeshü thezho leshüdau ngulie.

¹⁵Sitse Hilkia-e kethuu Shafan ki, “A Jihova kiu nunu thezho leshüdau ngulie ho” sishü, di Hilkia leshüdau pie Shafan tsü.

¹⁶Shafan leshüdau se kediu ki vor di kediu ki pu sa di, “N Kituoko bu chünukeshü pete ukoe chü ba zo.

¹⁷Ukoe Jihova kiu nu ngukelie rakako se vo mhatho kemehoko mu mhatho themiako tsüwate” si.

¹⁸Süsie kethuu Shafan-e kediu ki pu di, “Zievo-u Hilkia-e leshüda puo se a tsü” si, sidi Shafan-e kediu mhodzünu süu phrüshü.

¹⁹Kediu thezho nu dieko rünyüshü tse puo pfhenei cierhata.

²⁰Sidi kediue die khapie Hilkia, Shafan nuou Ahikam, Mika nuou Abdon, kethuu Shafan mu kediu kituou Asaia ki shü di.

²¹“Vo di a la mu Israel siro Juda nu tuoluocüko la, ngukelie leshüdau dieko dze Jihova ketsocie; úko pfutsanuokoe Jihova die leshüda hau nu ze morokesuo thupieketuo pete zetuo moketa la Jihova noupfhüu úko gei rushüketuou zha se zotie ru” sishü.

²²Süla Hilkia mu kediue ketsekeshüko Hulda siedzekesipfü ki vo, süpfüe Tokhath nuou Shalum kimia, süu Hasra nuou, pfheneiko kepfheu (hapfü süki Jerusalem nu Ki Kenieu nu baya) uko mha hau dze pie puo ki pushü.

²³Sitse hapfü uko ki, “Israel Kepenuopfü Jihova hikecü puyawe: Nieko ketsepie a ki keshü themiau ki pushülie,

²⁴Jihova hikecü puya: A mha kesuo se vor thechü hau mu sünu kelhouko gei shütuo, leshüda phrüpie Juda kediu mhodzünu keshüu mu thupie ketuo rüseko pete se vortuo.

²⁵Kekreilamonyü ukoe a khawa di mha thepie terhuo kekreiko tsüte, u thuo u dzie se chükelieko se a nou va kemeyieketuoko chü, süla a noupfhü lapie thechü hau geishütuo mu süu biepemhewalie lho zo.

²⁶Derei Juda kediu, nieko ketsepie Jihova dze ketsokecüu ki zo we nieko hikecü pushülie; Israel Kepenuopfü Jihova hakemhie puya: No rünyülieketa dieko la.

²⁷N meloue kephouma la kemezhie mu no thechü hau mu sünu kelhouko gei vorketuo dieko silie di Kepenuopfü mhodzünu n chükerünuolie, mu no a mhodzünu n chü kerünuolie, n pfhenei cierha mu a mhodzünu kraliecü la, a rei n pfhe rünyüliete, idi Jihovae puya.

²⁸A n ze n pfutsanuoko ki votatuo, noune nunu n ze vo n mekhru nu shüwatuo, sidi n mhi bu we a mha kesuo pete se vor thechü hau mu sünu lhouketuoko gei shüketuo ngulie lho” sishü. Süsie uko die se kediu ki la vor.

²⁹Sitse kediu Juda mu Jerusalem pehüko pete kie kengulie.

³⁰Sidi kediu Juda themia pete, Jerusalem nu kelhouko, zievoko mu Leviko, mu themia kecükezha pete zelie di Jihova kiu nu kho; sidi puo uko kesi ki nu Jihova kiu nunu ngukelie dietseidiekho leshüdau nu dieko phrüshü.

³¹Siro kediu sie puo tha nu thalie di Jihova ze kediekholie, Jihova siemedzi di puo diekhakeshüko, puo zhapuko, puo melou pete mu puo ruopfü pete se di leshüda hau nu thupieketuo kediekhokelieu ze zotuoüshü.

³²Süsie puo Jerusalem mu Benjamin nunu vorkeba peteko bu süu ze thatuoükecü chüshü. Tsiu Jerusalem nu kelhouko bu Ukepenuopfü, uko pfutsanuoko Kepenuopfü ze kediekhokelieu medzituoketuo chülie.

³³Siro Josia Israelmia kijü pete nu kerütsekecü pete chü phrewa, di Israel nu ketuo pete bu Jihova uko Kepenuopfü rüsuolie. Puo kelhou chie uko Jihova uko pfutsanuoko Kepenuopfü kinu rüreita mo zo balie.