Read Angami Naga Seyiedze Kenieu 35 Bible Online

Seyiedze Kenieu 35 - Angami Naga bible

Seyiedze Kenieu 35

¹Josia Jihova la Jerusalem nu ciekevo zha puo pie balie; ukoe thekhrü therieu nu zha keredia nhie ciekevo kuonuou dukhrilie.

²Puoe meri kinu la zievoko pethoshü mu Jihova kinu lietho la uko chü kethepfushü.

³Sidi puo Leviko Israel pete kepethako mu Jihova la mesaketuoko pete ki pu di sie, “Kemesa dietseidiekho bouu khapie Israel kediu David nuou Solomon-e chükeshü kiu nu bawalie; nieko tsiewe nie bouka geinu süu pie sa morei vite. Tsie nieko nie Kepenuopfü Jihova mu puo themia Israel lie chüliecie.

⁴Nie pfutsanuoko kikru le di nieko kezapie keba tuoi nie thuo nie keselie, Israel kediu David mu puo nuou Solomon-e thupie kezhüko medzi di chülie.

⁵Siro nie pfutsanuoko kikru le di nie siezedzürie nie themia mhatho kekrei chüketuoko kezapie kebako le di kemesachü nu thaliecie, u pfutsanuoko kikru kehoupuo bu rei Leviko saliecie.

⁶Sidi ciekevo kuonuou dukhrilie, mu nie thuo nie chü kemesalie, sidi nie siezedzürieko la mhakeselie, Jihova die Mosa ki pukeshüko chüketuo la.”

⁷Süsie Josia ciekevonyiu la themia vor keba pete la mhakhapie themiako tsükeshü, khuonuo kro nunu tekuonuo mu temvünuo nyie ser, mu thudo nyie se; hako kediu vie nunu zo.

⁸Tsiu puo khro kezhako u neisiei di themiako, zievoko, mu Leviko la mhakhashü. Hilkia, Zekaria mu Jehiel, Kepenuopfü kinu mha keseyakezha kezhako ciekevo sephra se zievoko ketsü tekuonuo mu temvünuo nyie kenie di krie sorou mu thudo krie se.

⁹Konania rei, Shemaia mu Nethanel mu puo siezeko Hashabia mu Jeiel mu Jozabad, Leviko kezhakoe khapie Leviko ketsü ciekevo sephra nu tekuonuo mu temvünuo nyie pengou mu thudo krie pengou.

¹⁰Kehou la dojülieta tse, zievoko u thanu tha phrelie, siro kediu diekhakeshü ze di Leviko u thuo u kro-u nu tha phrelie.

¹¹Sidi uko ciekevo kuonuou dukhrilie, siro zievokoe süko kinu liekelie thezieu kegeshü ketha ki Levikoe khunuoko zhü lowa.

¹²Siro uko Mosa leshüdau nu thupie ketuo tuoi, u puonuo kikru le di keza se keba themia kroko ya keza voketuo la kethe ruosuo chüketuoko khakreipie balie. Thudoko rei se sükemhie chüshülie.

¹³Thezho nu tuoi di uko ciekevo kuonuou mi nunu houlie; siro uko mha kemesa khakeshüko we pie li kezhanu rei kecü nunu rei süko belie di se vo themia pete tsü mhamhashü.

¹⁴Süsienu uko thuo uko la mu zievoko la mha keselie, kekreilamonyü Aron nuosenuoyie zievokoe kethe ruosuoko khakeshü mu chüshuo vieko chü di teizeiketso merei ba zo; süla Levikoe uko thuo uko la mu zievoko la mha keselie.

¹⁵David mu Asaf mu Heman mu kediu kepethau Jeduthun diekhakeshüu ze di Asaf nuonuo tsali kechükoe u thanu thalie, siro kikhakepfhekoe kharu u tsenu thalie, uko mhatho-u chü morei vi, uko siezedzürie Levikoe uko la mha keseshüwaketa la.

¹⁶Sidi sünhie Jihova lietho pete keselie, kediu Josia diekhakeshüu kemhie di ciekevo ze mu kethe ruosuoko chüpie Jihova ruosuo bagei shüketuo la.

¹⁷Süteiki Israelmia vor kebako ciekevo pie balie mu khreisakemo niekhrüda nyiu zha thenie ze vo.

¹⁸Siedzekesiu Samuel teiki yawinu ciekevo piebakecü süu tuoi chü mo zo; Israel kediko miapuorei Josia, mu zievoko mu Leviko mu Juda mu Israel vor keba pete mu Jerusalem nu kelhouko hakemhie di ciekevo zeshü mo zo.

¹⁹Ciekevo zha hau Josia dikelie cie kerethetha cie piebalie.

²⁰Mha hako sie, Josia rüsuokiu keselie tse Ijipt kediu Nekoe Efrat gei Karkemish nunu kegeituoü khorlie mu Josia puo petsou pra.

²¹Derei Nekoe themia ketsepie puo ki shü di sie, “Juda kediu, a n ze kedipuo chüta? A thie n petsou phirzhü mo ho, derei a ze terhü chü kethau petsou phirkezhü zo; siro Kepenuopfü a bu rükrilienukecü diekhashüte. A zeketuo Kepenuopfü petsou motalie, siro puo n pekawalie lho” sishü.

²²Derei Josia-e puo kinu rüreita mo, derei puo ze kegei zotuoü di puo thuo puo chüpekreilie. Puoe Jihova die Neko tie nunu keparko rünyü mota, di Megido razhau nu rüyachünu lerta.

²³Sitse theü kepieko ciepie kediu Josia vashü; süki kediu puo thekeko ki, “A ze tuotaliecie, a rüza pesuo phiwate mu” sita.

²⁴Süla puo thekeko guragari geinu puo pielie di puo guragari kenieu[26] nunu puo ze Jerusalem nu vor. Sidi puo siata di puo puonuoko mekhru nunu puo khruwa. Juda mu Jerusalem pete Josia krü.

²⁵Jeremia rei Josia la thekrü puo chüshü; keliyakezha thepfuko rei thenuko rei pete Josia krükecü thie ketso rei putuoya zo. Uko hako se ahza tuoicü puo Israel nunu chüshü, mu harie hako Thekrüko nu ba we.

²⁶Siro Josia mhatho kekreiko, puo Jihova zho-u ze di mha kevi chükeshüko,

²⁷puo mhathoko, therie mu thela rei thupie Israel mu Juda kediko dze leshüdau nu tuo zo.