Read Angami Naga Seyiedze Kenieu 36 Bible Online

Seyiedze Kenieu 36 - Angami Naga bible

Seyiedze Kenieu 36

¹Kijüu nu themiako Josia nuou Jehoahaz zelie di puo bu Jerusalem nu puo puo sounu kedi chülie.

²Jehoahaz-e kedi chükelie ki puo cie mepfüeseta; mu puo khrü se Jerusalem nu dilie.

³Sitse Ijipt kediu Jerusalem nunu puo khuwa di kijüu gei rakachü talent krie puo mu suna talent puo khruota.

⁴Siro Ijipt kediu puo siezeu Eliakim bu Juda mu Jerusalem mho kedi chüta di puo za kedipie Jehoiakim chüwa, derei Nekoe puo dzürieu Jehoiahaz telie di puo ze Ijipt nu vota.

⁵Jehoiakim-e kedi chükelie ki cie mepfüepengou ta, mu puo Jerusalem nu cie kerepuokrü kedi chülie. Puoe puo Kepenuopfü Jihova kenguki mha suoücüko chü.

⁶Babilon kediu Nebukadnezar puo petsou khor, mha pie puo phalie di puo ze Babilon nu vota.

⁷Nebukadnezar-e Jihova kiu nu hiekhouko huo rei chü se vo Babilon nu puo rüsuokiu nu shülie.

⁸Jehoiakim mhatho kekreiko, puoe kerütsekecü chükewako, mu mha kesuo puo geinu ngukelieko, süko thupie Juda mu Israel kediko leshüdau nu tuo we, tsiu puo nuou Jehoiakin puo sounu dilie.

⁹Jehoiakin kedi chüvücü ki cie thethata, mu puo Jerusalem nu khrü se di zha ker dilie. Puo Jihova mhinguki suoücüko chü.

¹⁰Teicieu nu bayie ki kediu Nebukadnezar-e puo kelie ze Babilon nu vorlie, Jihova kiu nu puomakere mekhouko sa di, siro puo siezeu Zedekia bu Juda mu Jerusalem mho kedi chüta.

¹¹Zedekia kedi chükelie ki cie mepfüepuota mu puo Jerusalem nu cie kerepuokrü di balie.

¹²Puoe puo Kepenuopfü Jihova mhingu ki suoücüko chü. Puoe Jihova die puo tie nunu pukeshü siedzekesiu Jeremia mhodzünu puo thuo puo chü kerünuolie mota.

¹³Puoe kediu Nebukadnezar puo bu Kepenuopfü za se di rüsekeshüu ngumvü sata; puoe Jihova, Israel Kepenuopfü ki rürei lalietuoü mo di pietsümvü metei mu puo nou reta.

¹⁴Zievoko donu pehüko mu themiako rei dietho mothor zota di mha kerütsekecü chüyakezha seyieko medzita; sidi ukoe Jihova kiu, puoe Jerusalem nunu chü kemesakeshüu perhuwa.

¹⁵Jihova, uko puonuoko Kepenuopfü puo chaliemia ketsepie uko ki shü baya zo, puoe puo themiako mu puo kebachüu ngumezhiecü la.

¹⁶Derei uko Jihova chalieko kre, puo dieko pese, mu puo siedzekesiko zhase zotha Jihova noupfhüu puo themia gei vortacü tso, mhachü pevi lakelie ba jü zota kemochie.

¹⁷Süla puo Chaldian kediu ze uko petsou vorta, süue zhiecha üse uko kemesa chü nunu uko khriesako duwa, thepfunuo kemedzüko, rüüko, ketsako mu phichüketako rei ngumezhie mo zo; puo uko pete khapie puo dzienu shüwate.

¹⁸Tsiu Kepenuopfü kiu vie hiekhouko pete, kezhakecü Jihova kiu kinyiko mu kediu mu puo kezhako kinyiko pete se Babilon nu vota.

¹⁹Süsie uko Jihova kiu thewa, mu Jerusalem dahou durhuowa, mu süu kedikiko pete mi pie thewa, mu puo viebou puoma kereko pete biepesuowa.

²⁰Puoe zhiecha nunu takelieko teze Babilon nu vor tuota di Persia kedi chüsechülie kemochie uko bu puo mu puo nuonuoko theke chütuota.

²¹Jeremia tie nunu Jihova dieu tseilieketuo la, kijüu bu puo sabatko balie kemochie. Puo ruozhüketa teiu nu rei sabat ze ba cie hiethenie tsei zo.

²²Persia kediu Sairos kedi chülie theriecie, Jeremia tie nunu Jihova die bu tseilieketuo la, Jihovae Persia kediu Sairos ruopfüu hüshü di puo bu kedirüvie pete nu pesishü mu thu rei sashü.

²³“Persia kediu Sairos hakemhie puya: Jihova teigei Kepenuopfü kijü nu kedi pete kha a tsüshüte, mu puo a bu Juda nu keba Jerusalem nunu ki puo chü puo tsü nu beiya. Nie pete donu suomiae puo themia shiü puo Kepenuopfü Jihova bu puo zetuolie. Sümia bu kholiecie” sishü.