Read Angami Naga Seyiedze Kenieu 4 Bible Online

Seyiedze Kenieu 4 - Angami Naga bible

Seyiedze Kenieu 4

¹Puoe merenyi pie ruosuoba puo chülie, puocha thu mepfü, puozha thu mepfü mu puo rükrie thu ker.

²Süsie puo mha thepezhapie dzükezha puo chü mu süu metou; siro süusü puo nyie tietsapuo nu kekreitsa ketso thu ker, mu puo rükrie thu pengou. Siro puo khie whi kevo-u thu ser.

³Süu khro puocha chükecü thu kerürkecü chüpie ba; cha kenie chü di, süu chücü ki kesa chükelie mepfü kerhi cha kenie ba.

⁴Süu thudo kerekenie gei tha; se pesotsa petsou, se niakhratsa, se pekhrotsa petsou mu se niathutsa petsou; dzükezhau chüpie uko gei tha. Mu uko sietsako pete puonoutsa petsou.

⁵Puo keshüu dziezhü ne de; puokhieu tehie khie tuoi, mu terhuobiepou kemhie, süu bath[3] nyie se chülie kevi balieya.

⁶Puo dzülu khou ker chü sashü, pengou bu pekhrotsa mu pengou pesotsa ba. Hako nunu kethe ruosuo la sekewako khrüwa mu dzükezhau liro zievoko bu u khrüwa iketuo la.

⁷Siro puo ki pukeshü tuoi suna mituba ker chülie, di süko khapie kerüsuoki nu balie, pengou pekhrotsa mu pengou pesotsa idi.

⁸Süsie puo mizhü ker chüpie rüsuokinu balie, pengou thezatsa mu pengou thevitsa idi. Siro puo suna khou krie puo chülie.

⁹Siro puo zievoko bou, mu kibou kezhau, mu kibou kikhako merenyi pfüpie dawa.

¹⁰Sidi puo dzükezhau bu kiu niathu pekhro kevatsa balie.

¹¹Mu Huram-e liko, livüko mu dzieteikhouko rei chüshü, Sidi Huram-e kediu Solomon la Kepenuopfü kiu chü tseilie,

¹²co kezhanie, mha khouko, co nie gei puo tsünie, conie tsügei keba mekhounie gei puo khukethuko.

¹³Siro mha rhikeshüko gei turaü si krie dia chükecü, co puo gei turaü si cha kenienie di chükecü bu co nie tsügei keba khounie wheketuo la.

¹⁴Puo mha bako, mu shüko gei dzülukhouko,

¹⁵mu dzükezhau mu süu khro thudo kerekenie rhishü.

¹⁶Liko, mha keka mu zohucieko mu mhanyamhara peteko mesepie kediu Solomon-e Jihova kiu la Huram-abi bu chü phre.

¹⁷Jordan razhau Sukot mu Zereda donu rügakezhü nunu kediue miarhiko chülie.

¹⁸Solomon-e mha hako chü pekra phiketa la merenyiko mesi le toulie mota.

¹⁹Hidi Solomon-e Kepenuopfü kiu nu kebanyako pete chülie; suna ruosuobau, Kepekie Niakhrüdau la mizhüko.

²⁰Chülie nu di pukeshü tuoi, kemesa bouu nu petuketuo la suna kethopie kechü mitubou mu mitubako;

²¹nyiepouko, mitubouko, suna pie kechü mha bekelie vie,

²²mi kepemhe vieko, dzieteikhouko, mhare kevi khapie baketuo khouko, suna kethopie kechü liko: Kinutsa kikhako nunu kemesatho chü nu kele mu rüsuokiu kibouko kikhako suna phre.