Read Angami Naga Seyiedze Kenieu 5 Bible Online

Seyiedze Kenieu 5 - Angami Naga bible

Seyiedze Kenieu 5

¹Solomon-e Jihova kiu la mhathoko chü tseikelie sie, sidi Solomon-e puo puo David-e khapie Kepenuopfü ketsü rakachü, suna, mu hiekhouko pete se vor Jihova rüsuokiu nu shülie.

²Süsie Solomon-e Jerusalem nu Israel pehüko mu seyienu krütako, Israelmiako chienuo krütako pete kie kengupie Jerusalem nu shülie di David nadiu Zion nunu dietseidiekho bouu se vortuoülie.

³Sitse thekhrü thenieu nu thenyiki Israel thepfuko pete vor kediu mhodzünu kengulie.

⁴Siro Israelmia pehüko pete vorlie mu Leviko dietseidiekhobouu pie sielie.

⁵Sidi uko dietseidiekho bouu, kehou pfhekiu mu pfhekiu nu bayakezha kemesa hiekhouko se vorlie; zievoko mu Leviko süko pie khor.

⁶Siro kediu Solomon mu Israel kehou pete puo mhodzüki kengupfü dietseidiekhoubouu mhodzünu tuo di tekuo mu thudoko pie ruosuo chükecüko phrü mu le kekralie kenjüta.

⁷Süsie zievokoe Jihova dietseidiekho bouu se vor di Cherubnie shü khro kemesa kiu nu thechü kemesatho-u nu khapie balie.

⁸Siro Cherubnie u shü kelhapie dietseidiekho bouu mho batacü la, unie thuo süu mu puoseiko kewheko chü zolieta.

⁹Seiko chaphicü la kemesabau mhodzünu keba kemesa chüu nunu we nguya; derei chazounu we ngulie kenjü; mu süko thie ketso rei si baya zo.

¹⁰Israelko Ijipt nunu parkelie ki Jihova uko ze kediekhokelie Horeb nunu Mosae tsiekhranie khapie dietseidiekho bouu nu shüpieketuonie sie mhakekrei puorei sünu ba mo.

¹¹Zievoko kemesa chüu nunu parta tse (vor keba zievoko pete, u la kekreikecü le mo zo di u thuo u chü kemesalieta),

¹²tsalikechü Leviko, Asaf, Heman mu Jeduthun, uko nuonuo mu u seyieko linen pfhe kemese se u ketsopfü di mhakhou kekreiyakezhako, übouko, nyarübouko ze di ketsükekhou zievoko mia krie puo di mepfü sa di mhabou niathutsa thalie.

¹³Ketsükekhouko mu tsalikechükoe Jihova thezie di puo tshekecü keze di mia bu u pfhe sikelie chükeshüu uko zha, mu ukoe ketsüko, mhakhou kekreiyakezhako mu übou kekreiko rei se Jihova tshe di, “Puoe vicü la, Puo kekhrie rüdiyakemo-u ba seiyakezhau” ikesie ki, kiu, Jihova kiu sü kimhou thuo tshupfü bata.

¹⁴Süla zievokoe kimhouu mhodzünu nu tha di lietho chülie kenjüta; Jihova kesokezie thuo Kepenuopfü kiu tshupfü baketa la.