Read Angami Naga Seyiedze Kenieu 6 Bible Online

Seyiedze Kenieu 6 - Angami Naga bible

Seyiedze Kenieu 6

¹Süsie Solomon pukecü, “Jihovae pucü puoe zeibouikecü nu batuoü sishü.

²A n la ki kevi puo chüshüte, n bu kechachie baketuo chü puo” sishü

³Süsie kediu rüreilie di japie Israelmia kengukelie peteko tsüshü, süki Israel kehou pete tha.

⁴Mu puo sie, “Jihova Israel Kepenuopfü tsheliecie, puo puo tie nunu a puo David ki phrakeshüu puo dzie se chü tseishüte, puo pukeshü,

⁵‘A Ijipt kijü nunu a themiako ze parkelie yawinu, Israel seyieko donu nadi puorei kedapie sünu nu a za bu balietuoü di ki puo chü a tsünushü mo zo, mu a themia Israelko mho kekhakezha puo bu batuoü di miapuorei keda mo zo;

⁶derei a a za bu batuoü di Jerusalem we kedaliete, mu a David bu a themia Israelko mho batuoü kedaliete.’

⁷A puo David-e Jihova, Israel Kepenuopfü za la ki puo chütuoü puo noutuota,

⁸Derei Jihovae a puo David ki, ‘A za la ki puo chütuoükecü no vi se zo;

⁹Siürei n bu kiu chülie lho, derei nuo puo penuopie n tsüketuou bu a za la ki puo chütuo we’ si.

¹⁰Tsiu Jihovae phrakeshüu chüshüte, a a puo David chüu nu sierlie di Israel kedibau gei balieketa la, Jihova pukeshü tuoi, a Jihova Israel Kepenuopfü za la kiu sü chüliete.

¹¹Sünu a Jihova puo themia Israelko ze dietseidiekhobouu khapie baliete” si.

¹²Sidi Solomon-e Jihova ruosuoba mhodzü Israelmia vorkeba peteko kengu nu tha di puo dzienie yhashü.

¹³Solomon-e merenyi se kechü mhaba puo puocha puozha thu pengoungou mu puo rükrie thu sekecü chüpie bata; mu puo süu gei thalie. Süsie puo Israel kehou pete mhodzünu khoutoulie di puo dzie yhapie tei petsoulie.

¹⁴Sidi puo sie, “O Jihova, Israel Kepenuopfü, teigei rei kijü rei terhuo n mhiekecü tuo mo zolie, u nou pete se n mhodzünu tuoyakezha n kituoko gei n dieu se baya zo mu uko khrie sei tuoya zolie.

¹⁵N kituou, a puo David ki phrakeshüu setuo zo. Ketho, no n tie se phrashü mu n dzie se thie süu chü tseishüte.

¹⁶He-i Jihova, Israel Kepenuopfü, süla no n kituou a puo David ki phrashü di sie, ‘Mhanuü n nuonuoko n tuoi a zho-u zetuolie liro, Israel kedibau gei mia puo bu ba moketa chülie lho zo’ ikeshü se balieyi.

¹⁷Süla he-i Jihova, Israel Kepenuopfü, no n kituou David ki phrakeshü n dieu chü kemeteishücie.

¹⁸“Derei Ukepenuopfü kijüu themia ze lhou ba ketholietuo me? Tei mu tei kerükrietho-u zorei n khapie balie kenjü eru, a chükelie ki hau sü silie lho zo.

¹⁹He-i Jihova a Kepenuopfü n kituou kecha mu puo mezhiekemelo leshü zocie, n kituou n ki cha mu melo kebau rünyüshüyi,

²⁰No n za khapie batuoü di phrakeshü chüu, n mhi bu teizei teiso metsei ki hau meho zo balie di n kituou thechü hau nunu chakeshü rünyülie thienyü.

²¹Siro n kituou mu n themia Israelko thechü hau petsou di chakeshü ki; no n kebachü teigei nu rünyüshücie; rünyüshü di kejo vashücie.

²²“Mhanuü miapuonie puo siezanuomia gei phoumawata di puo bu rüse tuoüta, mu vor ki hau nu n ruosuoba mhodzünu nu rüse ro,

²³no teigeinu rünyüshü di chüshücie, n kituoko ketso di kekrükewamia kejo zhakhra bu u tsügeitalie, mu kemezhümia mezhükecü mhie u zhakhra chüshücie.

²⁴“N themia Israel n gei phoumawa di u ngumvümia mhodzünu tetsuta derei uko rürei n ki lavorlie, n za kielie, chalie mu ki hau nunu n ki u mezhiemelolie ro,

²⁵no teigei nu rünyülie di n themia Israel kejo vashücie, mu uko ze no kijü kha uko puonuoko tsükeshüu nu la vorshücie.

²⁶“Uko n gei phoumakewa la teiu khalieta di teirü mota ro, uko thechü hau petsou di chalie, n za kielie mu no u pechükeshü la uko kephouma nunu rüreilie ro,

²⁷no teigei nu uko pfhe rünyülie di n kituo n themia Israel kejo vashü mu no morokesuo cha keviu pie uko pethashü, di tei bu kijü n themiako bu wekelie nu rü tsurshücie.

²⁸“Mhanuü kijüu nu pekrieta, thesa mha kepeka khuko, kuprie, morei zope bata ro; mhanuü uko ngumvümia bu uko lhouketuo kijü kehourarei uko whuo; kemezhiekecü kehoupuorei, kechükenyü kehoupuorei bata,

²⁹mia puo thuo morei n themia Israelko kehoupuorei puo thuo puo mezhie si mu puo nousuo la puo dzie yhapie ki hau petsou di cha ro,

³⁰no teigei n kebachü nunu rünyü di kejo vashü mu no mia puopuo nou kemenguu khashü tsücie, no mia pete nou siyakezha la.

³¹Uko bu n prei di uko kerheichie no hie puonuoko tsükeshü kijüu nu n zhoko se di lhou tuolieketuo la.

³²“Sütuoi chazoumia puo, n themia Israel kemomia puo, n za kezha mu n kekuo dzie, mu n dzie cha se kebau la kijü kepetse puo nunu vor ro, mu ki hau petsou di cha ro,

³³no teigei n kebachü nunu rünyülie di, rüso-u n ki kecha pete chü puo tsücie; kijüu themia peteko bu n themia Israelko mhie n za si mu n preilieketuo la, mu uko bu n la chükeshü hau n za se kieya ücü silieketuo la.

³⁴“Mhanuü n themiakoe n ngumvümia ze terhüchütuoü, no uko ketsepie cha kehoutsa puo shü zorei, n thuo kedakelie nadi hau, mu n za la ki chükeshüu petsou di chakeshü ki,

³⁵no teigei nu uko kecha mu uko mezhiemelokecü rünyü di uko nyieu leshücie.”

³⁶“Mhanuü uko n gei phomawata miapuorei phoumakemo jücü la, no uko gei n nou meyieta di uko khapie ngumvümia tsüwa, di uko teze kepetse morei kepenuora rei kedie chü vota.

³⁷Sirei ukoe kedie chü voketa kijüu nunu mhale di u nou kedilie, mu u bu kedie chüketuo kijü nunu n ki u mezhiemelo di sie, ‘Hie phoumawate’ ikecü pu ro,

³⁸uko mia die chüketuo kijü nunu u kele pete mu u melou pete se u nou rüdilie di, u kijüu, no khapie u krünuoko tsükeshüu no kedakelie nadiu petsou mu a n za la chükelie kiu petsou di cha ro,

³⁹no n kebachü teigei nu uko kecha mu uko mezhiekemelo rünyü di uko nyie leshü mu n themia n gei phoumakewako kejo vashücie.

⁴⁰He-i a Kepenuopfü n mhi bu mhirhoshü mu n nyie bu rünyüshüyi.

⁴¹“O Jihova, Kepenuopfü, tsiewe sielie di n rüleibau nu votacie, no mu n kekuo dietseidiekho bouu. He-i Jihova, Kepenuopfü, n zievoko bu kelakelie dzieliecie, mu n gei diethokezhako bu n kevi nunu u neiliecie.

⁴²He-i Jihova, Ukepenuopfü, no kenhekelieu khawa hiecie, n kituou David la n kekhrie rüdirüli kemo rükrashücie” sishü.