Read Angami Naga Seyiedze Kenieu 7 Bible Online

Seyiedze Kenieu 7 - Angami Naga bible

Seyiedze Kenieu 7

¹Solomon kechau tseita tse, teigei nu mi tsur di kethe ruothoko mu ruosuoko thepejüwa, mu Jihova kesokezieu rüsuokiu tshupfü bata.

²Siro Jihova kesokezieu Jihova kiu tshulieketa la; zievoko Jihova kiu nu lelie kenjüta.

³Siro Israel themiako pete miu tsurkecü mu Jihova kesokezieu rüsuokiu gei bakelie ngu tse, uko zerepfü zhülie di rüsuo mu Jihova tshe di pukecü, “Puoe vicü la. Puo kekhrie rüdiyakemo-u kechachie bayakezha la,” si.

⁴Süsie kediu mu themiako pete Jihova mhodzünu nu ruosuo chü.

⁵Kediu Solomon-e khakeshü ruosuo liro mithu nyie mepfüekenie mu tekuo nyie krie puo di mepfü, sidi kediu mu themiako pete Kepenuopfü kiu chü kemesalie.

⁶Siro zievoko u thanu thalie, Leviko rei kediu David-e Jihova ketshe la setuoü di chükeshü übouko se di thalie, puo kekhrie rüdiya kemo-u kechachie bayakezha la kehoukipuorei David uko mhatho se di ketshe ruosuo khashüya; uko ütsalitsa zievoko ketsü khoushü; mu Israel pete siethata.

⁷Solomon-e kitiezha metsuo nu Jihova kiu mhodzünu kebau chü kemesalie; puo süki nu kethe ruosuo mu vitho ruosuoko khashükewa la, kekreilamonyü merenyi se kechü ruosuoba Solomon-e chükelieu kethe ruosuo mu themuoko mu tierko ruosuoko khapie zhüketuo ba jükecü la.

⁸Süteiki Solomon-e thenyiu zha thenie chü mu Israel pete puo ze ba, Lebo-hamath nunu vo Ijipt Guodzüu ketso kehoukro kezha se puo chü.

⁹Sidi zha thetha nhie we kehouu kemesü se puo chülie; uko ruosuobau chükemesakeshü mu thenyiu nu zha thenie bawaketa la.

¹⁰Thekhrü thenieu nu zha mepfüese nhie puo themiako bu u nei mu Jihovae tseiüvi pie David mu Solomon, mu puo themia Israel pengukeshü la u noumvü di uko ketsepie u kinu shüwa.

¹¹Hamhie di Solomon-e Jihova kiu mu kediu kiu chü tseilie; Solomon-e Jihova kiu mu puo thuo puo kiu la chütuoü di rhükelie pete chü pevi tseilie zo.

¹²Süsie Jihovae theva gei Solomon pengushü di puo ki, “A n kecha sishüte, mu a a thuo a la thechü hau bu ruosuokechü ki puo chüketuo kedaliete.

¹³A teiko khawa di tei bu rü mota ro, morei kuprie bu kijüu pekaperuowa, morei thesa ketsepie a themia donu shücü ki.

¹⁴A themiako a za se kiekelieko u thuo u chü kerünuolie di a ki u mezhiemelo, a zie pfhülie, mu u kerüzhü chako nunu rüreilie ro, a teigeinu rünyülie di uko kephouma vashü mu uko kijüu chü keshürhoshütuo we.

¹⁵Mu a tsie mhirhoshü mu a nyie rei thechü hanunu chakeshüu rünyü tou ba zotuo.

¹⁶A tsie ki hau kedalie mu chü kemesalie di a za bu sünu ba seilietuoü bate, puotei pete nu a mhi mu a meloue sünu ba zotuo.

¹⁷No zowe, n puo David tuoi di a mhodzünu tuolie, a n ki diekhakeshüko, chünukeshüko mu kemesa zhoko chü mu ze tuo zokelie sie,

¹⁸a n kedibau chüpie balie zotuo, a n puo David ki pukeshüu, Israel nu mia puo bu di baketuo pejüshülie lho zo” ikeshüu chüshü zotuo.

¹⁹Derei mhanuü no[4] rüreita di chünukeshüko mu a die khapie n mhodzünu keshüko vawa di vo terhuo kekrei lie chü mu rüsuoketa sie.

²⁰A kijü kha n ketsü nunu n[5] phewatuo; mu ki hauha, a za la chü kemesakelieu a mhikinu kelhouwatatuo, sidi puo bu themia peteko donu zasizapra chü mu thetha pfütuo.

²¹Sidi ki hau chü kerükriekelieu üse kehoupuorei puo khieki kephimia bu u ngo di sie, ‘Kiüdi Jihova kijü hau mu ki hau gei hita mu?’

²²Sitse ukoe, ‘Ukepenuopfü, Ijipt kijü nunu uko ze parkeshüu khawa di, terhuo kekreiko ze, süko rüsuo mu süko lie chüketa lalie; siketa la puo mha kesuo se vor uko gei shüte’ ” situo.