Read Angami Naga Seyiedze Kenieu 8 Bible Online

Seyiedze Kenieu 8 - Angami Naga bible

Seyiedze Kenieu 8

¹Solomon-e Jihova kiu mu puo thuo puo ki chükelie teicie mepfü ketsei ki,

²Solomon-e Huram se puo ketsü nadiko chükesa lalie di Israel themiako bu süko nu balie.

³Siro Solomon-e Hamath-zoba nu vo di süu penyülie.

⁴Puoe rayha nu keba Tadmor chüshü mu Hamath nunu mhanya khapie baketuo nadiko chülie.

⁵Süsie rei puoe Beth-horon peso mu Beth-horon pekhro chülie, nadiko dahou, kharuko, cakhako chülie.

⁶Mu Baalath süsie rei Solomon mhakengu pie keba nadi pete, themiako nadoko pete, siro Solomon-e Jerusalem nu, Labanon nu, mu kijü puo rüvie kehoupuo nu rei puo mhakehoupuorei chükenyüu chülie.

⁷Siro Hitko, Amorko, Perizko, Hivko mu Jebusko geinu lhou vorketako pete, Israel kemo tuoketako,

⁸kijüko geinu peshapie keba nuosenuoyieko geinu Israelmiakoe pekawa mokebako Solomon-e uko bu mhatho kereko chü, mu thie ketso rei situo zo.

⁹Derei Solomon-e Israelko bu we puo mhatho die puorei chü mo, uko bu terhüthemia, kezhako mu gura gariko keseyakezhako mu gura keseko chü.

¹⁰Siro kediu Solomon khro kezhakechüko mia krie kenie di hiepengou, hako themiako mho kekuo seya.

¹¹Solomon-e David nadiu nunu Faro nuopfü ze kho puoe süpfü la chükeshü kiu nu shülie, di sie puoe pucü, “A kimia bu Israel kediu David-e chükeshü kiu nu balie lho, Jihova dietseidiekhobouu kevo thechükoe mesakecü la” siketa la.

¹²Süsie Solomon-e Jihova ruosuoba puo chüpie kifükhro-u mhodzüki kebau geinu kethe ruosuo chüpie Jihova tsüshü.

¹³Khunhie puo la chü morokesuo bayakecüko la, Mosae pukeshü ruosuoko ze di sabatko la, khrü kesako la, teicie nu thenyi kezha seko, khreiüshükemo niekhrüda nyi, deobadoko nyi, mu pru nyiko.

¹⁴Siro puo puo David nanyü zho thakeshüko ze di puo rei mhathoko la zievoko kezawa, khunhie puo la zievoko mhodzüki nu shüshü morokesuoko la, Leviko bu ketshe mu chalie chütuo, siro kharu kepfheko bu kharuko keza setuo, situoükecü Kepenuopfü themiau David-e pushüwatakecü la.

¹⁵Siro kediue pukeshü mhie zievoko mu Levikoe mhaca puo nu rei mu kinyi mhathotsa rei mhapuorei vacie moto zo.

¹⁶Sidi Solomon mhatho peteko Jihova kiu mvüdzekeshü yawinu vo chü tseikelie ketso Jihova kiu chü tseilie.

¹⁷Süsie Solomon-e Edom kijüu dzükezhako khie Ezion-geber nu Eloth nu vota.

¹⁸Siro Huram puo kituomia, mu dzükezha zhorüliko siyakezha kituoko ketsepie rou se di puo ki vor mu uko Solomon kituoko sa di Ofir nu vo di sünu nu suna talent krie dia di hiepengou se vo kediu Solomon tsü.