Read Angami Naga Seyiedze Kenieu 9 Bible Online

Seyiedze Kenieu 9 - Angami Naga bible

Seyiedze Kenieu 9

¹Siro Sheba kedipfüe Solomon kemeyie silie tse, ketsokecü kere kro puo se puo dojütuo üdi Jerusalem nu vor, puo siedzi krodi puo mu utko ze di mharekeviko, suna kekra üse ketsie puoma kereko se phi vor. Sidi puo Solomon ki vorlie tse, puo leketuo pete se puo ze kerüchü.

²Siro Solomon-e puo ketsokecü pete kelashü, Solomon-e puo ki pushülie kenjü di pekhrekewa puorei jü.

³Tsiu Sheba kedipfü rei Solomon mhasi ngulie mu puo chükelie kiu,

⁴puo mizhü gei kecücako, puo khro kezhamiako keba zhoko, puo thekeko puo kemehoko mu süko pfheneiko, puo hie kepieko mu süko pfheneiko, puo Jihova kiu nu ketheruosuo khakeshüko ngutse puo gei puo ruopfü tuo motota.

⁵Süla hapfü sie kediu ki, “A thuo a kijü nunu a n dze mu n mhasiko si kevor-u kethoze,

⁶derei a zo vor di a thuo a mhi üse ngukemo ki dielieko pelelie mo zo mu a mhi thuo süko ngushüte. N mhasi tietsa puorei se a ki pu mo, a mia kinu n dze kesiko ki no vi phikuo we.

⁷N themiako u neisiei za balie! N kituoko n dzüki tha di n mhasi rünyü sei bayakezhamia rei u nei za balie!

⁸Jihova n Kepenuopfü bu theja pfüliecie! N Kepenuopfü Israel khrie mu uko bu tuo sei tuo nyücü la, n chüpie uko mho kedi chüshüe, n bu ketho nu mu kemiatho zho se mhachüshüketuo la” sishü.

⁹Sidi süpfüe suna talent krie puo di mepfü, mu mhare kevi kekra, siro ketsie puoma kere khapie kediu tsü, Sheba kedipfü khapie kediu Solomon ketsü tuoicü mhare kevi mharapuorei tuo sa mo.

¹⁰Sizomonyü Huram kituoko mu Solomon kituoko Ofir nunu se kevorko, algum sei mu ketsie puoma kere rei sa se vor.

¹¹Siro kediu algum sei pie Jihova kiu nu mu kediu kiu la chaprako chü, tsali kechüko la übou puorhü chüyakezhapfü rei chülie; Juda kijünu süko mhiecü mhakipuorei ngu mo zoluo.

¹²Siro kediu Solomon Sheba kedipfü kemengu khe, puoe mha se kediu ki se vorkeshü zie, mhakehoupuorei chacüko pie puo tsüshü. Sidi puoe puo kituoko ze la puo thuo puo kijünu vota.

¹³Teicie puo nu Solomon ki vorkelie suna mesi talent krie sorou di hiesorouesorou.

¹⁴Sümhorei lhithoko se kevor, Arabia nu kediko pete, mu kijü nu kezhako suna mu rakachü se vor Solomon tsü.

¹⁵Kediu Solomon-e suna vüpie pezhü kezha krie kenie chülie, pezhü puo la suna shekel krie sorourou.

¹⁶Siro puo suna vüpie pezhü krie se chülie; pezhü puo la suna shekel krie sese, mu kediu süko khapie Lebanon rayha kiu nu baya.

¹⁷Süsie rei kediu tsohu pie kediba kezha puo chülie di suna kevipfü pie süu dawa.

¹⁸Kedibau chapra sorou chü mu u phibau suna pie kechü puo, süko kedibau ze puo chü zo, puotsei lutsahatsa u bou vakhriekecü ba mu losha kenie u bou rüleiba nie khieki tha.

¹⁹Siro losha kerekenie bu chapra sorouko gei chapra tie puo nu losha puopuo bu thakecü chü. Kedirüvie puo nu rei süu mhiecü puorei chü mo zoluo.

²⁰Kediu Solomon mha kekrie hieko pete suna zo, mu Lebanon Ketsa Kiu nu hiekhouko pete suna rüpie se chü; Solomon teiki rakachü üse mhathokemo mhieta.

²¹Huram kituoko ze di kediu rouko Tarshish nu voya; cie se donu va puo Tarshish roukoe suna, rakachü, tsoke, tepfiko mu rüüko[6] toupfü vorya.

²²Hakemhie di Solomon-e kijünu kediko peteko ki kinyi rei mhasi rei vikuota.

²³Tsiu kijünu kedi peteko, Kepenuopfü khapie puonou keshü puo mhasi rünyütuoü di puo pfhü vorya.

²⁴Uko mia puopuokecü mha se vor puo tsü, rakachü pie kechü nya, suna, pfhemenei, rünyie mu mharekeviko, gurako, gadako, teicie kepra se phi vor shüshüya.

²⁵Solomon-e gurako mu guragariko la khunuo ki nyie dia mu gurakese nyie kerekenie ba, puo süko bu guragari nadiko mu kediu ze Jereusalem nu baya.

²⁶Tsiu puo Eufrat nunu vo Filistinko kijü ketso mu vo Ijipt rie ketso kediko pete mho dilie.

²⁷Tsiu kediue rakachü pie Jerusalem nu ketsie tuoi zo shü, mu sedar bo rei krapie Shefela nu khrabvüboko tuoi zoshü.

²⁸Siro Solomon la Ijipt mu kijü kekreira nu rei gurako se vorya.

²⁹Solomon mhatho kekreiko dze therie nunu thela ketso siedzekesiu Nathan dzenu mu Shilonmia Ahija siedzekesidie kepu; mu Iddoe Nebat nuou Jeroboam dze ziemho-u dzeko nu thupie tuo moü me?

³⁰Solomon Jerusalem nu Israel mho cie hiedia kedi chülie.

³¹Sidi Solomon puo pfutsanuoko ze di zeta, di puo puo David nadiu nunu puo khruwa; siro puo nuou Rehoboam puo sou nu kedi chülie.