Read Angami Naga Ezra 3 Bible Online

Ezra 3 - Angami Naga bible

Ezra 3

¹Siro thekhrü thenieu vorlie, mu Israelko u rünako nu lhoulieta tse, ukoe vor Jerusalem nu kengulie.

²Sitse Jozadak nuou Jeshua mu puo keze zievoko siro Shealtiel nuou Zerubabel mu puo siezedzürieko keze sielie, di Israel Kepenuopfü ruosuobau chüketuo dojülie, Mosa Ukepenuopfü themiaue pukeshü zho nu tuoi kethe ruosuo chüketuo la.

³Sidi ukoe ruosuobau khapie puo ba gei shülie; kekreilamonyü ukoe uko zanuoko preikecü la. Sidi ukoe sügei nu kethe ruosuo chüpie Jihova tsü. teisoduü mu thevatie ki ruosuo chüya,

⁴siro uko pru nyiu nyi[1], süu thupie ketuo mhiei di, sidi teisonhie ruosuo khashü, süu chünukeshüu medzi di teisonhie chü morokesuou ze di chü.

⁵Süsie khashü seiyakezha kethe ruosuou chü, süusü khrülhou teiki mu Jihova kemesa nyi pete puotei puo penyi di chü tuoyakezha pete, mu themia kehoupuorei puo thuo puo nei di khapie Jihova tsü.

⁶Thekhrü thenieu teisozha therie nhie nu ukoe mha thepie Jihova tsü sedeta. Sizoshierei Jihova ruosuokiu mvüdzeko dzeshülie mo tuo zoluo.

⁷Siro ukoe priesa pie ketsie mistiri mu sei mistirimia tsüwa; siro kecükekrie mu tier pie Sidonmia mu Turmia tsü di, uko bu Lebanon nunu sedarbo se vor dzükezha nu Jopa nu shü, uko Persia Kediu Sairos kinu ngukelie kemhiei.

⁸Süsie uko Jerusalem nu uko Kepenuopfü kiu nu vorkelie cie kenieu cie thekhrü kenieu nu Shealtiel nuou Zerubabel mu Jozadak nuou Jeshua, unie themia kekrei zievoko mu Levimiako mu mia die chü tuo di la Jerusalem nu vorkelie khe pete ze di Jihova kiu mhatho-u chü sedelie. Unie Levimia u kelhouzha teicie mepfü mu sümhoko bu Jihova kiu nu mhathoko mehoketuo la uko pethoshüwa.

⁹Siro Jeshua puo nuonuo thepfuko mu puo siezedzürieko mu Kadmiel mu puo nuonuo thepfuko Binui mu Hadavia[2], siro Juda nuonuo thepfuko Henadad mu puo nuonuo thepfuko, Levimia hako sie Ukepenuopfü kiu mhathoko meholie.

¹⁰Sidi ki kechükoe Jihova kiu mvüdzeko dzeshülieta tse, Israel kediu David ukoe pupie kezhü tuoi zievoko bu u pfheneiko se di ketsü khoupie Jihova tsheshüketuo la u thuo u thanu thalie, siro Leviko, Asaf nuonuo thepfukoe kejokecü khouko se di thalie.

¹¹Sidi ukoe chieli ketsiepie Jihova tshe, tsiu puo thezie di sie, “Puoe vicü la, puo kekhrie rüdirüli kemo se Israel ngumezhiekeshüe kechachie bayacü la” si. Mu themia pete Jihova tshekeshü ki, shie peto seshü, kekreilamonyü Jihova kiu mvüdzeko dzeshülieketa la.

¹²Derei zievoko kekra, Leviko kekra, siro kikru krüko kekra mu phichümia thiedzü ki kerieu kenguko, u mhinguki nu hau mvü dzeshülieta tse, kra khouita; themia kekra rei u kenei pfü shie tha zo shierei.

¹³Siketa la themiakoe kenei pfhe mu kekra pfhe si kekreilie kenjüta, kekreilamonyü themiakoe shie kemerie chüta, mu süu kepetse nu rei uko pfhe sita.