Read Angami Naga Ezra 4 Bible Online

Ezra 4 - Angami Naga bible

Ezra 4

¹Juda mu Benjamin ngumvükoe mia die kechü nunu la vorkelieko nuosenuoyiekoe rüsuoki puo chüpie Israel Kepenuopfü Jihova tsütuoükezhü silie tse,

²ukoe Zerubabel mu chienuo krütako ki vor di sie uko ki, “Hie bu rei nie ze di chücie, hieko rei nie kemhie nieko Kepenuopfü rüsuoya zocü la, mu Asiria kediu Esar-hadon hie ze hanu vorkeshü yawinu hie rei ruosuo chüpie puo tsü vorta zo” sita.

³Derei Zerubabel, Jeshua mu Israel chienuo krütako pete rei uko ki, “Ki chüpie hieko Kepenuopfü tsüketuotsa we nie hie ze mhachüketuo ba puorei jü; hie thuo hie rübei di Persia kediu Sairos kepu tuoi chüpie Jihova, Israel Kepenuopfü tsütuo” sita.

⁴Süsie kijü sünu themiakoe Juda themiako nou chü kethachüwa, mu uko bu kiu chü michieta,

⁵siro Persia kediu Sairos teiki nunu vo Persia kediu Darius kedi kechü ketso theso pie mha kemehoko so di uko kebvü tuo tso.

⁶Sidi Ahasurus kedi teiki, puo dikelie therie ki, ukoe Juda mu Jerusalem nu kelhouko pejokecü leshü thupie puo tsü.

⁷Mu Artaxerxes teiki, Bishlam, Mithredath, Tabil mu uko zemiakoe leshü thupie Persia kediu Artaxerxes tsü, leshüu Aramaik die nunu thu di thuyie chü sashü.

⁸Rehum kediu kekhruohiu mu Shimshai leshükesiu Jerusalem petsou di hamhiekecü thupie kediu Artaxerxes tsü.

⁹(Rehum kediu kekhruohiu mu Shimshai leshükesiu mu uko kezeko, capiko, thesoukechüko, kezhako, Persiako, Erekmiako, Babilonko, Susa themia, süusü Elamko,

¹⁰mu seyie kekrei therhukepfü kezhau Osnapar-e uko tepie ketsewa di uko bu vo Samaria nadiko mu kerüu khie lu tsatie kijü kekreiko nu lhouketakoe leshü thushü.

¹¹Mu uko ketsekeshü leshüu hau): “Artaxerxes kediu ki shükeshü: N kituoko, Kerüu khie Lutsa themiako n kelushüzhie.

¹²Tsie kediu bu siliecie, Judamia n kinunu hieko ki kevorko Jerusalem nu vote. Ukoe mia perhie petsoukecü, zekesuo rünau chü lazhie; uko puo dahouko, mu puo mvüdzeko chü kesa lazhie.

¹³Tsie kediu bu siliecie, mhanuü rüna hau chülieta mu puo dahouko chü tseilieta ro, ukoe khezhanuo, thekhruo morei chanyieko rei khruoshü motatuo, sidi kediu kinyi bie petsawatuo.

¹⁴Tsie rei kediu ki nu metsie hie yachüya mu süla kediu rhukemo mhatho meho zo keba puotou mo, süla hie kediu pesishütuoü ketseshüzhie;

¹⁵sidi n bu n puonuoko dze thupie ketuo leshüu nunu thedzeko pfhülieketuo la. Mu noe thedzeko thupie ketuo leshüdau nu rüna hauha mia perhie petsou, siro kediu mu rünako bie pesuoyakezha rüna puo, siro thiedzü sünunu kezekesuo pesieshüya ükecü niekoe silietuo, mu süla rüna hau pekawatakecü silietuo.

¹⁶Hieko süla kediu pesishüya, mhanuü rüna hauha chü lalie, mu puo dahouko chü tsei lakelie sie, noe Kerü Lu tsatie kevo kijü nu n ya puorei tuo motatuo” sishü.

¹⁷Sitse kediu uko die kela di sie, “Pie kediu khro kezhau Rehum kezhau, Shimshai leshükesiu, Samaria mu Kerü Lutsakhie ketuo themia kekrei uko zemiako ki shükeshü, keviu chüliecie.

¹⁸Mu tsie nieko ketsepie hie ketsü leshüu phrü menuo pie a kieshüwate.

¹⁹Ae die khashü, sidi vo pfhüwate, süla thiedzü rüna hau sie kedimia perhie, siro mia petsoukecü tsiu sorkari perhiekecü ngulie.

²⁰Thiedzü kedi kekuo kro puoe Jerusalem mho di, sükoe Kerüu Lutsakhie keba pete mho di, tsiu khezhanuo, thekhruo mu chanyie khruopie uko tsü vor zo.

²¹Süla themia hako kekhawatalie, mu a kinu die ngulie kemochie rüna hau chü la motalie.

²²Nieko hau chüwa beicie. Kedipuo la üdi kediu bie pechütieya ga?” sishü.

²³Sitse kediu Artaxerxes leshüu Rehum, Shimshai leshükesiu, siro uko kezemiako mhodzü phrüshü, ukoe rükri Jerusalem nu keba Judako ki kho, sidi uko kemvü chü di kekuo se uko khawa.

²⁴Sidi Jerusalem nu Kepenuopfü ki mhatho-u, Persia kediu Darius dikelie teicie kenie ketso khawata.