Read Angami Naga Ezra 6 Bible Online

Ezra 6 - Angami Naga bible

Ezra 6

¹Sitse Darius kediu die khashü, di Babilon nu leshü thupie kengupie kezhü kiu nu pfhü.

²Derei vo Media rüvie seluoba Akbatana nunu leshütshü puo ngulie, sünu hakemhie di thupie tuo: “Thupie ketuou.

³Puo dikelie teicie therie cie, Sairos kediue die khakeshü: Jerusalem nu Ukepenuopfü la, kiu chüliecie, ruosuo chüyakezha mu kethe ruosuo khashüyakezha thechüu, puo rükrie thu hiesorou, mu puo zha thu hiesorou;

⁴ketsie phrokelie kezhazhakecü cha se mu sei se cha puo chü; siro puo meza kediu kinyi nunu se mezatuo.

⁵Sizomonyü Ukepenuopfü kiu nu suna mu rakachü hiekhou Nebukadnezar-e Jerusalem rüsuokiu nunu chü se vo Babilon nu shükewako, pfhü kengu lalie di se la vo Jerusalem ruosuokiu nu, puo thuo puo tha nu shüwalie, sidi süko pie Ukepenuopfü kinu shüwalie” si.

⁶“Süla tsie Tatenai, Kerükhie Lutsa kezhau, Ahng Shethar-bozenai, mu Kerükhie Lutsa unie zemiako, rüdeitalie;

⁷Judako kezhau mu Judako pehüko bu pheu nunu Ukepenuopfü kiu chülie, Ukepenuopfü ki kechü mhatho hau kebvü hie.

⁸Sizomonyü ae Ukepenuopfü kiu la Judamia pehü hako gei nieko bu chüshü morokesuo thezho puo khashüya. Kerükhie Lutsa nu kediu khezhanuo ngukelie nunu rüsuoki kechü ma pie themiako tsü mhashülie.

⁹Siro se morokesuo kehoupuorei-thudonuo, tekuochü morei temvü, teigei ketuo Ukepenuopfü ki kethe ruosuo chüketuo la, thoulha, metsie, shierei Jerusalem nu zievokoe se morokesuo de, teisonhie khapie uko tsüshü mota hie;

¹⁰sidi uko bu teigei keba Ukepenuopfü nei kechü ruosuo chü di kediu mu puo nuonuoko kerheiro la kecha chüshülieketuo la.

¹¹Siro a thezho puo chü sashüya, süusü themia kehoupuorei hau bie kediwa liro themia süu kinu kizo ciethalie di süu geinu puo rhüpie zhawatuo. Ki süu pie thubuo khru puo chüwatuo.

¹²Ukepenuopfü, puo za sünu balieketau, kehoupuorei, kedimia shierei, morei hau kedikewamia, tsiu Jerusalem nu Ukepenuopfü kiu bie pesuokecümia phewalie. A, Darius, thezho khashü; süu keshürhei di chüshüliecie” sishü

¹³Sitse Kerü Lu tsatie keba kezhau Tatenai, Shethar-bozenai, mu unie kezemiako. Kediu Darius die khakeshüu kemhie chülie.

¹⁴Mu Judamia pehüko kiu chü, tsiu siedzekesinie Hagai mu Iddo nuou Zekaria unie siedzekesidie kepu geinu chü pevi selie. Ukoe Israel Kepenuopfüe diekhakeshü mu Sairos, Darius mu Persia kediu Artaxerxes uko thezho khakeshü medzi di kiu chülie, tsiu süu chü tseiwa.

¹⁵Ki hauha Adar-u khrü teisozha se nhie, Darius kediu kedi chükelie teicie sorou cie chü tseilie.

¹⁶Mu Israelmiako, zievoko mu Leviko, tsiu mia die chü tuo di la vorketakoe u nei se di Kepenuopfü ki hau chükemesalie.

¹⁷Sidi Kepenuopfü ki chü kemesakecü ki pedo krie puo, mvüdo krie kenie, tekuonuo krie dia pie ruosuo chü; siro Israel pete kephouma la ruosuokechü liro, mvüdo kerekenie, Israel seyieko tse di khashü.

¹⁸Tsiu ukoe Mosa leshüdau nu thupiekezhü medzi di zievoko khapie u thuo u thau nu shüwa, mu Leviko u thuo u thau nu shüwa, süu Jerusalem nu Ukepenuopfü mhatho chüketuo la;

¹⁹Mu thekhrü therie nu teisozha keredia nhie mia die chü tuo di la vorketako ciekevo-u nyilie.

²⁰Kekreilamonyü zievoko mu Leviko keze di u thuo u chü kemesalie; uko peteko rei mesate. Süla ukoe mia die chü tuo di la kevorko pete la zievoko la mu u thuo u la ciekevo kuonuo-u dukhrilie.

²¹Israelmia mia die chü tuo di la vorketako siro Jihova, Israel Kepenuopfü rüsuotuoü di kijü nu themiako donunu u perhuwa lhoü di u thuo u kelakreikelieko pete keze süu cü.

²²Sidi teisozha thenie u nei se di khreiüshükemo niekhrüda nyiu nyi; kekreilamonyü Jihova uko chüpie uko bu u nei selieketuo chüshü mu Asiria kediu nou chüpie uko kitsa shü, di puo bu Israel Kepenuopfü, Ukepenuopfü kiu mhatho nu uko khruohikelie la.