Read Angami Naga Ezra 8 Bible Online

Ezra 8 - Angami Naga bible

Ezra 8

¹Hako u chienuo nu krütako, mu hako Artaxerxes kediu teiki Babilon nunu a ze khokecüko.

²Finehas nuonuoko donu Gershom; Ithamar nuonuoko donu Daniel, David nuonuoko donu Hatush;

³Shekania nuonuo mia puo Panosh nuonuoko donu Zakaria, mu puo sa di thepfumia mia krie puo di hiepengou.

⁴Pahat-moab nuonuoko liro, Zerahia nuou Eliehoenai, mu puo sa thepfumia krie kenie.

⁵Zatu nuonuoko liro, Jahaziel nuou Shekania, mu puo sa thepfumia krie se.

⁶Adin nuonuoko liro, Jonathan nuou Ebed, mu puo sa thepfumia hiepengou.

⁷Elam nuonuoko liro, Athalia nuou, Jeshaia, mu puo sa thepfumia hiethenie.

⁸Shefatia nuonuoko liro, Mikeal nuou Zebadia, mu puo sa thepfumia hiethetha.

⁹Joab nuonuoko liro, Jehiel nuou Obadia, mu puo sa thepfumia krie kenie di kerethetha.

¹⁰Bani nuonuoko liro, Josifia nuou Shelomith, mu puo sa thepfumia krie puo di hiesorou.

¹¹Bebai nuonuoko, Bebai nuou Zakaria mu puo sa thepfumia mepfüethetha.

¹²Azgad nuonuoko liro, Hakatan nuou Johanan, mu puo sa thepfumia krie puo di ker:

¹³Adonikam nuonuoko liro, kenuo zenu kevorko, uko za Elifelet, Jeuel mu Shemaia, mu uko sa thepfumia hiesorou.

¹⁴Bigvai nuonuoko liro, Uthai mu Zakur, mu unie sa thepfumia hiethenie.

¹⁵Ae uko kie kengu pie kerü kru Ahava tsa vokezhü nu shülie, sidi hiekoe zha se sünunu razhü chü. A themiako mu zievoko mehosie ru, Levi nuonuo miapuorei ba kemo ngulie.

¹⁶Sitse ae mia ketsepie Eliezer, Ariel, Shemaia, Elnathan, mu Nathan, Zakaria mu Meshulam, pehü hako kie, mu kesikele ugei keba Joiarib mu Elnathan unie rei kie,

¹⁷sidi uko ketsepie Iddo ki shü, puoe Kesifia thechüu nu krütau, uko bu Kesifia thechüu nu keba siezedzürie rüsuoki chalieko ki kedipuo pulie morosuo shikecü pushü, süusü uko bu Kepenuopfü kiu la liethomia ze vorlie morosuo ücü pushü.

¹⁸Siro Ukepenuopfü dzie keviu hie gei tuocü la, ukoe mhakesikelemia puo, Mahli nuonuo thepfuko donu, Levi nuonuo thepfuko donu, Israel nuou ze hie ki vorshü, puo za Sherebia, puo nuo thepfuko mu puo seyieko sa mia kerethetha.

¹⁹Siro Hashabia, mu Merari nuonuoko donu Jeshaia, mu puo seyiemia uko mia mepfü rei sa;

²⁰sizokemo rüsuoki chalieko mia krie kenie di mepfü sa, David mu puo khro kezhakoe uko bu Levimia mehotuoü di kelakreikewako rei sa. Hako pete rei u za thu krei phre.

²¹Siro ae Ahava rüu kinu mevolienu di pushü, hie bu Ukepenuopfü mhodzünu u thuo u chü kerünuolie di u la, u nuonuo la siro u kinyi pete la cha nu hie rüguolieketuo pfhüketuo la.

²²Kekreilamonyü ae kediu ki chüpahimia mu gura themia kro puo bu chanu ngumvümia perhie di hieko rüguoketuo cha mengata, hiekoe kediu ki, Ukepenuopfü dzie keviu puo pfhüyakezhamia pete gei keviu chülieya zo; derei kekuo mu puo noupfhünouyieu puo khakewamia perhie tuoyaü siwaketa la.

²³Sidi hieko hau la mevo mu Ukepenuopfü ki chalie, sitse puoe hieko pfhe rünyülie.

²⁴Süsie ae zievo krüta kerekenie kedalie, Sherebia; Hashabia, mu unie seyiemia mia ker,

²⁵sidi ae rakachü, suna, mu mhabouko se Ukepenuopfü kiu nu ruosuo chüketuo la mu Israel pete khakeshüko mejüpie uko tsüshü, kediu puo ketarhoko, puo niepuko, ba di süko khashü.

²⁶Sidi a rakachü krie sorou di hiepengou, mu rakachü pie kechü mhabou talent krie puo, mu suna talent krie puo;

²⁷suna khou mepfü puoma darik nyie puo; mu merenyi kevi pie kechü mhabou kenie, süu re pie suna tuoi zo.

²⁸Mu a uko ki: “Nieko Jihova kitsatie mesa, mhabouko rei mesa; siro rakachü mu suna hako kenei nu khapie Jihova, nie puonuoko Kepenuopfü ketsü ruosuo zo.

²⁹Nieko süko pfhe balie mu kha menuopie balie, Jerusalem nu Jihova ki nu kibouko nu zievoko mu Leviko mia puonuo pehüko mhodzünu nieko süko mejüshüwa kemochie,” sishü.

³⁰Sidi zievoko mu Leviko rakachü mu suna, mu mhabou mejükeshüko se Jerusalem nu uko Kepenuopfü kiu nu vortatuoü di lielie.

³¹Süsie hieko Jerusalem nu votatuoü di, thekhrü thenieu nu zha kerekenie nhie Ahava rü nunu tuoshü, hieko Kepenuopfü dzieu hie gei tuo, di puoe ngumvümia dzie nunu, mu cha nu hie rü kebamia dzie nunu hie kelashü.

³²Sidi hieko Jerusalem nu vorlie, di sünu zha se balie.

³³Sidi teisozha dia nhie Uria nuou Meremoth zievo-u dzie nu rakachü mu suna, mu mhabouko mejüshüwa; süki Finehas nuou Eleazar rei puo ze ba; mu Levimia Jeshua nuou Jozabad mu Binui nuou Noadia rei unie ze ba.

³⁴Mha pete phrülie mu mejülie, sidi mejükelie pete thupie zhüwa.

³⁵Süki tezeketa nuonuoko rei mia die chü di vorkelieko, ruosuo chüpie Israel Kepenuopfü tsü, Israel pete kephouma ruosuo la, thudo kerekenie, tekuochü hiethepfüesorou, tekuonuo hietheniethenie, mvüdo kerekenie, hako pete se kethe ruosuo chüpie Jihova tsü.

³⁶Süsie rei ukoe kediu diekhakeshü pie kediu khro kebamia mu Kerükhie Lutsa keba kezhako tsüwa, sidi ukoe themiako mu Ukepenuopfü kiu khruohishü.