Read Angami Naga Ezra 9 Bible Online

Ezra 9 - Angami Naga bible

Ezra 9

¹Mha hako chüwata tse, kezhakoe a ki vor di sie, “Israel themiako, zievoko, mu Leviko, kijüu nu themiako donunu u thuo u kelakrei se balie mote, ukoe kerütsekecüko chü di Kananmia, Hitmia, Perizmia, Jebusmia, Ammonmia, Moabmia, Ijiptmia mu Amormia kemhie bate.

²Kekreilamonyü ukoe uko thuo uko la, uko nuonuo thepfuko la, süko nuonuo thenuko lieliete, süla kemesa tsiau kijüu nu themiako ze kereiwate, mu kejokemou mhatho hau nu kezhako mu mia kekhayakezhakoe kerie chüta zo” sita.

³Ae mha hau sikelie ki, a pfhenei tsiu a pfhedzie cierhawa, mu a tsütha mu a tiemie pie zo di a kedethepfü bata.

⁴Sitse Israel Kepenuopfü dieko sishü di michiekelie pete vor a houpfülie, a thevatie ruosuo kechü tei ketso a kedepfü di bacü ki, süu mia die chü di la vorketako kephouma la.

⁵Sidi thevatie ruosuo kechü teiki, a mevo bakecü nunu sielie, di a pfhenei mu a pfhedzie cierhawa di, süsie a khoutoulie di a dzie yhapie Jihova a Kepenuopfü ki shü,

⁶di sie, “He-i a Kepenuopfü, a tosie n mehoketuo rei le mengathorte mu a ziejüte, a Kepenuopfü, kekreilamonyü hieko kesuo kechüko hie tsüko kirei rükriekuote, mu hie kejoko kho tei thu bate.

⁷Hieko puonuoko teiki nu vor thie ketso kejokemou sou sete; tsiu hieko kesuokechüko la nu, hieko, hie kediko, hie zievoko khapie kijüu nu kedimiako dzienu, zhiecha, miadiemiaphrie, kepeka nu shüwa, mu thenga ngadi kralie, thie hakemhie tou.

⁸Derei tsie puotei huoyo la Jihova hie Kepenuopfüe ngukemezhie thashü, Puoe hieko bu talietuoü peshashü mu puo kemesa nu thechü khrukhrekecü puo khashü u tsü, süusü hieko Kepenuopfüe hieko mhi bie perhoshütuoü, sidi hie miadie chü ketuo nu hie chü perhei zashütuoükecü la zo.

⁹Kekreilamonyü hiekoe mia diemia zo; sirei hieko Kepenuopfü hie mia die chü ketuo kirei hie khawa mo, derei Persia kediu mhingu ki hieko ngumezhieshü, sidi hieko chü perheishü hieko bu Kepenuopfü kiu chü laketuo mu, süu ruo zhüketa chü kesa lashü, tsiu Juda mu Jerusalem nu hieko dahou pfheshü.

¹⁰“Mu tsie, hieko Kepenuopfü, hieko kedipuo pulie ta? Hie no diekhakeshüko khakegewata zeru.

¹¹Süko noe n kituo siedzekesiko geinu khashü di pucü, ‘Nieko vo di welieketuo kijüu süu nu themiako la mesa mote, uko kerütsekecü chükecüko lanu, uko mesakemoko tietsatie puo nu vo kekreitsatie ketshu chü di kijüu bu mesa mote.

¹²Süla nie nuonuo thenuko pie süko nuonuo thepfuko ki penyi hie morei nieko nuonuo thepfuko bu uko nuonuo thenuko lie hie, morei uko ze vitho kechü uko kinyi mhakipuorei mehou hie; siro nieko meteilie di kijü keviu cüükrie di sünu khapie nie nuonuoko bu welieketuo la.’

¹³Hieko mhatho kesuo la, hie gei kevor peteko, hie kephouma kemeriekecü la, no hie Kepenuopfü, hie kejo zhakhra chü kezhü de chü mokecü ngushü, sidi hieko kelashü zo rei;

¹⁴hieko n diekhakeshüko varhuo di, vo mha kerütsekecü themia hako ze kesekerikecü chütuo me? No hieko peka tseiwa, di miapuorei rhalieketuo morei peshakeshü tuo mota kemochie hieko gei n nei mo baketa mese moü me?

¹⁵He-i Jihova Israel Kepenuopfü noe miatho zo, hiekoe thie hakemhie tapralie, n mhodzünu hieko hie kephouma nu ba zo, miapuorei n mhodzünu mha hau la thalie kenjü zo ürei” ishü.