Read Angami Naga Nehemia 1 Bible Online

Nehemia 1 - Angami Naga bible

Nehemia 1

¹Hakalia nuou Nehemia dieko. Teicie mepfüu cie, chislev khrü, ae Susa kediki nu keba ki,

²Hanani, a siezedzürieko donu mia puoe Juda themia huo sa ze di vor; mu ae uko ki Judamia, mia die chü votakemoko mu Jerusalem dze ketsoshü.

³Ru ukoe a ki: “Rüna nu mia die chü votakemoko, kedie nunu rüdakelieko kemezhie mu kemenga se bate, siro Jerusalem dahou me tsute, mu puo kharuko mi pie thewate” sita.

⁴Ae die hako silie tse, ke balie di kra bata, sidi ae teisozha huo süsü krü kra thenousuo bata, sidi ae teigeikeba Kepenuopfü mhodzünu mevo di kechachü.

⁵Sidi sie, “He-i Jihova teigeikeba Kepenuopfü, kezhau mu kemerie zokecü Kepenuopfüu, noe n khrieyakezhako mu n diekhakeshüko chüüzeyakezhamia gei n dietseidiekho-u mu ngukemezhie khashüya,

⁶tsie n nyie bu a pfhe rünyü, n mhi pie meho, di n kituou kecha rünyüshüyi, a tsie n ki chayalie, teisonhie mu teizeimetsei Israelmia n kituoko la chaya, siro Israelmiako kephouma phrashüzhie, hie n gei kejokemou chütuote. A mu a kikruko rei phoumawate.

⁷Hie n gei kekrüthor tuota zo, no n kituou Mosa dzie nu khakeshü n dieko, n zhoko, morei chüüzelienukecü dieko zetuo mote.

⁸No n kituou Mosa ki diekhakeshüu rükrashücie, süu pukecü, ‘Mhanuü nieko a gei dietholie mo liro; a nieko pie seyieko donu cürewatuo.

⁹Derei nieko rürei a kitsa vorlie liro, tsiu a diekhakeshüko zelie, mu chülie liro; a nieko kelhi pie teiboteiyo nu tuota zo shierei, a süra nu uko pfhü kengulietuo, sidi uko ze a za khapiebatuoü di kedakelie thechüu nu vorlietuo.’

¹⁰Ukoe n kituo mu n themiako ze, noe n kekuo kezha nunu tsiu n dziekemetei üse rhalieketako zo.

¹¹He-i Jihova, n nyie kedeipie n kituou kecha, mu n kituoko n zau prei nyüyakezhako kecha rünyüshüyi; sidi thie n kituou bu chükhriekelie chüshüyi, mu themia hau mhingu kinu ngukemezhie khapie puo tsüyie!” Süki ae kediu hie kepieu chüya.