Read Angami Naga Nehemia 13 Bible Online

Nehemia 13 - Angami Naga bible

Nehemia 13

¹Sünhie uko themiako mhodzünu nu Mosa leshüdau phrü; mu Ammonmia morei Moabmia Ukepenuopfü kehou nu vor suo ükecü thu piekezhü ngulie;

²kekreilamonyü uko niekhrüda mu dzü se vor Israelmia nuonuoko ze kese mota, derei Balaam zha khrüpie uko petsouta, sidi puo bu uko rüsewanuta; sirei Ukepenuopfü rüseu pie theja chüwa.

³Siro ukoe thezho-u silie tse, ukoe seyie kekrei ze kerituoketa nunu Israel kela kreilie.

⁴Siro hamhodzütsa, Eliashib zievo-u, Ukepenuopfü ki kemeho-u, mu Tobia ze kepero kezhaue.

⁵Tobia la ki kezha puo chüshü, hamhotsa ukoe thoulha ruosuo, mharethengu mu tehie mekhouko, telha ker za puoko, khubedzü kesa, mu tier khapie Leviko ükechüko, mu liethoko tsü nu di diekhakeshüko kha pie zhüya.

⁶Derei hako kechü teiki a Jerusalem nu ba mota: kekreilamonyü Babilon nu kediu Artaxerxes dikelie cie serekenie cie a kediu ki vota, mu puotei huo sienu kediu ki chalie,

⁷di Jerusalem nu vor, ru Eliashib-e Tobia gei mha kesuo chü di Ukepenuopfü kinu kibou puo pie puo tsükeshü silie.

⁸A süu la a nei mo seta, süla a kibou nunu Tobia vienyako pete chükelhouwata.

⁹Süsie a diekhashü, mu ukoe kibouko chü kemesawa, sidi a Kepenuopfü kinu tehie mekhouko, thoulha ruosuo mu mharekethengu sa di se la vorshülie.

¹⁰Siro ae Leviko yako pie uko tsü vor kemo ngulie, kekreilamonyü Levimiako mu ükechüko mhatho chüyakezhakoe u thuo ta se u lie nu tsuta.

¹¹Süla a mhakekhayakezhako ze kemeü di sie, “Kiüdi Ukepenuopfü kiu khawata ga?” ishü, süsie a uko kie kengulie, sidi uko khapie u chü nu shüshü.

¹²Sitse Juda pete-e telha, khubedzü kesa mu tier ker zako se phre vor kinyibou nu shülie.

¹³Süsie a kinyi kemeho la kinyikesemia hako kedalie; Shelemia zievo-u, Zadok leshükesiu mu Pedaia Leviu, mu uko siezedzürieko liro Zakur nuou Hanan, Matania nuou, ukoe diethokecü ngukelie la, mu uko mhathoe mha keza pie uko siezedzürieko tsüketuo la zo.

¹⁴He-i a Kepenuopfü, a rükrashücie hau dze tsatie, mu a a Kepenuopfü kiu la mu mhatho-u la mha kevi kedipuo chüshü shi vawa hiecie.

¹⁵Süteiki a Juda themiako sabat nhie khubedzü the, telha pfü kengu mu gada pie dakecü, sizomonyü khubedzü, khubesi mu chiede mu thepie doneiünei se sabat nhie Jerusalem nu kevor ngushü, ru uko mhazekecü teisozha nhie a uko ruoshü.

¹⁶Nadi sünu Tur themia rei lhou ba, ukoe khuo, mu mhanya neiünei se vor di sabat nhie Juda themiako, mu Jerusalem nu kebako ki zeshü.

¹⁷Sitse ae Juda pehüko ze keprüli di sie uko ki, “Nieko chüyakezha, mha kesuo hau kedipuo ga? Sabat zha bieperhuwate.

¹⁸Nieko puonuoko hamhiekecü chü moü ba me, sidi úko Kepenuopfü mha kesuo hako pie u gei tsiu u nadi gei se vorshü moü me? Niekoe sabat bie perhuwa di noupfhü rekuokecü se vor Israel gei shüshüte” sishü.

¹⁹Süsie sabat mhodzü nhie Jerusalem kharu nu zei vortazhü tse, ae kharuko khawanu di diekhashüwa, sidi sabat zhau tseita kemochie khrüshü hienuwata; tsiu ae sabat nhie thepie pfü vor lhoüwata.

²⁰Sidi vapuo kenie lhithomiako mu mha neiünei zeyakezhako bu Jerusalem khie zhü.

²¹Derei a uko kerhie di sie, uko ki, “Nieko kiüdi dahou khie zhüya ga? Mhanuü nieko hasie chü lakecü sie, a a dzie pie nieko gei shütuo” sishü. Sünhie yawinu uko sabat nhie vor sa mota.

²²Sidi a Leviko bu u thuo u chü kemesalie, mu vor di kharuko pfhelie, sabat zhau kha kemesa pie balienu di diekhashü. A rükrashücie, he-i a Kepenuopfü, haha la rei sa, sidi no mia ngumezhie phiyakecü ki ze a kelashücie.

²³Süteiki Judamia vo Ashdod, Amon mu Moabmia pfü liekecü rei ae ngushü.

²⁴Mu uko nuonuo ketoupuoe Ashdod die pu, mu uko Judamia die pulie kenjü di u thuo u themia die puta.

²⁵Süla ae sie uko ze kemeü mu uko rüse, tsiu uko huomia vü mu uko tsütha pieshü, sidi uko bu Kepenuopfü za se rüse di hamhiecü pu, “Nieko nie nuopfüko khapie uko nuonuo thepfuko tsülie lho zo, morei uko nuopfüko lie pie nie nuonuo thepfuko tsülie lho zo, morei nie thuo nie la rei silie lho zo.

²⁶Israel kediu Solomon-e mha hako gei jota moü me? Seyie kekra donu kedi puo kemhie jü zo, puo Kepenuopfüe puo khrie phi, mu Ukepenuopfüe puo chüpie puo bu Israelmia pete mho kedi chü; sirei seyie kekreipfüko bu puo chüpie phoumawa.

²⁷Di siliro we nieko die rünyü di mhakesuo kemeriekecü hau chütuo me, seyie kekreimiapfü lielie di Ukepenuopfü gei kephouma chütuo me?”

²⁸Siro Jehoiada nuoko donu mia puo, zievo-u kezhau Eliashib nuou, Horonmia Sanbalat nyaue sükemhie chü; süla a a khie ki nu puo whuowa.

²⁹Uko rükrashücie, he-i a Kepenuopfü, kekreilamonyü ukoe zievokechüu, mu zievo dietseidiekho-u mu Leviko perhuwate.

³⁰Hamhie di a seyie kekreimia donu nu uko chükemesalie, tsiu zievo mu Leviko, mia puopuokecü mhatho-u kedashüwa;

³¹Siro sei ruosuo la puotei tho pie kebau nu, mu puosivülie kerieu la mha keselie, a rükrashücie, he-i a Kepenuopfü, keviu la.