Read Angami Naga Nehemia 2 Bible Online

Nehemia 2 - Angami Naga bible

Nehemia 2

¹Süsie Nisan-u khrü, kediu Artaxerxes kedi chükelie teicie mepfü cie, khubezu puo tsütuoü kesie ki, ae khubezu chüpielie di süu pie kediu tsüshü. Hamhodzü puo mhodzünu a thesuoshü mo zoluo.

²Sitse kediu sie a ki, “Kiüdi n zie ngu pesuota ga? No mhachü ba mo ze! Hau thenoukesuo puo la zo mecie” sita. Sitse a michie pie mhapuo chüta.

³Sidi sie kediu ki, “Kediu bu rheikechau chücie! Kiüdi a zie ngu pesuo motuo ga? Nadiu, a puonuoko kekhruchü, ruo zhüte mu kharuko mi bu the pesuowate” sishü.

⁴Sitse kediu sie a ki, “Siliro no kedipuo chaya ga?” sita. Süla a teigei keba Kepenuopfü ki chashü.

⁵Sidi a sie kediu ki, “Kediu bu puo medoü liro, mu n kituou n mhodzü ki n nei chülieü ro, no a ketsepie Juda nu shücie, a puonuoko mekhruchü kezhü nadiu nu, sidi a bu süu chü lacie” sishü.

⁶Sitse kediu sie, a ki: (Kedipfü rei puo khieki ba.) “No kichie puo tuota ta mu no kedikechükipuo la vorlie ta?” sita. Sidi kediue a ketsekeshü puo medolie, mu a puotei chiepie puo tsüshü.

⁷Sizomoü a sie kediu ki, “Kediu bu puo medoü ro, leshü thupie Kerükhie Lutsa keba kezhau tsüketuo pie a dzie nu shücie, siliro a Juda tsolie kemochie ukoe a bu volieketuo la.

⁸Siro leshü puo pie kediu tsa pfheyakezhau Asaf kediu ki shücie, silie tse puoe sei khashü di rüsuokiu kharu kiprü, nadiu kuda, siro a baketuo kiu chülietuo” sishü. Ru Ukepenuopfüe u ngukemezhie dzie a gei ketuo mhie, kediue a kecha chüshü.

⁹Sitse a Kerükhie Lutsa kijü nu kezhako ki volie, sidi kediu leshüu pie uko tsüshü, süki kediue chüpahi mhokezhau, gurakesemia mu a sa di ketseshülie.

¹⁰Derei Horanmia Sanbalat mu Ammonmia kezhau Tobia-e süu silie, mu Israel nuonuoko dzevi pfhütuoücü la mia puo votaücü silie tse uko nei mo phita.

¹¹Süla a Jerusalem nu vorlie, di sünu zha se bata.

¹²Süsie a teizei ze nu sielie, a mia huo ze salie, mu a miapuo ki rei a Kepenuopfüe a bu Jerusalem chülieketuo la mha kicüpuo pie a nou shüshü shi sicü pu mo. Siro a puo gei ketuo khunuou zokemo sie khunuo kekrei rei ze sa mo.

¹³A theva ze Razha Kharu chau ze pra, sidi Tinyhü Dzüluotsa vo di Thubuo Kharu nu volie, sidi Jerusalem kudako mehoshü, süko me zhüta, mu sünu kharuko mi bu thewata.

¹⁴Süsie a Dzüluo Kharu nu vo Kediu Zie ketso voshü; derei sünu a toupfüketuo khunuou bu cie voketuo cha puorei ba mota.

¹⁵Süsie a theva gei nu razhau ze kho di kudau mehoshü, di rürei la Razha Kharu-u nu lelie, sidi la vorta.

¹⁶Sirei kezhakoe a kirapuo vo shi, morei a kedipuo chü shikecü si mo, morei a süki rei süu pie Judamia, zievoko, pehüko, kezhako mu kekreimia keze mhachüketuoko ki puwa moluo.

¹⁷Süsie a sie uko ki, “Úko kedithede puo kemezhiekecü nu ba shikecü niekoe nguba, Jerusalem bie peruopie zhüte, siro puo kharuko mi bu thewate. Vorlie, sidi úko Jerusalem dahouu pfhe la khe, silie tse mia u pesekecü chü salie lho” sishü.

¹⁸Süki a uko ki a Kepenuopfü dzie a gei vikeshüu dze pushü, siro kediu se a ki pukeshü dieko rei pushü, sitse ukoe sie, “Úko sielie di chü khe” sita. Sükemhie di uko mhatho hau chütuoü uko dzie meteilie.

¹⁹Derei Horonmia Sanbalat mu Ammonmia kezhau Tobia, mu Arabmia Geshem ukoe süu silie tse, uko hie kre mu hie ngumecüta di, “Nieko chükeba hau kedipuo ga? Nieko sie kediu petsoutieya me?” sita.

²⁰Sitse a sie uko ki, “Teigei ketuo Ukepenuopfü, Puoe hieko khruoshütuo; süla hie puo kituoko sie di chütuo; derei nieko we Jerusalem nu nie ya, nie mezhü, morei nie dzeüse puo rei tuo mo” siwa.