Read Angami Naga Nehemia 3 Bible Online

Nehemia 3 - Angami Naga bible

Nehemia 3

¹Süsie Eliashib zievo-ue zievoko ze sie di Tekuo Kharuu chülie. Ukoe süu chükemesalie, sidi sünu kikhako pesieshülie; ukoe Thekrie Kudau nunu vo Hananel dahouu ketso kenyülie.

²Mu puo khietou-u Jerikomiakoe chü, mu uko khieu Imri nuou Zakur chü.

³Hasena nuonuokoe Khuo Kharuu chü, ukoe puo kiphiko rei vüshü, mu sünu kikhako rei, kharüko rei mu puo cahouko rei chüshü.

⁴Mu süko sie Hakoz nuo Uria nuou Meremoth mhachü, mu süsie Berekia nuou Meshulam mhachü, mu uko sie Bana nuou Zadok mhachü.

⁵Mu uko sie Tekomiakoe chü, derei uko pehükoe u mhokezhako mhatho pie u pelekeshüko chü nyü mota.

⁶Süsie Pasia nuou Joiada mu Besodeia nuou Meshulam-e Kharu Keweu chü, unie-e sünu kiphiko mu kikhako chüshü, mu mha khakecüko, mu puo cahouko chü.

⁷Mu unie sie kechü Gibeonmia Melatia, mu Meronothmia Jadon, siro Gibeonko, mu Mizpako Kerü Lu tsatie kezha chükebau ki ketso chü.

⁸Uko sie Harhaia nuou Uziel, suna rükriu mhaketso lashü. Puo sie rei Hanania, tier rekethengu chüyakezha mia puoe chü, mu unie-e Jerusalem nunu vo Dahou Kemeyau ketso pfhekemeteishü.

⁹Unie sie Hur nuou Refaia, Jerusalem ketou puo kekhayakezhaue mha ketso lashü.

¹⁰Mu uko sie Harumaf nuou Jedaia-e puo ki petsou kebako chü. Mu puo sie Hashabneia nuou Hatush-e mhachü lashü.

¹¹Harim nuou Malkija, mu Pahat-moab nuou Hashub unie-e thechü huo mu miphuko tsiepfheu chü.

¹²Mu puo sie Halohesh nuou Shalum, Jerusalem tietsa puo kekhayakezhaue puo mu puo nuopfüko sa di mhachü.

¹³Hanun mu Zanoa nu kelhoukoe Razha Kharuu chü; ukoe süu chü pesieshü mu süu kikhako, mu puo kekhako cahouko chüshülie, mu Kerhu Kharu ketso thu nyie puo ketso chü lashülie.

¹⁴Rekab nuou Malkija, Beth-hakerem kijü tietsa[1] puo kekhayakezhau, Kerhu Kharuu ketsoshü, puoe süu chüshü di süu kikhako, kekhako, siro cahouko chüshü.

¹⁵Mu Kol-hoze nuou Shalum, Mizpa kijü[2] kekhayakezhau, Dzüluo Kharuu ketsoshü di puo kewhe chüwa di süu kikhako, kekhako, mu cahouko chüshülie, siro Shela rüzieu tsiepfheu kediu zie khie ki kebau, mu David nadiu nunu tuo keke kheyako ketso chülashü.

¹⁶Puo sie Azbuk nuou Nehemia, Beth-zur kijü tietsa[3] puo kekhayakezhau, David mekhru kepetsouu nunu vo rüzie thiekelieu ketso chüshü, mu terhümiavimia kiu ketso chü lashü.

¹⁷Puo sie Levimiako mha ketso la; Bani nuou Rehum, puo sie Hashabia, Keila kijü tietsa[4] puo kekhayakezhau Hashabia, puo kijü zanu puo yau chüshü.

¹⁸Puo sie puo siezedzürieko chü lashü. Hanadad nuou Banui[5], Keila kijü tietsa puo kekhayakezhau puo sie chü.

¹⁹Mu puo sie Jeshua nuou Ezer, Mizpa kijü[6] kekhayakezhau, Dahou keu nunu terhü rünyie khapie zhüyakezha nu keke kepetsou ki thechü huo ketso lashü.

²⁰Puo sie Zabai nuou Baruk kekreitsatie chü lashü. Dahou keu nunu vo Eleiashib zievo-u kikha ketso chü.

²¹Puo sie Koz nuo Uria nuou Meremoth nuou bu Eliashib kikha nunu vo Eliashib kitho kekreitsatie ketso chü lashü.

²²Mu puo sie zievoko, mu zanuoki keba themiakoe mhachü lashü.

²³Puo sie Benjamin mu Hashub unie-e unie ki kepetsou-u chü. Puo sie Anania nuo Maseia nuou Azaria-e Puo kikhie ki kebako chü.

²⁴Puo sie Henadad nuou Binui Azaria kiki nu vo Dahou keu ketso chü.

²⁵Uzai nuou Palal bu Dahou keu petsoukeba nu vo kediu ki, kerükrieu gei keba tsiepfheu, süu kediu kepfheko kiluo zha nu keba ketso chü lashü. Puo sie Parosh nuou Padaia,

²⁶mu rüsuokiu kethekeko Ofel nu lhoukebakoe niathu tsatie Dzü Kharu petsoukeba Dahou Pfhepiekebau ketso chü.

²⁷Puo sie Tekomiako kekreitsatie chü, Dahou Kezhau pfhepie kebau petsoukebau, Ofel Dahou ketso rei chü.

²⁸Zievokoe Gura Kharu mhotsatie ketsoshü, mia puopuokecü puo ki kepetsou-u chü phre.

²⁹Uko sie Immer nuou Zadok-e puo ki petsoukebau chülashü. Puo sie Shekania nuou Shemaia niathutsa kharu kepefheu chü.

³⁰Puo sie Shelemia nuou Hanania mu Zalaf nuo sorouu Hanun-e mha huo chüshü. Puo sie Berekia nuou Meshulam puo ki bou petsoukebau chü lashü.

³¹Puo sie Malkija, suna rükreimia puo ru puo rüsuoki thekeko mu lhithoko ki mu Mifka Care[7] petsoukebau ki peso gei siro puo ke nu kekho ketso chü lashü.

³²Siro puo ke nu kekho ki peso gei mu Tekuo Kharu donu suna rükreiyakezhako mu lhithokoe chü lashü.