Read Angami Naga Nehemia 4 Bible Online

Nehemia 4 - Angami Naga bible

Nehemia 4

¹Siro Sanbalat-e hieko dahou pfhekeba silie tse, puo nei mota mu puo nou meyiepie mhapuochüta, sidi Judamiako kreta.

²Sidi puoe puo zeko mu Samaria chüpahiko mhodzünu nu sie, “Judamia mhathokemo hako kedipuo chüba ga? Ukoe u thuo u dahou chü kemeteilie tuo me? Ukoe ruosuo chü tieya me? Uko khunhie puo nu chü tseilie tuo me? Ukoe mha kerhu the pie kezhü nunu ketsieko chüse parlie tieya me?”

³Süki Ammonmia Tobia, puo khie ki tha di sie puo ki, “Uko chü keba tsiepfhe cüu we meseru puo kho zorei metatuo” sita.

⁴He-i, hieko Kepenuopfü, rünyüshücie; kekreilamonyü mia hieko mecüya, sidi uko mia kepese chükedipie uko tsü gei shüwacie, sidi uko khapie miadie chüwa di kijü süu nunu uko pekawacie.

⁵Siro uko kejokemou keviewa hie, tsiu n mhodzünu nu uko kephouma vawa hie; kekreilamonyü ukoe kikechüko mhodzünu n nou chükemeyieshükecü la.

⁶Sümhie di hieko dahou-u pfhelie, mu dahouu pete ketou puo pfhe kerükriewata. Kekreilamonyü themiakoe chüketuo u nou le phreta.

⁷Derei sükisü, Sanbalat, mu Tobia, mu Arabmia, mu Ammonmia, mu Ashdodmia, Jerusalem dahouu pfheliekezhü, mu puo kerükoko khawaketa silie tse, uko nei mo seta.

⁸Sidi uko pete nou puo chü di vor Jerusalem perhie mu sünu kebvükeboushü.

⁹Sirei hiekowe hie Kepenuopfü ki kecha chülie, sidi teisoteizei metsei uko perhietuoü rükhou khapie bawa.

¹⁰Derei Juda sie, “Mhatoukepfüko kekuo tsatazhie, mu mha kerhu kekra zhüte, süla hie dahouu pfhelie rete” sita.

¹¹Mu hieko ngumvümia sie, “Uko donu vo di uko dukhri mu uko mhatho khawa kemochie, uko si morei ngu reilie lho” sita.

¹²Siro Judamia uko khieki lhou kebako vor va ker rei hieko ki, “Uko kelhou chü[8] pete nunu, uko vor úko petsou zotie” si.

¹³Süla ae dahouu sie pekhrotsa, thechü kemethuoko nu, u kikru medzi di u zhiecha, u ngou, mu u theü kepiemia pie thalie.

¹⁴Sidi a mehokewa sie thalie di pehüko, mia kekhayakezhako, mu themia kekreiko ki, “Nieko uko prei hiecie. Jihova rükralie, puoe zha tsiu kemerie, süla nie siezedzürieko, nie nuo thepfuko mu thenuko, nie nupfünuoko mu nieko kiko la kegeicie” sishü.

¹⁵Süki hie ngumvümiakoe hie uko mharhüu si baketa silieta, mu Kepenuopfüe uko mharhüu pie kethedowata tse, hieko pete la dahouu nu u thuo u mhatho nu vo phrelie.

¹⁶Sünhie yawinu a liethokoe ketou puo mhachü, mu ketou puo rüngou, pezhü, theü mu thegi boulie selie; mu krütakoe Juda kikru pete,

¹⁷dahouu kechüko sie thalie. Thepie toukepfüko mu u pie pfü chakhra pete rei u dzie puo pie mhachü, mu kekreitsa pie rünyie theze phre.

¹⁸Mu ki kechüko rei, mia puopuokecü puo liekhi geinu zhiecha thushiepfü di ki chü. Siro ketsü kekhouu a khie ki tuo.

¹⁹Mu ae sie pehüko, mia kekhayakezhako, mu themia kekreiko üse, “Mhatho-u ha zha mu meya, mu uko dahouu nu huoniehuo ze kepetse mu cüre tuote.

²⁰Nieko thechü kehourapuo tuo shierei ketsükekhou pfhe si liro, ta hieko ki vortalie. Úko Kepenuopfü u la kegeishütuo” sishü.

²¹Sidi hieko mhatho-u chü, mu ketou puoe teisokelie nunu vo themvü ngu parta kemochie rüngou theze pie tha tso.

²²Mu ae süki themiako ki, “Themia kehoupuorei puo kituoko ze di Jerusalem nu baliecie, sitse ukoe theva gei kepfhemia chülie mu khinhie gei mhachülietuo” sishü.

²³Sükemhie di a rei, morei a siezedzürieko, morei a kituoko, morei mia kepfheko a zeketuoko miapuorei u pfhe lhewa mo zo, hieko pete rei u rünyie se u dzie nu ba sei zo.[9]