Read Angami Naga Nehemia 5 Bible Online

Nehemia 5 - Angami Naga bible

Nehemia 5

¹Süsie themiako mu u kimiakoe uko siezedzürie Judako gei panya di melie u rhiechüta.

²Kekreilamonyü uko mia huoe sie, “Hieko nuonuo thepfumia mu thenumia sa ro, hieko kra phite; süla hieko telha se morosuote, sidi süu cü di lhou balieketuo la,” si.

³Miahuo ro sie, “Pekrie teiki kecü telha la hie lie, hie khube lie mu hie ki pie khewate” sita.

⁴Mu huomia sie, “Kediu khezhanuo su ketuo la hie lie, hie khube lie pupie khe di mia raka thepu molie kenjüte.

⁵Mu hie chü rei hie siezedzüriemia chü ze kemhie ze, hie nuonuo rei uko nuonuo mhie zo, sizoürei uko hie nuonuo thenu rei mu thepfu rei kemvü chüpie miadiechütuoü mu hie nuonuo thenumia huo tsie rei miadiechü bate: derei we uko rhalieketuo kekuo ba mote, kekreilamonyü hie lieko tsiu hie khube lieko lieliete” sita.

⁶Ae uko panyako silie tse a neimo phita.

⁷A a thuo mharhü di pehüko mu kezhako ruoshü, sidi sie uko ki, “Nie mia puopuocü nie siezedzüriemia gei puoprapuoshü lie cü bate” sishü. Mu ae kehou kezha puo kieshü uko petsoutuoü di.

⁸Sidi sie uko ki, “Hie chülie keviu nu, u siezedzürie Judamia, pelekemomia ki zewaketako rhapiezhü; derei nieko nie thuo nie siezedzürieko zewa di u bu rhatuoü thate” sishü. Sitse ukoe kemekrieta, tsiu die puorei pu pie kelaketuo ngulie mota.

⁹Süla a sie, “Nieko chükeba hau vi mo, Ukepenuopfü khrüprei nu tuolie di u ngumvümia u pesekecü nunu u yaliecü mese moü me?

¹⁰Sükemhie, a rei, a siezedzürieko rei, mu a kituoko rei, raka mu telha pie mia thepushü ba. Úko puopra liekecü hau khawa khe.

¹¹A süko ki chaya, thie zokecü rei, nie u kinu lielieketa u kijüko, u raka, u Oliv lieko, mu u kiko, siro raka, telha, khubezu, tier pielie ketako kha lashüwalie.”

¹²Sitse uko sie, “Hieko süko kha lashüwatuo, tsiu uko ki mhapuorei chalie lho, sidi hie n kepu tuoi chülietuo” ita. Sitse a zievoko kielie, di uko phrakeshü mhiei chütuoü di uko bu rüse.

¹³Süsie a rei a pfhenei kekhreko kesü di sie, “Kehoupuorei rüse hau chü moketamia Ukepenuopfü bu puo ki nunu mu puo kiülieko nunu hamhie di puoketshüshü di puo pie kemethuowalie” sishü di Jihova tsheshü. Mu themiakoe phrakeshü mhie chülie.

¹⁴Sizomonyü a keda pie a bu Juda kijü nu Ahng-u chükelie, Artaxerxes dikelie teicie mepfü nunu serekenie ketso, a morei a siezedzüriekoe Ahng kecüca cü vor mo.

¹⁵Derei a mhodzü Ahngkoe thepie kemesipie themiako gei shü, mu rakachü shekel hiedia zomonyü, kecüca mu khubezu lieya, uko kituoko thuo zorei mia pesüpemvü zo. Derei a we sükemhie chü mo, Kepenuopfü khrü keprei la.

¹⁶Ketho zo, a rei dahou-u pfhe zo, mu hieko kijü puo rei khrü mo, mu a kituoko pete mhatho-u la sünu kengu phrelieta.

¹⁷Sizomonyü a mizhü gei hieko khieümhoura seyieko do nunu kevor mia sakemo Judamia mu kezhako krie puo di hiepengou ba.

¹⁸Süki teisonhie a la mha kesekecüe thudo puo mu tekuo puophou kevi sorou; sümhie pera rei sa keseya; siro zha ker donu va puo khubezu doneiüneiya. Sirei a mha hako pete la Ahng-u kecüca khruo-u cha mo, themia hako gei thepie mesithorta zocü la.

¹⁹He-i a Kepenuopfü, themia hako gei chükeshü pete mhiei, a la keviu leshücie.